اسلام آباد ہائیکورٹ الاؤنس میں اضافہ: گریڈ 17 سے 22 کے افسران کیلئے نئے مونیٹائزیشن ریٹس جاری

اسلام آباد ہائیکورٹ کا بڑا فیصلہ، گریڈ 17 سے گریڈ 22 تک کے افسران کے ٹرانسپورٹ الاؤنس میں نمایاں اضافہ

اسلام آباد ہائیکورٹ الاؤنس میں اضافہ سے متعلق اہم نوٹیفکیشن جاری کر دیا گیا ہے، جس کے تحت گریڈ 17 سے گریڈ 22 تک کے افسران کے ٹرانسپورٹ مونیٹائزیشن الاؤنس میں نمایاں اضافہ کیا گیا ہے۔ نوٹیفکیشن کے مطابق نئے الاؤنس ریٹس کا اطلاق یکم جولائی 2026 سے ہوگا۔

جاری کردہ اعلامیے کے مطابق گریڈ 22 کے افسران کے لیے ماہانہ 2 لاکھ 50 ہزار روپے ٹرانسپورٹ مونیٹائزیشن الاؤنس مقرر کیا گیا ہے، جبکہ گریڈ 21 کے افسران کو 1 لاکھ 95 ہزار روپے ماہانہ دیے جائیں گے۔

اسی طرح گریڈ 20 کے افسران کے لیے 1 لاکھ 75 ہزار روپے اور گریڈ 19 کے افسران کے لیے 1 لاکھ 50 ہزار روپے ماہانہ الاؤنس مقرر کیا گیا ہے۔

نوٹیفکیشن کے مطابق گریڈ 18 کے افسران کو 1 لاکھ روپے جبکہ گریڈ 17 کے افسران کو 60 ہزار روپے ماہانہ ٹرانسپورٹ مونیٹائزیشن الاؤنس فراہم کیا جائے گا۔

اسلام آباد ہائیکورٹ نے واضح کیا ہے کہ اس فیصلے کے نتیجے میں آنے والے تمام مالی اخراجات اسلام آباد ہائیکورٹ اور ڈسٹرکٹ جوڈیشری کے مالی سال 2026-27 کے منظور شدہ بجٹ سے پورے کیے جائیں گے۔

یہ اقدام عدالتی افسران کو فراہم کی جانے والی سہولیات میں بہتری اور سرکاری ٹرانسپورٹ پالیسی کے تحت مونیٹائزیشن نظام کو مزید مؤثر بنانے کی کوشش کا حصہ قرار دیا جا رہا ہے۔

ماہرین کے مطابق مونیٹائزیشن الاؤنس کا مقصد سرکاری افسران کو سرکاری گاڑی کی سہولت کے متبادل کے طور پر مالی معاونت فراہم کرنا ہے تاکہ انتظامی امور زیادہ مؤثر انداز میں انجام دیے جا سکیں۔

نئے الاؤنس ریٹس سے گریڈ 17 سے 22 تک کے افسران مستفید ہوں گے، جبکہ اس فیصلے کا اطلاق نوٹیفکیشن میں درج تاریخ کے مطابق یکم جولائی 2026 سے تصور کیا جائے گا۔