ملک دشمن عناصر کے ساتھ گٹھ جوڑ بے نقاب، نورین نیازی نے بھارتی میڈیا پر پاکستان مخالف بیانیہ اپنایا، عطا اللہ تارڑ کی میڈیا سے گفتگو

پی ٹی آئی کا ملک دشمن عناصر کے ساتھ گٹھ جوڑ بے نقاب، نورین نیازی نے بھارتی میڈیا پر پاکستان مخالف بیانیہ اپنایا: عطا اللہ تارڑ کی میڈیا سے گفتگو ، افغان حکومت کی کمزور پالیسیوں کے نتیجے میں سرحد پار دراندازی میں اضافہ

وفاقی وزیر اطلاعات عطا اللہ تارڑ نے کہا ہے کہ پاکستان تحریک انصاف (پی ٹی آئی) کا ملک دشمن عناصر کے ساتھ گٹھ جوڑ کھل کر سامنے آچکا ہے اور گزشتہ چند روز سے ملک میں پھیلا ہوا افواہوں کا بازار اسی سازش کی کڑی ہے۔
اسلام آباد میں میڈیا سے گفتگو کرتے ہوئے انہوں نے کہا کہ ملک میں افراتفری پھیلانے والی تمام افواہیں ایک منظم منصوبہ بندی کے تحت پھیلائی جا رہی ہیں، جن کا مقصد قومی سلامتی اور اداروں کو نشانہ بنانا ہے۔

افغان رجیم کی کمزوریوں کے باعث سرحدی دراندازی میں اضافہ

وزیر اطلاعات نے کہا کہ افغان حکومت کی کمزور پالیسیوں کے نتیجے میں سرحد پار دراندازی میں اضافہ ہوا ہے، جب کہ خیبر پختونخوا حکومت منشیات اسمگلنگ، غیرقانونی مائننگ اور نان کسٹم پیڈ گاڑیوں کی روک تھام میں مکمل طور پر ناکام ہو چکی ہے۔
انہوں نے بتایا کہ نان کسٹم پیڈ گاڑیوں کے باعث قومی خزانے کو اربوں روپے کا نقصان پہنچ رہا ہے، لیکن صوبائی حکومت صورتِ حال پر قابو پانے میں سنجیدہ نظر نہیں آتی۔

خیبر پختونخوا میں دہشت گردی کے 4 ہزار کیسز پر فردِ جرم تک عائد نہ ہو سکی

عطا اللہ تارڑ نے انکشاف کیا کہ خیبر پختونخوا میں گزشتہ بارہ سال کے دوران دہشت گردی کے 4,000 سے زائد کیسز میں فردِ جرم تک عائد نہیں کی جا سکی۔
انہوں نے کہا کہ صوبے میں مؤثر پراسیکیوشن سسٹم قائم نہ ہونا ایک سنگین تشویش ہے، حالانکہ پراسیکیوشن کا پورا نظام صوبائی حکومت کے ماتحت ہے۔
ان کے مطابق دہشت گردی کے مقدمات میں ناقص کارکردگی نے ریاستی رِٹ کو شدید نقصان پہنچایا۔

’9 مئی کے حملے کا مقصد فوج کو کمزور کرنا تھا

وزیر اطلاعات نے ایک بار پھر 9 مئی کے واقعات کا حوالہ دیتے ہوئے کہا کہ یہ حملہ فوج کو کمزور کرنے اور اداروں کو نشانہ بنانے کی سوچی سمجھی سازش تھی۔
انہوں نے دعویٰ کیا کہ پی ٹی آئی بانی کے گھریلو افراد سمیت کئی رہنما کور کمانڈر ہاؤس حملے میں براہِ راست ملوث تھے، اور تمام منصوبہ ساز جلد قانون کے سامنے جواب دہ ہوں گے۔

نورین خان نیازی سے متعلق سوال

وفاقی وزیرعطا اللہ تارڑ کی میڈیا سے گفتگو میں بتایا کہ ایک پی ٹی آئی رہنما نورین خان نیازی نے بھارتی میڈیا پر پاکستان مخالف بیانیہ اپنایا اور کشمیر، شہدا یا ملکی دفاع پر مؤقف پیش کرنے سے گریز کیا۔
انہوں نے طنزیہ طور پر کہا کہ "کاش وہ بھارتی چینل پر پاکستان کے 7 جہاز گرانے کا ذکر کرتیں۔”

خیبر پختونخوا حکومت دھماکوں کی مذمت تک نہیں کرتی

عطا اللہ تارڑ کی میڈیا سے گفتگو میں کہا کہ خیبر پختونخوا واحد صوبہ ہے جہاں ہزاروں نان کسٹم پیڈ گاڑیاں سڑکوں پر رواں دواں ہیں، جب کہ غیر قانونی ٹھیکوں کے ذریعے پہاڑ کاٹے جا رہے ہیں۔
انہوں نے کہا کہ صوبائی حکومت دہشت گردی کے واقعات پر حتیٰ کہ مذمت تک جاری نہیں کرتی، جو ان کی سیکیورٹی پالیسی کی ناکامی کو ظاہر کرتا ہے۔

پی ٹی آئی کے مذموم منصوبے ناکام ہوں گے

وزیر اطلاعات عطا اللہ تارڑ کی میڈیا سے گفتگو میں کہا کہ پی ٹی آئی کے تمام مذموم منصوبے ناکام ہوتے رہے ہیں اور آئندہ بھی ناکام ہوں گے۔
انہوں نے یقین دلایا کہ پاکستان کی سلامتی، ریاستی اداروں اور قومی مفاد کے خلاف پروپیگنڈا پھیلانے والوں کے خلاف سخت کارروائی جاری رہے گی۔
ان کا کہنا تھا کہ جو عناصر ملک کے خلاف زہر اُگل رہے ہیں، ریاست انہیں ہر سطح پر روکے گی۔

#EXCLUSIVE | Listen to Imran Khan's sister Noreen Niazi's open warning if her brother his harmed. #IndiaFirst | @GauravCSawant pic.twitter.com/gtzzHIJVYN
— IndiaToday (@IndiaToday) November 28, 2025