پی ٹی سی ایل پنشنرز کیس: سپریم کورٹ کے فیصلے کے خلاف ہمارا دو رکنی بینچ ہی کافی ہے، وفاقی آئینی عدالت

پی ٹی سی ایل پنشنرز کیس: بڑا بینچ ضروری نہیں، دو رکنی بینچ ہی کافی ہے، اس حوالے سے متعدد نظائر اور فیصلے موجود ہیں ، وفاقی آئینی عدالت

اسلام آباد: وفاقی آئینی عدالت نے پی ٹی سی ایل پنشنرز کیس کی سماعت کے دوران اہم ریمارکس دیتے ہوئے واضح کیا ہے کہ سپریم کورٹ کے فیصلے کے خلاف مقدمے کی سماعت کے لیے بڑے بینچ کی تشکیل ضروری نہیں، بلکہ دو رکنی بینچ بھی اس نوعیت کے مقدمات کی سماعت کا مکمل اختیار رکھتا ہے۔

چیف جسٹس وفاقی آئینی عدالت جسٹس امین الدین خان کی سربراہی میں دو رکنی بینچ نے پی ٹی سی ایل پنشنرز کیس کی سماعت کی۔ سماعت کے دوران سابق جج شوکت عزیز صدیقی ملازمین کے وکیل کے طور پر عدالت میں پیش ہوئے اور مؤقف اختیار کیا کہ اس مقدمے میں سپریم کورٹ کا تین رکنی بینچ پہلے ہی فیصلہ دے چکا ہے، لہٰذا موجودہ کیس کی سماعت کے لیے بھی بڑے بینچ کی ضرورت ہے۔

اس پر چیف جسٹس امین الدین خان نے ریمارکس دیتے ہوئے کہا کہ وفاقی آئینی عدالت کے پاس اس حوالے سے متعدد نظائر اور فیصلے موجود ہیں جن کے مطابق دو رکنی بینچ اس نوعیت کے مقدمات کی سماعت کے لیے کافی ہے۔

چیف جسٹس نے مزید کہا کہ فریقین اس حوالے سے کسی قسم کی تشویش میں مبتلا نہ ہوں کیونکہ موجودہ دو رکنی بینچ مکمل قانونی اختیار کے ساتھ کیس کی سماعت کر رہا ہے۔

بعد ازاں عدالت نے پی ٹی سی ایل ملازمین اور پنشنرز سے متعلق تمام زیر التوا مقدمات کو یکجا کرتے ہوئے کیس کی سماعت غیر معینہ مدت تک ملتوی کر دی۔

قانونی ماہرین کے مطابق عدالت کے یہ ریمارکس مستقبل میں اسی نوعیت کے مقدمات میں بینچ کی تشکیل سے متعلق قانونی ابہام کو دور کرنے میں معاون ثابت ہو سکتے ہیں۔