ٹک ٹاکر شمسو بی بی عرف عائشہ گلامنہ کے قتل کا معمہ حل، والد اور بھائی سمیت 5 ملزمان گرفتار

ٹک ٹاکر شمسو بی بی عرف عائشہ گلامنہ کے قتل کا معمہ حل، والد اور بھائی سمیت 5 ملزمان گرفتار، ی آپریشنز طارق محبوب نے بتایا کہ ٹک ٹاکر کو غیرت کے نام پر قتل کیا گیا

راولپنڈی: ایس ایس پی آپریشنز طارق محبوب نے دعویٰ کیا ہے کہ ٹیکسلا میں ٹک ٹاکر شمسو بی بی عرف عائشہ گلامنہ کے قتل کا معمہ حل کرلیا گیا ہے، پولیس نے والد اور بھائی سمیت 5 ملزمان کو گرفتار کرلیا۔

راولپنڈی میں پریس کانفرنس کرتے ہوئے ایس ایس پی آپریشنز طارق محبوب نے بتایا کہ ٹک ٹاکر عائشہ گلامنہ کو مبینہ طور پر غیرت کے نام پر قتل کیا گیا۔

انہوں نے بتایا کہ واقعے میں مقتولہ کے والد اور بھائی کے علاوہ اس کے چچا اور کزن بھی مبینہ طور پر ملوث ہیں۔ پولیس نے مجموعی طور پر 5 ملزمان کو گرفتار کیا ہے۔

تقریب میں شرکت پر قتل کا الزام

ایس ایس پی آپریشنز کے مطابق ابتدائی تحقیقات میں سامنے آیا ہے کہ عائشہ گلامنہ کو ایک تقریب میں شرکت کرنے پر مبینہ طور پر منصوبہ بندی کے تحت قتل کیا گیا۔

انہوں نے کہا کہ پولیس نے جدید ٹیکنالوجی، سی سی ٹی وی کیمروں اور دیگر شواہد کی مدد سے ملزمان تک رسائی حاصل کی اور انہیں گرفتار کیا۔

پولیس کے مطابق گرفتار ملزمان میں مقتولہ ٹک ٹاکر شمسو بی بی کا والد، بھائی، چچا اور چچا زاد بھائی کا بیٹا بھی شامل ہیں، جبکہ پانچویں ملزم کی شناخت بھی تفتیش کے دوران سامنے آئی ہے۔

14 اگست کو فائرنگ کا واقعہ

ٹک ٹاکر شمسو بی بی عرف عائشہ گلامنہ کو 14 اگست کی شام ٹیکسلا کے علاقے میں فائرنگ کرکے قتل کردیا گیا تھا۔ فائرنگ کے نتیجے میں عائشہ موقع پر ہی جاں بحق ہوگئی تھیں، جبکہ ان کی بہن اور بھائی بھی شدید زخمی ہوئے تھے۔

واقعے کے فوری بعد تھانہ ٹیکسلا پولیس نے قتل اور اقدام قتل کی دفعات کے تحت مقدمہ درج کرکے تحقیقات شروع کردی تھیں۔

پولیس نے واقعے کی تحقیقات کے دوران جائے وقوعہ سے شواہد اکٹھے کیے اور سی سی ٹی وی فوٹیج سمیت جدید ٹیکنالوجی کی مدد سے مشتبہ افراد کا سراغ لگایا۔

ایس ایس پی آپریشنز کا کہنا ہے کہ گرفتار ملزمان سے مزید تفتیش جاری ہے، جبکہ واقعے کے تمام پہلوؤں کا جائزہ لیا جا رہا ہے۔

راولپنڈی پولیس کی سوشل میڈیا پرسنیلٹی شمسو بی بی عرف عائشہ گلامنہ کے قتل کیس میں بڑی   کامیابی، قتل کے مقدمے کا ڈراپ سین، سوشل میڈیا پرسنیلٹی کا اندھا قتل ٹریس، مقتولہ کے والد اور بھائی سمیت 5 ملزمان گرفتار، گرفتار ملزمان میں مقتولہ کا والد،حقیقی بھائی،چچا زاد بھائی،والد کا چچا اور pic.twitter.com/1SAyzJZHKD
— Rawalpindi Police (@RwpPolice) August 22, 2026