قلعہ سیف اللہ آپریشن، فتنہ الخوارج کا کمانڈر عادل شاہ ہلاک

سکیورٹی فورسز کی کارروائی، قلعہ سیف اللہ میں فتنہ الخوارج کا اہم کمانڈر عادل شاہ ہلاک

سکیورٹی ذرائع کے مطابق بلوچستان میں آپریشن ردالفتنہ 3 کے تحت دہشت گردوں کے خلاف کارروائیاں جاری ہیں۔ اسی سلسلے میں سکیورٹی فورسز نے ضلع قلعہ سیف اللہ میں انٹیلی جنس بیسڈ آپریشن کیا، جس کے دوران فتنہ الخوارج سے وابستہ اہم کمانڈر عادل شاہ عرف درویش ہلاک ہوگیا۔

ذرائع کے مطابق عادل شاہ دسمبر 2020 سے فتنہ الخوارج سے وابستہ تھا اور 2024 سے دہشت گرد گروہ کے مالی معاملات کی نگرانی کر رہا تھا۔

سکیورٹی ذرائع کے مطابق ہلاک ہونے والا کمانڈر دہشت گرد گروہ کے مالی معاملات میں اہم کردار ادا کر رہا تھا۔ بتایا گیا ہے کہ وہ ژوب، شیرانی اور شعبان کے علاقوں میں غیر مقامی دہشت گردوں کو مستقل رہائش فراہم کرنے میں بھی معاونت کرتا تھا۔

ذرائع کا کہنا ہے کہ عادل شاہ عرف درویش 2022 اور 2023 کے دوران سکیورٹی فورسز پر حملوں اور اغوا برائے تاوان کے لیے بھتہ خوری میں بھی ملوث رہا۔

سکیورٹی ذرائع کے مطابق عادل شاہ عرف درویش کے خلاف انسداد دہشت گردی کی عدالتوں میں 19 ایف آئی آرز درج تھیں، جبکہ اس کے سر کی قیمت 25 لاکھ روپے مقرر کی گئی تھی۔

حکام کے مطابق بلوچستان میں دہشت گردی کے خاتمے اور امن و امان کے قیام کے لیے کارروائیاں جاری ہیں۔ سکیورٹی فورسز کے عزم کے مطابق دہشت گردوں کے خلاف آپریشن آخری دہشت گرد کے خاتمے تک جاری رہے گا۔