سربیا کے صدر الیکساندر ووچچ نے استعفے کا اعلان کر دیا، آئندہ چند ہفتوں میں عہدہ چھوڑ دیں گے

سربیا کے صدر الیکساندر ووچچ کے استعفے کا اعلان، قبل از وقت انتخابات کی تجویز

سربیا کے صدر الیکساندر ووچچ کا استعفیٰ ملکی سیاست میں ایک بڑی پیش رفت قرار دیا جا رہا ہے۔ صدر الیکساندر ووچچ نے اعلان کیا ہے کہ وہ آئندہ چند ہفتوں میں اپنے عہدے سے مستعفی ہو جائیں گے۔

غیر ملکی میڈیا رپورٹس کے مطابق صدر ووچچ نے دارالحکومت بیلگریڈ میں اپنے حامیوں کے ایک بڑے جلسے سے خطاب کرتے ہوئے کہا کہ وہ چند ہفتے مزید صدر کے منصب پر رہیں گے، جس کے بعد اپنے عہدے سے الگ ہو جائیں گے۔

تاہم انہوں نے اپنے استعفے کی حتمی تاریخ یا پارلیمنٹ تحلیل کرنے کے حوالے سے کوئی واضح ٹائم لائن نہیں دی۔

یہ اعلان ایسے وقت میں سامنے آیا ہے جب سربیا گزشتہ تقریباً 18 ماہ سے سیاسی بحران اور حکومت مخالف مظاہروں کا سامنا کر رہا ہے۔ یہ احتجاج نومبر 2024 میں نووی ساد کے ریلوے اسٹیشن پر پیش آنے والے حادثے کے بعد شدت اختیار کر گئے تھے، جس میں 16 افراد ہلاک ہوئے تھے۔

اس حادثے کے بعد حکومت کو شدید عوامی تنقید اور اپوزیشن کے مسلسل دباؤ کا سامنا رہا، جس کے باعث سیاسی صورتحال مزید کشیدہ ہوتی گئی۔

اپنے خطاب میں صدر ووچچ نے اس امید کا اظہار کیا کہ ان کی جماعت سربین پروگریسو پارٹی آئندہ انتخابات میں کامیابی حاصل کرے گی۔ انہوں نے کہا کہ استعفے کے بعد بھی وہ اپنی جماعت کی مکمل حمایت جاری رکھیں گے۔

صدر ووچچ نے قبل از وقت انتخابات کرانے کی تجویز بھی پیش کی، جسے سیاسی حلقے مستقبل کی حکمت عملی کا حصہ قرار دے رہے ہیں۔

سیاسی تجزیہ کاروں کے مطابق اگرچہ الیکساندر ووچچ صدارت چھوڑ رہے ہیں، تاہم مستقبل میں وزیر اعظم کے منصب پر واپسی کا امکان موجود ہے، جس کے ذریعے وہ ملکی سیاست میں اپنا اثر برقرار رکھ سکتے ہیں۔

دوسری جانب اپوزیشن جماعتوں اور طلبہ تحریکوں نے اعلان کیا ہے کہ وہ آئندہ انتخابات میں بھرپور حصہ لیں گے اور حکمران جماعت کو سخت مقابلہ دیں گے۔

سربیا کی آنے والی سیاسی صورتحال اب قبل از وقت انتخابات، نئی حکومت کی تشکیل اور سیاسی اتحادوں پر منحصر ہوگی، جس پر بین الاقوامی مبصرین بھی گہری نظر رکھے ہوئے ہیں۔