پاکستان اور یورپی یونین شراکت داری مزید مضبوط بنانے پر متفق

اسحاق ڈار اور کایا کالاس کی ملاقات، پاکستان اور یورپی یونین نے تعاون بڑھانے کے عزم کا اعادہ

پاکستان اور یورپی یونین شراکت داری کو مزید مضبوط بنانے کے عزم کا اعادہ کرتے ہوئے دونوں فریقین نے اسٹریٹجک انگیجمنٹ پلان کے تحت سیاسی، اقتصادی اور علاقائی تعاون کو وسعت دینے پر اتفاق کیا۔

دفتر خارجہ کے مطابق نائب وزیراعظم اور وزیر خارجہ اسحاق ڈار نے فلپائن کے دارالحکومت منیلا میں منعقدہ 33 ویں آسیان ریجنل فورم کے موقع پر یورپی یونین کی خارجہ امور اور سلامتی پالیسی کی اعلیٰ نمائندہ اور یورپی کمیشن کی نائب صدر کایا کالاس سے ملاقات کی۔

ملاقات کے دوران دونوں رہنماؤں نے پاکستان اور یورپی یونین کے درمیان موجودہ تعلقات کا جائزہ لیا اور اس بات پر اتفاق کیا کہ اسٹریٹجک انگیجمنٹ پلان کے تحت مختلف شعبوں میں تعاون کو مزید وسعت دی جائے گی۔

کایا کالاس نے اپنے حالیہ دورۂ اسلام آباد اور پاکستان-یورپی یونین اسٹریٹجک ڈائیلاگ کے آٹھویں دور کو مثبت پیش رفت قرار دیتے ہوئے باہمی روابط کو مزید مضبوط بنانے میں دلچسپی کا اظہار کیا۔

اسحاق ڈار اور کایا کالاس کے درمیان ملاقات میں خطے اور دنیا کی موجودہ صورتحال پر بھی تفصیلی تبادلہ خیال ہوا۔ دونوں رہنماؤں نے اس بات پر زور دیا کہ علاقائی تنازعات کے حل، امن اور استحکام کے لیے سفارت کاری اور مذاکرات ہی مؤثر اور دیرپا راستہ ہیں۔

ملاقات میں امریکا اور ایران کے درمیان کشیدگی کے تناظر میں علاقائی سلامتی، عالمی توانائی کی منڈیوں، سمندری سلامتی، بین الاقوامی تجارت اور سپلائی چینز پر ممکنہ اثرات کا بھی جائزہ لیا گیا۔ دونوں رہنماؤں نے بین الاقوامی قوانین کی پاسداری اور مسلسل سفارتی رابطوں کی اہمیت پر زور دیا۔

نائب وزیراعظم اسحاق ڈار نے جی ایس پی پلس (GSP Plus) فریم ورک کے تحت بین الاقوامی کنونشنز پر مؤثر عمل درآمد کے لیے پاکستان کے عزم کا اعادہ کرتے ہوئے کہا کہ پاکستان یورپی یونین کے ساتھ اپنی اقتصادی شراکت داری کو انتہائی اہمیت دیتا ہے اور مستقبل میں تجارت اور سرمایہ کاری کے مواقع مزید بڑھانے کا خواہاں ہے۔

ملاقات میں سیاسی روابط، اقتصادی تعاون، تجارت، علاقائی استحکام اور دیگر باہمی دلچسپی کے شعبوں میں تعاون کو مزید فروغ دینے کے امکانات پر بھی تبادلہ خیال کیا گیا۔