بلاول بھٹو: پاکستان کی تاریخی سفارتی پذیرائی دشمن سے ہضم نہیں ہو رہی

بلاول بھٹو کا کراچی رینجرز کیمپ حملے کی مذمت، دشمن پاکستان کی سفارتی کامیابیوں سے پریشان

بلاول بھٹو کراچی رینجرز کیمپ حملہ پر ردعمل دیتے ہوئے کہا ہے کہ پاکستان کو عالمی سطح پر ملنے والی تاریخی سفارتی پذیرائی دشمن سے ہضم نہیں ہو رہی۔

چیئرمین پاکستان پیپلز پارٹی نے کراچی میں رینجرز کے کیمپ پر ہونے والے دہشت گرد حملے کی شدید مذمت کرتے ہوئے حملہ آوروں کو بروقت کارروائی میں ہلاک کرنے پر سیکیورٹی فورسز کی پیشہ ورانہ صلاحیتوں کو سراہا۔

ترجمان بلاول ہاؤس کے مطابق بلاول بھٹو نے فائرنگ کے تبادلے میں شہید ہونے والے تین اہلکاروں کو خراجِ عقیدت پیش کیا اور ان کے اہل خانہ سے دلی تعزیت اور ہمدردی کا اظہار کیا۔

اپنے بیان میں انہوں نے کہا کہ دہشت گردوں کا یہ بزدلانہ حملہ اس بات کا ثبوت ہے کہ عالمی سطح پر پاکستان کی بڑھتی ہوئی سفارتی کامیابیاں اور مثبت کردار دشمن عناصر کو برداشت نہیں ہو رہا۔

بلاول بھٹو کا کہنا تھا کہ پاکستانی قوم اپنی سیکیورٹی فورسز کے ساتھ کھڑی ہے اور وطن کے دفاع کے لیے ہر قربانی دینے کے لیے تیار ہے۔ انہوں نے اس عزم کا اعادہ کیا کہ دشمن کے ناپاک عزائم کبھی کامیاب نہیں ہوں گے اور دہشت گردی کے خلاف جنگ پوری قوت سے جاری رہے گی۔

انہوں نے مزید کہا کہ شہداء کی قربانیاں رائیگاں نہیں جائیں گی اور پاکستان کے امن و استحکام کے لیے تمام قومی ادارے متحد ہو کر کام کرتے رہیں گے۔