سمر کیمپ 2026: ڈی جی آئی ایس پی آر کی طلبہ سے خصوصی نشست، قومی سلامتی پر اہم گفتگو

ڈی جی آئی ایس پی آر کا سمر کیمپ 2026 کے طلبہ و طالبات سے مکالمہ، قومی سلامتی اور دہشت گردی پر آگاہی

سمر کیمپ 2026 کے تحت ڈی جی آئی ایس پی آر نے ملک بھر سے شریک طلبہ و طالبات کے ساتھ ایک خصوصی نشست کا انعقاد کیا، جس میں قومی سلامتی، دہشت گردی، غلط معلومات کے پھیلاؤ اور پاکستان کو درپیش داخلی و خارجی چیلنجز پر تفصیلی گفتگو کی گئی۔

آئی ایس پی آر کے مطابق سمر کیمپ 2026 میں پاکستان کے 18 سے زائد شہروں سے نویں سے بارہویں جماعت تک کے 4 ہزار سے زائد طلبہ و طالبات شریک ہیں۔ اس پروگرام کا مقصد نوجوان نسل میں قومی شعور کو فروغ دینا، انہیں قومی امور سے آگاہ کرنا اور ان کی قائدانہ صلاحیتوں کو نکھارنا ہے۔

خصوصی نشست کے دوران طلبہ و طالبات کو ملک کی موجودہ سیکیورٹی صورتحال، دہشت گردی کے خطرات اور قومی یکجہتی کی اہمیت سے متعلق آگاہ کیا گیا۔ شرکاء کو بتایا گیا کہ قومی سلامتی کے چیلنجز سے نمٹنے کے لیے ریاستی ادارے مسلسل کردار ادا کر رہے ہیں جبکہ نوجوانوں کا مثبت کردار بھی انتہائی اہمیت کا حامل ہے۔

طلبہ و طالبات نے اس موقع پر اپنے خیالات کا اظہار کرتے ہوئے کہا کہ انہیں پاکستان کو درپیش داخلی اور بیرونی سیکیورٹی چیلنجز کے بارے میں مؤثر معلومات حاصل ہوئیں۔ ان کا کہنا تھا کہ سیشن کے دوران انہیں دہشت گردی کے مختلف پہلوؤں اور ملک دشمن عناصر کی سرگرمیوں کے حوالے سے بھی آگاہی دی گئی۔

شرکاء نے اس امر پر زور دیا کہ موجودہ ڈیجیٹل دور میں غلط معلومات، افواہوں اور پروپیگنڈا مہمات کا پھیلاؤ ایک بڑا چیلنج بن چکا ہے۔ انہوں نے کہا کہ نوجوانوں کو مستند معلومات تک رسائی اور حقائق کی جانچ پڑتال کے حوالے سے آگاہی دینا وقت کی اہم ضرورت ہے۔

طلبہ و طالبات نے اس عزم کا اظہار بھی کیا کہ وہ ملک میں امن، استحکام اور ترقی کے لیے اپنا مثبت کردار ادا کریں گے اور دہشت گردی کے خلاف قومی یکجہتی کو فروغ دینے میں اپنا حصہ ڈالیں گے۔

آئی ایس پی آر کے مطابق سمر کیمپ 2026 نوجوانوں کو قومی معاملات سے جوڑنے اور ان میں ذمہ دار شہری ہونے کا شعور اجاگر کرنے کی ایک اہم کوشش ہے۔ پروگرام کے ذریعے نوجوان نسل کو نہ صرف سیکھنے کے مواقع فراہم کیے جا رہے ہیں بلکہ انہیں پاکستان کے روشن مستقبل کی تعمیر میں اپنا کردار ادا کرنے کی ترغیب بھی دی جا رہی ہے۔