حیدرآباد کا سرکاری اسکول دنیا کے بہترین اسکولوں میں شامل، پاکستان کیلئے بڑا اعزاز

حیدرآباد کا سرکاری اسکول ورلڈز بیسٹ اسکول پرائزز 2026 کے ٹاپ 10 فائنلسٹس میں شامل

حیدرآباد کا سرکاری اسکول دنیا کے بہترین اسکولوں میں شامل ہو کر پاکستان کے لیے ایک بڑا تعلیمی اعزاز حاصل کرنے میں کامیاب ہوگیا۔ سندھ کے شہر حیدرآباد میں واقع گورنمنٹ گرلز لوئر سیکنڈری اسکول ٹنڈو میر غلام حسین نے عالمی سطح پر منعقد ہونے والے ورلڈز بیسٹ اسکول پرائزز 2026 میں کمیونٹی کولیبریشن کی کیٹیگری کے ٹاپ 10 فائنلسٹس میں جگہ بنا لی۔

یہ اعزاز عالمی تعلیمی ادارے T4 Education کی جانب سے دیا جاتا ہے، جس کا مقصد دنیا بھر کے ایسے تعلیمی اداروں کو سراہنا ہے جو معیاری تعلیم، طلبہ کی فلاح، کمیونٹی کی شمولیت اور سماجی ترقی میں نمایاں کردار ادا کر رہے ہوں۔

ورلڈز بیسٹ اسکول پرائزز کو تعلیم کے شعبے کے معتبر ترین عالمی اعزازات میں شمار کیا جاتا ہے۔ ہر سال دنیا بھر سے ہزاروں اسکول اس مقابلے میں حصہ لیتے ہیں، تاہم سخت جانچ پڑتال کے بعد صرف چند بہترین ادارے ہی فائنلسٹ بننے کا اعزاز حاصل کرتے ہیں۔

رواں سال پاکستان سے صرف دو اسکول اس عالمی مقابلے کے لیے شارٹ لسٹ ہوئے، جن میں پنجاب کا ایک نجی اسکول اور سندھ کا یہ سرکاری اسکول شامل ہے۔ حیدرآباد کے اس سرکاری اسکول کی کامیابی اس بات کا ثبوت ہے کہ سرکاری تعلیمی ادارے بھی عالمی معیار کی تعلیم اور کمیونٹی سروس میں نمایاں کارکردگی دکھا سکتے ہیں۔

سندھ کے وزیر تعلیم سید سردار علی شاہ نے اس کامیابی پر اسکول کی پرنسپل، اساتذہ، طلبہ، والدین اور مقامی کمیونٹی کو مبارکباد دیتے ہوئے کہا کہ یہ کامیابی صرف ایک اسکول کی نہیں بلکہ پورے سندھ، پاکستان کے سرکاری تعلیمی نظام اور ملک کے لیے باعثِ فخر ہے۔

انہوں نے کہا کہ اس کامیابی سے یہ ثابت ہوتا ہے کہ اگر اساتذہ، طلبہ، والدین اور مقامی برادری مل کر کام کریں تو سرکاری اسکول بھی عالمی سطح پر نمایاں مقام حاصل کر سکتے ہیں۔

تعلیمی ماہرین کا کہنا ہے کہ اس طرح کی کامیابیاں نہ صرف پاکستان کے مثبت تشخص کو اجاگر کرتی ہیں بلکہ ملک میں معیاری تعلیم کے فروغ اور دیگر سرکاری اسکولوں کے لیے بھی حوصلہ افزا مثال بنتی ہیں۔