فیلڈ مارشل عاصم منیر کا دورہ ایران کامیاب، نتائج جلد سامنے آنے کا اعلان

فیلڈ مارشل عاصم منیر کا دورہ ایران کامیاب، نتائج جلد سامنے آنے کی توقع

عاصم منیر کا دورہ ایران ایرانی صدارتی دفتر کے مطابق انتہائی نتیجہ خیز رہا ہے اور دورے کے دوران اہم سفارتی کامیابیاں حاصل ہوئی ہیں۔ ایرانی صدارتی دفتر کے ترجمان سید مہدی طباطبائی نے کہا ہے کہ دورے کے نتائج جلد سامنے آنا شروع ہوجائیں گے۔

ایرانی حکام کی جانب سے فیلڈ مارشل عاصم منیر کے دورے کو ایسے وقت میں اہم قرار دیا گیا ہے جب خطے میں کشیدگی کم کرنے اور تنازعات کے سفارتی حل کے لیے مختلف سطحوں پر رابطے جاری ہیں۔

وفاقی وزیر داخلہ محسن نقوی نے بھی دورہ ایران کے دوران اہم پیش رفت کا دعویٰ کیا ہے۔ اپنے ایکس اکاؤنٹ پر جاری بیان میں انہوں نے کہا کہ ان کی اور فیلڈ مارشل عاصم منیر کی ایرانی صدر مسعود پزشکیان سے ملاقات انتہائی مثبت اور نتیجہ خیز رہی۔

محسن نقوی کے مطابق ملاقات میں ایران اور امریکا کے درمیان تنازع، مشرق وسطیٰ میں جاری کشیدگی اور آئندہ کے لائحہ عمل پر تفصیلی گفتگو ہوئی۔ دونوں جانب سے موجودہ صورتحال کے تناظر میں مختلف امور پر تبادلہ خیال کیا گیا۔

وفاقی وزیر داخلہ نے بتایا کہ اسلام آباد مفاہمتی یادداشت (ایم او یو) کی بحالی کے لیے دونوں جانب سے درکار اقدامات پر بھی گفتگو ہوئی۔ ان کے مطابق یہ اقدامات تنازع کے جامع حل کی جانب پیش رفت میں مددگار ثابت ہوسکتے ہیں۔

محسن نقوی کا کہنا تھا کہ ایرانی صدر نے اپنی حکومت کا مؤقف اور خدشات کھل کر پاکستانی وفد کے سامنے رکھے، جبکہ متعلقہ معاملات پر دونوں جانب سے تعمیری اور مفید گفتگو ہوئی۔

انہوں نے کہا کہ ملاقات اہم پیش رفت کے ساتھ انتہائی مثبت ماحول میں اختتام پذیر ہوئی۔ وفاقی وزیر داخلہ نے امید ظاہر کی کہ موجودہ پیش رفت مستقبل میں مزید مثبت اقدامات کی راہ ہموار کرے گی اور خطے میں دیرپا امن کے قیام میں معاون ثابت ہوگی۔

اس سے قبل پاک فوج کے شعبہ تعلقات عامہ نے بتایا تھا کہ فیلڈ مارشل عاصم منیر نے دورہ ایران کے دوران ایرانی صدر مسعود پزشکیان، سپریم نیشنل سکیورٹی کونسل میں رہبرِ اعلیٰ کے نمائندے محسن رضائی، ایرانی پارلیمنٹ کے اسپیکر باقر قالیباف، ایرانی وزیر خارجہ اور ایرانی وزیر داخلہ سمیت اعلیٰ حکام سے ملاقاتیں کیں۔

آئی ایس پی آر کے مطابق ملاقاتوں میں کشیدگی میں مزید اضافے کی روک تھام، آبنائے ہرمز کو دوبارہ کھولنے اور تنازع کے جلد خاتمے کے لیے ممکنہ اقدامات پر جامع تبادلہ خیال کیا گیا۔

مذاکرات کے دوران علاقائی امن کے فروغ اور تنازعات کو بات چیت کے ذریعے حل کرنے کے طریقہ کار پر بھی گفتگو ہوئی۔ دونوں جانب سے خطے میں کشیدگی کم کرنے اور امن کے لیے سفارتی کوششوں کی اہمیت پر اتفاق کیا گیا۔

ایرانی قیادت نے مذاکرات، کشیدگی میں کمی اور تنازع کے پرامن حل کے لیے سہولت کاری میں پاکستان کے تعمیری کردار اور مخلصانہ کوششوں کو سراہا۔

پاکستان کی جانب سے ایران کے ساتھ اعلیٰ سطحی رابطے ایسے وقت میں سامنے آئے ہیں جب خطے میں امن و استحکام کے لیے سفارتی کوششوں کو اہمیت دی جا رہی ہے۔ ایرانی حکام کی جانب سے دورے کو کامیاب اور نتیجہ خیز قرار دینا پاکستان کی سفارتی کوششوں کے لیے اہم پیش رفت قرار دیا جا رہا ہے۔