یکم سے 3 فروری: مری، گلیات اور پوٹھوہار میں بارش و برفباری کا امکان، ادارے الرٹ
پنجاب ڈیزاسٹر مینجمنٹ اتھارٹی (پی ڈی ایم اے) پنجاب نے صوبے کے بالائی علاقوں میں متوقع بارشوں اور برفباری کے پیش نظر الرٹ جاری کر دیا ہے۔ پی ڈی ایم اے کے مطابق یکم فروری سے 3 فروری تک پنجاب کے مختلف بالائی علاقوں میں بارشوں اور بعض مقامات پر شدید برفباری کا امکان ہے، جس کے باعث شہریوں، سیاحوں اور متعلقہ اداروں کو پیشگی حفاظتی اقدامات اختیار کرنے کی ہدایت کی گئی ہے۔
پی ڈی ایم اے پنجاب کے ترجمان کے مطابق محکمہ موسمیات کی پیش گوئی کے تحت مری، گلیات اور ان کے گرد و نواح میں بارش کے ساتھ برفباری متوقع ہے، جو بعض مقامات پر شدید ہو سکتی ہے۔ اسی طرح پوٹھوہار ریجن، سیالکوٹ، نارووال، گجرات اور گوجرانوالہ میں بھی وقفے وقفے سے بارش ہونے کا امکان ظاہر کیا گیا ہے۔ ان موسمی حالات کے باعث بالائی علاقوں میں پھسلن، حدِ نگاہ میں کمی اور ٹریفک کی روانی متاثر ہونے کا خدشہ ہے۔
ڈائریکٹر جنرل پی ڈی ایم اے پنجاب عرفان علی کاٹھیا نے بتایا کہ وزیر اعلیٰ پنجاب کی خصوصی ہدایات کی روشنی میں تمام متعلقہ اداروں کو الرٹ جاری کر دیا گیا ہے۔ لوکل گورنمنٹ، محکمہ صحت، ریسکیو 1122، پنجاب پولیس اور محکمہ ٹرانسپورٹ کو ہدایت کی گئی ہے کہ وہ کسی بھی ہنگامی صورتحال سے نمٹنے کے لیے مکمل طور پر تیار رہیں اور اپنے اپنے دائرہ اختیار میں پیشگی انتظامات کو یقینی بنائیں۔
ڈی جی پی ڈی ایم اے کے مطابق تمام اضلاع کے ایمرجنسی کنٹرول رومز میں عملے کو 24 گھنٹے الرٹ رکھا جائے گا تاکہ کسی بھی ناخوشگوار واقعے کی صورت میں فوری ردعمل ممکن بنایا جا سکے۔ انہوں نے کہا کہ ضلعی انتظامیہ کو ہدایت کی گئی ہے کہ وہ حساس علاقوں کی مسلسل نگرانی کریں، بالخصوص پہاڑی علاقوں میں لینڈ سلائیڈنگ، سڑکوں کی بندش اور برف جمع ہونے جیسے خدشات کے پیش نظر مشینری اور عملے کو تیار رکھیں۔
عرفان علی کاٹھیا نے مری آنے والے سیاحوں کو خصوصی طور پر احتیاطی تدابیر اختیار کرنے کی ہدایت کی ہے۔ ان کا کہنا تھا کہ مری اور اس کے اطراف میں برفباری کے پیش نظر ضلعی انتظامیہ اور تمام متعلقہ ادارے مکمل طور پر الرٹ ہیں۔ سیاحوں کی سہولت اور رہنمائی کے لیے مری میں مختلف مقامات پر فسیلیٹیشن سینٹرز قائم کیے گئے ہیں جہاں سے بروقت معلومات، رہنمائی اور ہنگامی مدد فراہم کی جا رہی ہے۔
ڈی جی پی ڈی ایم اے نے شہریوں اور سیاحوں کو مشورہ دیا ہے کہ وہ غیر ضروری سفر سے گریز کریں، خاص طور پر پہاڑی علاقوں میں سفر سے قبل موسم اور سڑکوں کی صورتحال سے مکمل آگاہی حاصل کریں۔ گاڑی چلاتے وقت تیز رفتاری سے پرہیز کریں اور اچانک بریک لگانے سے اجتناب کریں کیونکہ برف اور بارش کے باعث سڑکیں پھسلن کا شکار ہو سکتی ہیں۔ گاڑیوں میں چین، اضافی ایندھن، گرم کپڑے اور ہنگامی سامان ساتھ رکھنے کی بھی ہدایت کی گئی ہے۔
محکمہ صحت کو ہدایت دی گئی ہے کہ وہ ہسپتالوں اور بنیادی مراکز صحت میں ایمرجنسی سہولیات کو فعال رکھیں جبکہ ریسکیو 1122 کو کسی بھی ممکنہ حادثے یا ایمرجنسی کی صورت میں فوری رسپانس کے لیے الرٹ رکھا گیا ہے۔ پنجاب پولیس کو ٹریفک مینجمنٹ، سڑکوں کی نگرانی اور شہریوں کی رہنمائی کے لیے اضافی نفری تعینات کرنے کی ہدایت دی گئی ہے۔
ڈی جی پی ڈی ایم اے نے کہا کہ عوام الناس جاری کردہ احتیاطی تدابیر پر عمل کریں اور افواہوں پر کان نہ دھریں بلکہ صرف مستند ذرائع سے موصول ہونے والی معلومات پر ہی اعتماد کریں۔ کسی بھی ہنگامی صورتحال میں شہری پی ڈی ایم اے کی ہیلپ لائن 1129 پر فوری رابطہ کریں تاکہ بروقت مدد فراہم کی جا سکے۔
پی ڈی ایم اے پنجاب کا کہنا ہے کہ موسمی صورتحال پر مسلسل نظر رکھی جا رہی ہے اور اگر حالات میں کوئی تبدیلی آتی ہے تو عوام کو بروقت آگاہ کیا جائے گا۔ ادارے کی جانب سے اس عزم کا اظہار کیا گیا ہے کہ شہریوں کی جان و مال کے تحفظ کے لیے تمام ممکنہ اقدامات کیے جا رہے ہیں اور کسی بھی ممکنہ خطرے سے نمٹنے کے لیے ادارے ہمہ وقت تیار ہیں۔
آخر میں ڈی جی پی ڈی ایم اے عرفان علی کاٹھیا نے عوام سے اپیل کی کہ وہ ذمہ دار شہری ہونے کا ثبوت دیں، احتیاطی تدابیر پر عمل کریں اور متعلقہ اداروں کے ساتھ تعاون کریں تاکہ کسی بھی ناخوشگوار صورتحال سے بچا جا سکے اور موسم سرما کے اس سلسلے کو محفوظ انداز میں گزارا جا سکے۔
One Response