این ڈی ایم اے کا الرٹ، 6 سے 10 جولائی تک ملک کے مختلف علاقوں میں موسلادھار بارشوں اور مقامی سیلاب کا خدشہ

این ڈی ایم اے کا الرٹ، 6 سے 10 جولائی تک ملک کے مختلف علاقوں میں موسلادھار بارشوں اور مقامی سیلاب کا خدشہ

اسلام آباد: نیشنل ڈیزاسٹر منیجمنٹ اتھارٹی (این ڈی ایم اے) نے ملک کے مختلف حصوں میں 6 سے 10 جولائی 2026 کے دوران گرج چمک کے ساتھ بارشوں، دریاؤں میں پانی کے بہاؤ میں اضافے اور پہاڑی علاقوں میں مقامی سیلاب کے خدشے کے پیش نظر الرٹ جاری کر دیا ہے۔

این ڈی ایم اے کے جاری کردہ اعلامیے کے مطابق نیشنل ایمرجنسیز آپریشن سینٹر (این ای او سی) نے 6 سے 10 جولائی تک کی موسمی صورتحال اور دریاؤں میں پانی کے بہاؤ کا تفصیلی جائزہ لیا ہے۔ ادارے کا کہنا ہے کہ ممکنہ خطرات کی پیشگی نشاندہی اور متعلقہ اداروں کو بروقت معلومات کی فراہمی یقینی بنائی جا رہی ہے۔

اعلامیے کے مطابق 6 جولائی سے شمالی پاکستان میں ایک فعال موسمی نظام داخل ہونے کا امکان ہے، جس کے باعث آزاد کشمیر، بالائی خیبرپختونخوا، اسلام آباد، پوٹھوہار اور شمال مشرقی پنجاب میں گرج چمک کے ساتھ بارشیں متوقع ہیں۔

این ڈی ایم اے نے بتایا کہ 7 سے 10 جولائی کے دوران دریائے سندھ، جہلم، چناب، راوی اور ستلج کے بالائی علاقوں میں وقفے وقفے سے بارش جبکہ بعض مقامات پر موسلادھار بارش کا امکان ہے۔ 7 جولائی کو اسلام آباد، پوٹھوہار، آزاد کشمیر، گلگت بلتستان، خیبرپختونخوا، شمالی پنجاب اور شمالی بلوچستان میں موسلادھار بارشوں کی شدت مزید بڑھنے کی توقع ہے۔

ادارے کے مطابق متوقع موسلادھار بارشوں کے باعث تربیلا اور منگلا ڈیم میں پانی کی آمد میں معمولی اضافہ ہو سکتا ہے، جبکہ 7 سے 10 جولائی کے دوران دریائے سندھ، جہلم، چناب، راوی اور ستلج میں پانی کے بہاؤ میں بھی معمولی اضافہ متوقع ہے۔ تاہم موجودہ صورتحال کے مطابق بڑے پیمانے پر دریائی سیلاب کا کوئی خطرہ نہیں۔

این ڈی ایم اے نے خبردار کیا ہے کہ پہاڑی ندی نالوں اور چھوٹے برساتی نالوں میں اچانک پانی کے بہاؤ میں اضافہ ہو سکتا ہے، جس کے باعث حساس بالائی علاقوں میں مقامی سیلاب کا خدشہ موجود ہے۔

اعلامیے میں مزید کہا گیا ہے کہ موسلادھار بارشوں کے دوران شہری علاقوں میں اربن فلڈنگ، نشیبی علاقوں کے زیر آب آنے، جبکہ خیبرپختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ اور مٹی کے تودے گرنے کے امکانات بھی موجود ہیں۔

این ڈی ایم اے نے تمام متعلقہ اداروں کو ہائی الرٹ رہنے کی ہدایت کرتے ہوئے شہریوں سے اپیل کی ہے کہ وہ غیر ضروری سفر سے گریز کریں، موسمی پیش گوئی اور سرکاری ہدایات پر عمل کریں اور تازہ ترین موسمی معلومات اور حفاظتی رہنمائی کے لیے این ڈی ایم اے کی ڈیزاسٹر الرٹ موبائل ایپ سے استفادہ کریں۔

🌧️ Pakistan Weather Forecast (05 July 2026)
Scattered rain, thunderstorms & strong winds are expected across northern Pakistan before spreading south by mid-week.
Stay updated and travel safely.#PakistanWeather #RainAlert #Monsoon2026 #WeatherForecast pic.twitter.com/86guj2muTs
— Pak Met Department محکمہ موسمیات (@pmdgov) July 5, 2026