آزاد کشمیر انتخابات: میرپور ڈویژن کے 13 حلقوں میں پولنگ شروع

آزاد کشمیر انتخابات کے پہلے مرحلے کا آغاز، میرپور ڈویژن کے 3 اضلاع میں ووٹنگ جاری

آزاد کشمیر انتخابات کے پہلے مرحلے کا باقاعدہ آغاز ہوگیا ہے، جہاں میرپور ڈویژن کے تین اضلاع میرپور، کوٹلی اور بھمبر کے 13 انتخابی حلقوں میں ووٹرز اپنے حقِ رائے دہی کا استعمال کر رہے ہیں۔ پولنگ صبح 8 بجے شروع ہوئی جو بغیر کسی وقفے کے شام 5 بجے تک جاری رہے گی۔

الیکشن کمیشن کے مطابق اس مرحلے میں پاکستان پیپلز پارٹی، پاکستان مسلم لیگ (ن)، استحکامِ پاکستان پارٹی، آزاد امیدواروں اور دیگر سیاسی جماعتوں سمیت مجموعی طور پر 296 امیدوار انتخابی میدان میں موجود ہیں۔

سرکاری اعداد و شمار کے مطابق میرپور ڈویژن کے تین اضلاع میں 14 لاکھ 1 ہزار 439 رجسٹرڈ ووٹرز موجود ہیں۔ ان میں 7 لاکھ 25 ہزار 118 مرد جبکہ 6 لاکھ 75 ہزار 628 خواتین ووٹرز شامل ہیں، جو اپنے نمائندوں کے انتخاب کے لیے ووٹ ڈال رہے ہیں۔

انتخابی عمل کو شفاف اور منظم بنانے کے لیے میرپور ڈویژن میں مجموعی طور پر 2,454 پولنگ اسٹیشنز قائم کیے گئے ہیں۔ ضلع میرپور کے چار حلقوں میں 597، ضلع کوٹلی کے چھ حلقوں میں 1,107 اور ضلع بھمبر کے تین حلقوں میں 608 پولنگ اسٹیشنز قائم کیے گئے ہیں۔

الیکشن کے دوران امن و امان برقرار رکھنے کے لیے سخت سکیورٹی انتظامات کیے گئے ہیں۔ پولیس، انتظامیہ اور دیگر قانون نافذ کرنے والے ادارے پولنگ اسٹیشنز پر تعینات ہیں تاکہ ووٹنگ کا عمل پرامن اور شفاف انداز میں مکمل کیا جا سکے۔

چیف الیکشن کمشنر آزاد کشمیر جسٹس (ر) غلام مصطفیٰ مغل نے واضح کیا ہے کہ انتخابی عمل میں رکاوٹ ڈالنے، بدنظمی پیدا کرنے یا قانون کی خلاف ورزی کرنے والوں کے خلاف فوری قانونی کارروائی کی جائے گی۔

دوسری جانب چیف سیکرٹری آزاد جموں و کشمیر خوشحال خان نے کہا کہ ریاستی ادارے آزاد، منصفانہ اور پُرامن انتخابات کے انعقاد کے لیے مکمل طور پر تیار ہیں۔ انہوں نے عوام سے اپیل کی کہ وہ ذمہ داری کا مظاہرہ کرتے ہوئے پرامن ماحول میں اپنا ووٹ استعمال کریں اور کسی بھی غیر قانونی سرگرمی سے گریز کریں۔

آزاد کشمیر قانون ساز اسمبلی کے انتخابات کا یہ مرحلہ خطے کی سیاسی صورتحال کے لیے اہم قرار دیا جا رہا ہے، جبکہ مختلف سیاسی جماعتیں بہتر انتخابی نتائج کے لیے پُرامید ہیں۔