پشاور : چیف جسٹس پشاور ہائیکورٹ عتیق شاہ نے مخصوص نشستوں پر اراکین کا حلف لینے کیلیے گورنر فیصل کریم کنڈی کو نامزد کر دیا۔
الیکشن کمیشن نے چیف جسٹس ہائیکورٹ عتیق شاہ کو اراکین سے حلف لینے کیلیے کسی کو نامزد کرنے کا خط لکھا تھا۔ چیف جسٹس آرٹیکل 255 (2) کے تحت کسی بھی ممبران سے حلف لینے کیلیے نامزد کر سکتے ہیں۔
پشاور ہائیکورٹ کی جانب سے جاری اعلامیے میں بتایا گیا کہ جتنا جلد ممکن ہو گورنر خیبر پختونخوا فیصل کریم کنڈی اراکین سے حلف لیں۔
گورنر فیصل کریم کنڈی نےایک نجی چینل سے گفتگو میں کہا کہ پشاور ہائیکورٹ کے حکم کے بعد میٹنگ کال کی ہے، کوشش ہے آج یا کل مخصوص نشستوں کے ارکان سےحلف لے لیں۔
فیصل کریم کنڈی نے کہا کہ حلف برداری ہوجائے گی اور کل سینیٹ الیکشن بھی ہو جائے گا، 2008 میں بھی ہارس ٹریڈنگ روکنے کیلیے بلامقابلہ الیکشن کرائے تھے۔
انہوں نے کہا کہ اگر ان کے امیدوار بات نہیں مان رہے تو ایم پی اے کیسے مانیں گے، مقابلہ ہوا تو کوشش کرینگے 5 کے بجائے 6 سینیٹ نشستیں جیتیں۔
ان کا کہنا تھا کہ کےپی کے مخصوص نشستوں کے ارکان سے آج یا کل حلف ہوجائےگا، سینیٹ الیکشن کل اپنے وقت پر ہوگا، ہائیکورٹ کے آرڈر کے بعد کسی بھی وقت حلف لے سکتا ہوں، سینیٹ الیکشن سے پہلے مخصوص نشستوں کے ارکان سےحلف لے لوں گا۔
