ملک میں مون سون بارشوں کا پہلا اسپیل کل سے، کئی علاقوں میں سیلاب اور لینڈ سلائیڈنگ کا خدشہ

ملک میں مون سون بارشیں شروع، محکمہ موسمیات نے سیلابی صورتحال کا الرٹ جاری کیا

ملک میں مون سون بارشیں کل سے شروع ہونے کا امکان ہے، جبکہ محکمہ موسمیات اور این ڈی ایم اے نے مختلف علاقوں میں شدید بارش، اربن فلڈنگ، لینڈ سلائیڈنگ اور مقامی سیلاب کے خدشے کے پیش نظر الرٹ جاری کر دیا ہے۔

محکمہ موسمیات کے مطابق یکم سے 6 جولائی کے دوران اسلام آباد، راولپنڈی، مری، گلیات، لاہور، گوجرانوالہ، سیالکوٹ، نارووال، گجرات، جہلم، چکوال اور اٹک میں وقفے وقفے سے بارش متوقع ہے۔

شمال مشرقی پنجاب اور خطہ پوٹھوہار میں بعض مقامات پر موسلادھار بارش کے باعث شہری علاقوں میں اربن فلڈنگ کا خدشہ ظاہر کیا گیا ہے، جبکہ جنوبی پنجاب کے ملتان، بہاولپور، بہاولنگر، لودھراں، خانیوال، مظفرگڑھ، ڈی جی خان، راجن پور، لیہ، بھکر اور میانوالی میں 3 سے 5 جولائی کے دوران بارش کا امکان ہے۔

خیبرپختونخوا کے بالائی اضلاع، خصوصاً دیر، سوات، چترال، کوہستان، مانسہرہ، ایبٹ آباد، بٹگرام اور شانگلہ میں شدید بارش کے ساتھ مقامی ندی نالوں میں طغیانی کا خدشہ ہے۔

گلگت بلتستان اور آزاد کشمیر کے پہاڑی علاقوں میں شدید بارش کے باعث لینڈ سلائیڈنگ اور مقامی سیلاب کا خطرہ ظاہر کیا گیا ہے، جبکہ بلوچستان کے شمالی اضلاع میں بھی گرج چمک کے ساتھ بارش کی پیشگوئی کی گئی ہے۔

سندھ کے لاڑکانہ، سکھر، جیکب آباد، دادو، کشمور، گھوٹکی، شکارپور، خیرپور، شہید بینظیر آباد اور نوشہرو فیروز میں 3 اور 4 جولائی کو بارش متوقع ہے۔

محکمہ موسمیات اور این ڈی ایم اے نے شہریوں کو ہدایت کی ہے کہ موسلادھار بارش کے دوران نشیبی علاقوں، انڈر پاسز، برساتی نالوں اور دریا کے کناروں کے قریب غیر ضروری نقل و حرکت سے گریز کریں اور مقامی انتظامیہ کی ہدایات پر عمل کریں۔