کسٹمز انفورسمنٹ کوئٹہ کی بڑی کارروائی، 25 کروڑ سے زائد مالیت کا اسمگل شدہ سامان ضبط
کسٹمز انفورسمنٹ کوئٹہ نے خفیہ اطلاعات کی بنیاد پر قلات میں بڑی کارروائی کرتے ہوئے 25 کروڑ 13 لاکھ روپے مالیت کا اسمگل شدہ غیر ملکی چھالیہ اور کپڑا ضبط کر لیا۔ یہ کارروائی قانون نافذ کرنے والے اداروں اور ضلعی انتظامیہ کی معاونت سے کی گئی۔ حکام کے مطابق ڈاکٹر کرم الٰہی کی قیادت میں اسمگلنگ کے خلاف سخت اقدامات کے باعث قومی خزانے کو اربوں روپے کا فائدہ پہنچ رہا ہے، جبکہ ایف بی آر نے اس عزم کا اعادہ کیا ہے کہ اسمگلنگ کے خلاف بلاامتیاز کارروائیاں جاری رہیں گی۔
پاک فضائیہ کا مقامی طور پر تیار کردہ تیمور ویپن سسٹم کا کامیاب فلائٹ ٹیسٹ
پاکستان ایئر فورس نے مقامی طور پر تیار کردہ جدید تیمور ائیر لانچڈ کروز میزائل کا کامیاب فلائٹ ٹیسٹ کر لیا ہے۔ آئی ایس پی آر کے مطابق یہ میزائل 600 کلومیٹر تک زمینی اور بحری اہداف کو نشانہ بنانے کی صلاحیت رکھتا ہے اور کم بلندی پر پرواز کرتے ہوئے دشمن کے ائیر اور میزائل ڈیفنس سسٹمز کو چکمہ دینے میں مؤثر ہے۔ فلائٹ ٹیسٹ کا مشاہدہ پاک افواج کے سینئر افسران اور سائنسدانوں نے کیا جبکہ ایئر چیف مارشل ظہیر احمد بابر سدھو اور صدرِ مملکت آصف علی زرداری نے کامیاب تجربے پر سائنسدانوں اور انجنیئرز کو خراجِ تحسین پیش کیا۔
امریکا کا وینزویلا پر بڑا حملہ، صدر نکولس مادورو اور اہلیہ کی گرفتاری کا دعویٰ
امریکی صدر ڈونلڈ ٹرمپ نے دعویٰ کیا ہے کہ امریکا نے وینزویلا کے خلاف بڑے پیمانے پر فوجی کارروائی کی ہے، جس کے دوران صدر نکولس مادورو اور ان کی اہلیہ کو گرفتار کر کے ملک سے باہر منتقل کر دیا گیا۔ ٹرمپ کے مطابق یہ آپریشن امریکی قانون نافذ کرنے والے اداروں کے تعاون سے مکمل ہوا، جبکہ مزید تفصیلات آج مار اے لاگو میں ہونے والی پریس کانفرنس میں فراہم کی جائیں گی۔ تاہم اس دعوے کی آزاد ذرائع سے تاحال تصدیق نہیں ہو سکی۔
چین میں تبادلہ پروگرام سے اشیائے صرف کی فروخت 26 کھرب یوآن تک پہنچ گئی
چین میں صارفین کی اشیائے صرف کے لیے شروع کیے گئے تبادلہ (ٹریڈ اِن) پروگرام کے باعث گزشتہ سال مجموعی فروخت 26 کھرب یوآن سے تجاوز کر گئی، جس سے 36 کروڑ سے زائد افراد مستفید ہوئے۔ اس پروگرام نے نہ صرف کھپت میں اضافہ کیا بلکہ نئی توانائی والی گاڑیوں، گھریلو آلات اور ڈیجیٹل مصنوعات کی فروخت میں نمایاں بہتری لاتے ہوئے ماحول دوست اور کم کاربن معیشت کے فروغ میں بھی اہم کردار ادا کیا۔
سہیل آفریدی کا بڑا بیان: بانی پی ٹی آئی نے اسٹیبلشمنٹ سے بات چیت کا نہیں کہا، تاہم وہ صوبائی معاملات پر رابطے کے لیے تیار
