خانیوال: مال گاڑی کی بوگی پٹری سے اتر گئی

خانیوال میں سپیشل مال گاڑی کی بوگی پٹری سے اتر گئی، ٹرین سروس متاثر

خانیوال میں سپیشل مال گاڑی حادثے کا شکار ہوگئی جہاں سلیپر فیکٹری خانیوال کے لیے آئل لے جانے والی مال گاڑی کی ایک بوگی انڈر پاس کے قریب پٹری سے اتر گئی۔ واقعے کے بعد ریلوے حکام نے فوری طور پر امدادی کارروائیاں شروع کرتے ہوئے ٹریک کی بحالی کے لیے ملتان سے ریلیف ٹرین روانہ کردی، جبکہ ریسکیو ٹیمیں متاثرہ مقام پر بحالی کے آپریشن میں مصروف ہیں۔ بوگی کے پٹری سے اترنے کے باعث اپ ٹرین سروس عارضی طور پر معطل ہوگئی، جس سے اس روٹ پر ٹرینوں کی آمدورفت متاثر ہوئی ہے۔ حکام کے مطابق پٹری سے اترنے والی بوگی کو ہٹانے اور ریلوے ٹریک کی بحالی کا کام جاری ہے، جبکہ فراہم کردہ معلومات کے مطابق حادثے میں تاحال کسی جانی نقصان کی اطلاع نہیں ملی۔