گروپ کیپٹن عاصم طارق شہادت پر صدر اور وزیراعظم کا خراجِ عقیدت

خاتون کے تحفظ میں جان قربان کرنے والے گروپ کیپٹن عاصم طارق کو صدر اور وزیراعظم کا سلام

گروپ کیپٹن عاصم طارق شہادت پر صدرِ مملکت آصف علی زرداری اور وزیراعظم شہباز شریف نے گہرے دکھ اور افسوس کا اظہار کرتے ہوئے شہید افسر کو شاندار خراجِ عقیدت پیش کیا ہے۔

صدرِ مملکت آصف علی زرداری نے اپنے تعزیتی پیغام میں کہا کہ ایک بے گناہ خاتون کے تحفظ کے لیے اپنی جان قربان کرنا اعلیٰ انسانی اقدار، جرات اور قومی خدمت کی روشن مثال ہے۔ انہوں نے شہید گروپ کیپٹن عاصم طارق کے اہلِ خانہ سے دلی تعزیت اور ہمدردی کا اظہار کرتے ہوئے ان کے لیے صبرِ جمیل کی دعا کی۔

صدر مملکت نے اسلام آباد کی اہم شاہراہ پر پیش آنے والے اس افسوسناک واقعے پر تشویش کا اظہار کرتے ہوئے کہا کہ ایسے واقعات کی روک تھام کے لیے مؤثر اقدامات ناگزیر ہیں تاکہ شہریوں کے جان و مال کا تحفظ یقینی بنایا جا سکے۔

دوسری جانب وزیراعظم شہباز شریف نے بھی گروپ کیپٹن عاصم طارق کی شہادت پر گہرے رنج و غم کا اظہار کیا اور شہید کے اہلِ خانہ سے دلی ہمدردی اور تعزیت کا اظہار کیا۔

وزیراعظم نے متعلقہ حکام کو ہدایت کی کہ واقعے کی مکمل، غیر جانبدار اور شفاف تحقیقات کی جائیں اور اس میں ملوث ذمہ دار عناصر کو قانون کے مطابق سخت سزا دی جائے۔

انہوں نے کہا کہ قانون نافذ کرنے والے ادارے ملزم کو جلد از جلد گرفتار کرکے انصاف کے تقاضے پورے کریں تاکہ ایسے جرائم کی حوصلہ شکنی ہو اور عوام کے تحفظ کو یقینی بنایا جا سکے۔

گروپ کیپٹن عاصم طارق کی قربانی کو مختلف حلقوں کی جانب سے جرات، فرض شناسی اور انسانیت کی خدمت کی مثال قرار دیا جا رہا ہے، جبکہ سوشل میڈیا پر بھی انہیں خراجِ عقیدت پیش کیا جا رہا ہے۔