بحیرہ عرب میں پاکستان نیوی کی بڑی کارروائی: 13 کروڑ ڈالر مالیت کی 2 ہزار کلو آئس برآمد، گزشتہ دو ماہ میں پی این کے جہازوں کی تیسری بڑی اور مسلسل کامیاب کارروائی
اسلام آباد (رئیس الاخبار) :— پاکستان نیوی نے بحیرہ عرب میں کامیاب کارروائی کرتے ہوئے تقریباً 13 کروڑ ڈالر مالیت کی 2 ہزار کلوگرام سے زائد میتھ ایمفیٹامین (آئس) برآمد کر لی۔ نیوی کی جانب سے جاری بیان میں کہا گیا کہ یہ آپریشن سمندر میں منشیات کی اسمگلنگ کے خلاف نیوی کے مضبوط عزم کی واضح مثال ہے۔
پاکستان نیوی کے مطابق پی این تبوک کمبائنڈ میری ٹائم فورس (CMF) کا حصہ ہونے کے ناطے سعودی قیادت میں قائم کمبائنڈ ٹاسک فورس 150 کی معاونت سے علاقائی سمندری سیکیورٹی گشت پر مامور تھا۔ گشت کے دوران عملے نے بحرِ عرب میں ایک مشکوک کشتی کو روکا، جس کے بعد بڑی انسدادِ منشیات کارروائی انجام دی گئی۔
ترجمان کے مطابق کشتی سے 2 ہزار کلوگرام سے زائد آئس برآمد کی گئی، جو گزشتہ دو ماہ میں پی این کے جہازوں کی تیسری بڑی اور مسلسل کامیاب کارروائی ہے۔
بیان میں کہا گیا کہ یہ کامیاب آپریشنز سمندری حدود میں غیر قانونی سرگرمیوں کے خلاف پاکستان نیوی کی پیشہ ورانہ مہارت، چوکسی اور غیر متزلزل وابستگی کا ثبوت ہیں۔ ساتھ ہی یہ کارروائیاں کمبائنڈ میری ٹائم فورس کے تحت بین الاقوامی تعاون کی مؤثریت کو بھی اجاگر کرتی ہیں۔
پاکستان نیوی نے اعادہ کیا کہ وہ قومی بحری مفادات کے تحفظ، اقوام متحدہ کے سمندری قوانین (UNCLOS) کی پاسداری اور عالمی سمندری سیکیورٹی کے لیے اپنا کردار ادا کرنے کے لیے پُرعزم ہے۔
رواں سال منشیات کی اسمگلنگ کے خلاف متعدد بحیرہ عرب میں پاکستان نیوی کی بڑی کارروائیاں کی گئیں۔ گزشتہ ماہ پی این یارموک نے بحیرہ عرب میں 97 کروڑ 20 لاکھ ڈالر مالیت کی منشیات پکڑی تھیں، جبکہ اگست میں نیوی اور اینٹی نارکوٹکس فورس (ANF) نے پسنی کے قریب 3 کروڑ 80 لاکھ ڈالر مالیت کی منشیات برآمد کی تھیں۔
Pakistan Navy Ship TABUK, while operating on Regional Maritime Security Patrol (RMSP) and in support of Saudi-led CTF-150 under HQ Combined Maritime Forces (CMF), intercepted a suspicious dhow operating in the Arabian Sea. Subsequently, the ship successfully conducted a major… pic.twitter.com/cXrDDkt8cE
— Pakistan Strategic Prism (@PakStratprism) November 19, 2025
