اڈیالہ جیل میں عمران خان سے ملاقات کا وقت ختم، کسی رہنما کو اجازت نہ ملی

عمران خان سے ملاقات کا وقت ختم، پی ٹی آئی رہنماؤں کو اڈیالہ جیل میں ملنے کی اجازت نہ ملی

راولپنڈی: اڈیالہ جیل میں قید سابق وزیراعظم اور بانی پاکستان تحریک انصاف (پی ٹی آئی) عمران خان سے ملاقات کا مقررہ وقت ختم ہوگیا، تاہم پارٹی کے کسی رہنما کو ان سے ملاقات کی اجازت نہیں مل سکی۔ ملاقات کے لیے آنے والے رہنما ڈھوکال ناکے کے قریب سے واپس روانہ ہوگئے۔

پی ٹی آئی رہنماؤں کے مطابق وہ پانچ افراد بانی پی ٹی آئی سے ملاقات کے لیے آئے تھے اور ان کے پاس ہائی کورٹ کا حکم بھی موجود تھا، اس کے باوجود انہیں ملاقات کی اجازت نہیں دی گئی۔

پارٹی رہنماؤں کا کہنا تھا کہ وہ عدالتی حکم کے تحت عمران خان سے ملاقات کے لیے پہنچے تھے، لیکن انہیں جیل میں داخلے یا ملاقات کی اجازت نہیں دی گئی۔

ملاقات کی فہرست میں شامل برکت اللہ ذاتی مصروفیات کے باعث نہیں آسکے، جبکہ دیگر رہنما ملاقات کیے بغیر واپس روانہ ہوگئے۔

پی ٹی آئی رہنماؤں نے کہا کہ وہ اس معاملے پر پہلے بھی توہین عدالت کی درخواست دائر کرچکے ہیں اور اب دوبارہ عدالت سے رجوع کریں گے۔

ان کا مؤقف ہے کہ عدالتی حکم کے باوجود ملاقات نہ ہونے پر قانونی کارروائی کی جائے گی۔ اس معاملے پر متعلقہ حکام کا مؤقف سامنے آنے کے بعد مزید تفصیلات واضح ہوسکیں گی۔