علیمہ خان کا عمران خان سے ملاقات نہ کروانے پر سپرنٹنڈنٹ اڈیالہ کے خلاف توہین عدالت کی درخواست

علیمہ خان کا عمران خان سے ملاقات نہ کروانے پر سپرنٹنڈنٹ اڈیالہ کے خلاف توہین عدالت کی درخواست، درخواست میں اڈیالہ جیل کے سپرنٹنڈنٹ عبدالغفور انجم، بیرونی تھانہ کے ایس ایچ او، وفاقی سیکریٹری داخلہ اور پنجاب ہوم ڈیپارٹمنٹ کے سیکریٹری فریق

اسلام آباد (رئیس الاخبار) :— پاکستان تحریک انصاف کے بانی چیئرمین عمران خان کی بہن علیمہ خان نے اڈیالہ جیل میں ملاقات نہ کروانے پر سپرنٹنڈنٹ اڈیالہ اور دیگر حکام کے خلاف اسلام آباد ہائیکورٹ میں توہینِ عدالت کی درخواست دائر کر دی ہے۔ درخواست میں مؤقف اپنایا گیا ہے کہ عدالت کے واضح حکم کے باوجود عمران خان کی ہفتے میں دو مرتبہ ملاقاتوں کا شیڈول بحال نہیں کیا گیا۔

علیمہ خان کی سپرنٹنڈنٹ اڈیالہ کے خلاف توہین عدالت درخواست ایسے وقت میں دائر کی گئی ہے جب خیبرپختونخوا کے وزیراعلیٰ سہیل آفریدی، دیگر پی ٹی آئی رہنماؤں کے ہمراہ اڈیالہ جیل کے باہر مسلسل آٹھویں بار ملاقات نہ ہونے کے خلاف دھرنا دیے بیٹھے تھے۔ جمعرات کو ایک بار پھر انہیں عمران خان سے ملاقات کی اجازت نہ مل سکی، جس کے بعد وزیراعلیٰ آفریدی نے اسلام آباد ہائیکورٹ سے رجوع کا اعلان کیا۔

اس سے قبل عمران خان کی بہنوں، بشمول علیمہ خان، نے بھی راولپنڈی میں اڈیالہ جیل کے باہر دھرنا دیا تھا جب انہیں اپنے بھائی سے ملاقات کی اجازت نہیں ملی تھی۔ پی ٹی آئی نے اپنا تازہ ترین احتجاج جمعہ کی صبح ختم کیا، تاہم قانونی کارروائی کا سلسلہ جاری رکھنے کا اعلان کیا گیا۔

علیمہ خان کی جانب سے دائر درخواست میں اڈیالہ جیل کے سپرنٹنڈنٹ عبدالغفور انجم، صدر بیرونی تھانہ کے ایس ایچ او راجا اعزاز عظیم، وفاقی سیکریٹری داخلہ کیپٹن (ر) محمد خرم آغا اور پنجاب ہوم ڈیپارٹمنٹ کے سیکریٹری نورالامین کو فریق بنایا گیا ہے۔

سپرنٹنڈنٹ اڈیالہ کے خلاف توہین عدالت میں مؤقف اختیار کیا گیا کہ علیمہ خان اپنے بھائی کی فلاح و بہبود، قانونی حقوق اور قید کے دوران مناسب انسانی سلوک کے حوالے سے شدید تشویش کا شکار ہیں۔ درخواست میں اسلام آباد ہائیکورٹ کے 24 مارچ کے حکم کا بھی حوالہ دیا گیا، جس میں عمران خان کے لیے ہفتے میں دو ملاقاتوں کا شیڈول بحال کرنے کی ہدایت کی گئی تھی۔

سپرنٹنڈنٹ اڈیالہ کے خلاف توہین عدالت میں کہا گیا کہ عدالت کے واضح اور غیر مبہم حکم کے باوجود حکام نے متعدد مواقع پر نہ صرف علیمہ خان بلکہ عمران خان کے وکلا اور دیگر اہل خانہ کو بھی ملاقات کی اجازت دینے سے انکار کیا، جو واضح حکم عدولی کے مترادف ہے۔

مزید کہا گیا کہ اڈیالہ جیل کے سپرنٹنڈنٹ کے مسلسل عدم تعاون اور سیاسی بنیادوں پر انتقامی اقدامات کے باعث عمران خان اور پی ٹی آئی قیادت کو بارہا عدالت سے رجوع کرنا پڑ رہا ہے تاکہ ملاقات کے آئینی اور قانونی حق کو حاصل کیا جا سکے۔

علیمہ خان نے عدالت سے استدعا کی ہے کہ عدالت کے حکم پر جان بوجھ کر عمل درآمد نہ کرنے پر متعلقہ حکام کے خلاف توہینِ عدالت کی کارروائی عمل میں لائی جائے۔

”باہر نکل کر پاکستانیوں سے پوچھ لیں، اگر عمران خان کے بال کو بھی نقصان پہنچا، تو اِن میں سے کوئی بھی نہیں بچے گا۔“
علیمہ خان#NationWorriedForImranKhan pic.twitter.com/FkJkgdM2AN
— PTI Islamabad (@PTIOfficialISB) November 28, 2025