وزیراعلیٰ خیبرپختونخوا محمد سہیل آفریدی نے واضح کیا ہے کہ پاکستان تحریک انصاف کے بانی عمران خان نے انہیں اسٹیبلشمنٹ سے بات چیت کا کوئی ٹاسک نہیں دیا، تاہم وہ صوبائی معاملات پر اسٹیبلشمنٹ سے رابطے اور تعلقات بہتر بنانے کے لیے تیار ہیں۔ انہوں نے ضم اضلاع کے بقایاجات، وفاقی واجبات، امن و امان، کرپشن کے خاتمے اور بانی پی ٹی آئی کی رہائی سے متعلق بھی تفصیلی موقف اختیار کیا۔
اسلام آباد میں پنجاب طرز کے بلدیاتی انتخابات کے لیے قانون سازی، دارالحکومت میں بلدیاتی انتخابات ملتوی
وفاقی کابینہ نے اسلام آباد میں پنجاب طرز کے بلدیاتی انتخابات کے لیے قانون سازی کی منظوری دے دی ہے، جس کے بعد دارالحکومت میں بلدیاتی انتخابات ایک بار پھر ملتوی ہو گئے۔ کابینہ نے اسلام آباد لوکل گورنمنٹ قانون میں ترمیم کے لیے آرڈیننس لانے کا فیصلہ کیا ہے، جس کے تحت وارڈز کی تعداد میں اضافہ کیا جائے گا۔
9 مئی مقدمات: عادل راجا، معید پیرزادہ سمیت 7 افراد کو دو، دو عمر قید کی سزا
اسلام آباد کی انسداد دہشت گردی عدالت نے 9 مئی 2023 کے فسادات سے متعلق مقدمات میں یوٹیوبر عادل راجا، صحافی وجاہت سعید خان، صابر شاکر، شاہین صہبائی، اینکر حیدر رضا مہدی، تجزیہ کار معید پیرزادہ اور سابق فوجی افسر اکبر حسین کو ریاستی اداروں کے خلاف ڈیجیٹل دہشت گردی، پاکستان کے خلاف جنگ چھیڑنے اور مجرمانہ سازش کے الزامات میں دو، دو عمر قید کی سزائیں سنا دیں۔
ایران میں مظاہرین پر تشدد ہوا تو امریکا مداخلت کرے گا، صدر ٹرمپ کی ایران کو انتباہ
امریکی صدر ڈونلڈ ٹرمپ نے خبردار کیا ہے کہ اگر ایران میں پرامن مظاہرین پر فائرنگ یا تشدد کے ذریعے ہلاکتیں ہوئیں تو امریکا مداخلت کرے گا۔ یہ بیان ایسے وقت میں سامنے آیا ہے جب ایران میں مہنگائی، معاشی بدحالی اور کرنسی بحران کے خلاف گزشتہ تین برس کی سب سے بڑی احتجاجی تحریک جاری ہے۔
کوہاٹ میں گیس کے ذخائر میں اضافہ، پاکستان کے توانائی شعبے کے لیے خوشخبری
کوہاٹ کے ٹال بلاک سے یومیہ 1.58 ایم ایم ایس سی ایف ڈی گیس کی دریافت نے پاکستان کے توانائی شعبے میں نئی امید پیدا کر دی، پی پی ایل کے مطابق مستقبل میں مزید ذخائر ملنے کے امکانات روشن ہیں۔
پاکستان اسٹاک ایکسچینج میں تاریخی تیزی، انڈیکس نئی بلند ترین سطح پر
پاکستان اسٹاک ایکسچینج میں زبردست تیزی کا سلسلہ جاری ہے، جہاں ہنڈریڈ انڈیکس ملکی تاریخ میں پہلی بار ایک لاکھ 79 ہزار پوائنٹس کی بلند ترین سطح عبور کر گیا، جب کہ ایک ہی دن میں 2500 سے زائد پوائنٹس کا اضافہ ریکارڈ کیا گیا۔