بلاول بھٹو نے منگنی اور شادی کی خبروں کی تردید کردی

بلاول بھٹو منگنی سے متعلق سوشل میڈیا پر گردش کرنے والی خبروں کی چیئرمین پاکستان پیپلزپارٹی بلاول بھٹو زرداری نے تردید کردی ہے

بلاول بھٹو نے واضح کیا ہے کہ ان کی نہ بات پکی ہوئی ہے اور نہ ہی منگنی ہوئی ہے۔

اپنے ویڈیو بیان میں بلاول بھٹو زرداری نے کہا کہ سوشل میڈیا نے ان کی بات پکی کرنے کے ساتھ ساتھ منگنی اور شادی بھی کروا دی، تاہم حقیقت میں ایسا کچھ نہیں ہوا۔

پیپلزپارٹی چیئرمین نے واضح کرتے ہوئے کہا کہ اگر ان کی زندگی کے حوالے سے کوئی اہم فیصلہ ہوا تو اس کا اعلان ان کا خاندان خود کرے گا۔ انہوں نے سوشل میڈیا پر گردش کرنے والی قیاس آرائیوں کو مسترد کرتے ہوئے اپنی پوزیشن واضح کردی۔

بلاول بھٹو کا کہنا تھا کہ سوشل میڈیا پر ان کی منگنی اور شادی سے متعلق خبریں ایک ایسا تماشا ہیں جس کا مقصد عوام کی توجہ اصل مسائل اور اہم ایشوز سے ہٹانا ہے۔

گزشتہ کچھ عرصے سے سوشل میڈیا پلیٹ فارمز پر بلاول بھٹو زرداری کی ممکنہ منگنی اور شادی سے متعلق مختلف دعوے گردش کر رہے تھے۔ ان خبروں میں ان کی ممکنہ دلہن کے حوالے سے بھی مختلف قیاس آرائیاں سامنے آئی تھیں۔

اس سے قبل بعض رپورٹس میں دعویٰ کیا گیا تھا کہ بلاول بھٹو زرداری اور صدر مملکت آصف علی زرداری ممکنہ منگنی کے سلسلے میں ایک آسٹرین خاندان سے بات چیت کے لیے ویانا میں موجود ہیں۔

سوشل میڈیا پر گردش کرنے والی بعض اطلاعات میں بلاول بھٹو کی ممکنہ دلہن کو آسٹریا کے سابق شاہی خاندان ہاؤس آف ہیبسبرگ-لورین سے منسلک کیا گیا تھا۔ کچھ رپورٹس میں انہیں آسٹریا کے آخری شہنشاہ کارل اول کے خاندان سے بھی جوڑا گیا۔

تاہم ان دعوؤں کی بلاول بھٹو زرداری کی جانب سے واضح تردید سامنے آگئی ہے۔ انہوں نے اپنے بیان میں کہا کہ ان کی نہ بات پکی ہوئی ہے اور نہ منگنی ہوئی ہے۔

بلاول بھٹو زرداری کی وضاحت کے بعد سوشل میڈیا پر ان کی ذاتی زندگی سے متعلق گردش کرنے والی قیاس آرائیوں کی حیثیت بھی واضح ہوگئی ہے۔ ان کے مطابق مستقبل میں اگر ان کی زندگی سے متعلق کوئی اہم فیصلہ ہوتا ہے تو اس کی باضابطہ اطلاع ان کا خاندان دے گا۔