آج سے 3 جولائی تک پری مون سون بارشیں، گلیشیئر پگھلنے اور اچانک سیلاب کا خدشہ، الرٹ جاری
پری مون سون بارشوں کی پیشگوئی کے تحت محکمہ موسمیات نے آج سے 3 جولائی تک ملک کے مختلف علاقوں میں وقفے وقفے سے بارشوں کا امکان ظاہر کیا ہے، جبکہ این ڈی ایم اے نے شدید گرمی، گلیشیئر پگھلنے، فلیش فلڈ اور لینڈ سلائیڈنگ کے خدشات کے پیش نظر الرٹ جاری کر دیا ہے۔
محکمہ موسمیات کے مطابق یکم جولائی سے ملک میں باقاعدہ مون سون سیزن کا آغاز ہوگا، تاہم اس سے قبل پری مون سون سسٹم مختلف علاقوں کو متاثر کرے گا۔
لاہور کا موسم
لاہور میں فی الحال بارش کا امکان کم ہے۔ شہر میں موسم گرم اور مطلع جزوی طور پر صاف رہنے کی توقع ہے۔ زیادہ سے زیادہ درجہ حرارت 40 جبکہ کم سے کم 32 ڈگری سینٹی گریڈ رہنے کا امکان ہے۔ ہوا تقریباً 8 کلومیٹر فی گھنٹہ کی رفتار سے چلے گی جبکہ نمی کا تناسب 63 فیصد ریکارڈ کیا گیا ہے۔
کراچی کا موسم
کراچی میں موسم گرم اور جزوی ابر آلود رہے گا۔ وقفے وقفے سے سمندری ہوائیں چلنے کا امکان ہے۔ زیادہ سے زیادہ درجہ حرارت 36 ڈگری سینٹی گریڈ تک جا سکتا ہے جبکہ موجودہ درجہ حرارت 30 ڈگری سینٹی گریڈ ریکارڈ کیا گیا۔ نمی کا تناسب 72 فیصد اور مغربی سمت سے 20 کلومیٹر فی گھنٹہ کی رفتار سے ہوائیں چلنے کی توقع ہے۔
اسلام آباد کا موسم
وفاقی دارالحکومت اسلام آباد میں شدید گرمی برقرار رہے گی جہاں زیادہ سے زیادہ درجہ حرارت 41 ڈگری سینٹی گریڈ تک پہنچ سکتا ہے۔ صبح کے وقت درجہ حرارت 29 ڈگری ریکارڈ کیا گیا جبکہ دن بھر موسم گرم اور خشک رہنے کی پیشگوئی ہے۔
کن علاقوں میں بارش متوقع؟
محکمہ موسمیات کے مطابق:
- گلگت بلتستان
- آزاد کشمیر
- بالائی خیبرپختونخوا
- ہنزہ
- نگر
- غذر
- اسکردو
- شگر
- گانچھے
- کھرمنگ
- استور
- دیامر
- اپر و لوئر چترال
- سوات
میں مختلف اوقات میں بارشوں کا امکان ہے۔
این ڈی ایم اے کا الرٹ
این ڈی ایم اے کے مطابق شدید گرمی اور متوقع بارشوں کے باعث شمالی علاقوں میں گلیشیئر تیزی سے پگھل سکتے ہیں، جس سے:
- فلیش فلڈ
- گلیشیائی جھیل پھٹنے (GLOF)
- لینڈ سلائیڈنگ
- دریا اور ندی نالوں میں پانی کی سطح اچانک بلند ہونےکا خدشہ موجود ہے
این ڈی ایم اے نے شہریوں، سیاحوں اور مسافروں کو ہدایت کی ہے کہ:
- غیر ضروری سفر سے گریز کریں۔
- دریا، ندی نالوں اور گلیشیائی جھیلوں کے قریب جانے سے احتراز کریں۔
- موسم کی تازہ صورتحال پر نظر رکھیں۔
- کسی بھی ہنگامی صورتحال میں مقامی انتظامیہ سے فوری رابطہ کریں۔
صوبائی ڈیزاسٹر مینجمنٹ اتھارٹیز کو بھی ممکنہ ہنگامی صورتحال سے نمٹنے کے لیے ہائی الرٹ رہنے کی ہدایت جاری کر دی گئی ہے۔
READ MORE FAQS
- پری مون سون بارشیں کب تک جاری رہیں گی؟
محکمہ موسمیات کے مطابق آج سے 3 جولائی تک مختلف علاقوں میں وقفے وقفے سے بارش کا امکان ہے۔
- مون سون بارشوں کا باقاعدہ آغاز کب ہوگا؟
یکم جولائی سے ملک میں مون سون بارشوں کا باقاعدہ آغاز متوقع ہے۔
- کن علاقوں میں زیادہ خطرہ ہے؟
گلگت بلتستان، آزاد کشمیر، سوات، چترال، دیامر، ہنزہ، نگر اور دیگر شمالی علاقوں میں فلیش فلڈ اور لینڈ سلائیڈنگ کا خدشہ زیادہ ہے۔
- این ڈی ایم اے نے کیا ہدایات جاری کی ہیں؟
شہریوں کو دریا، ندی نالوں اور گلیشیائی علاقوں سے دور رہنے، غیر ضروری سفر سے گریز کرنے اور موسمی اپ ڈیٹس پر نظر رکھنے کی ہدایت کی گئی ہے۔
