پنجاب میں آج رات سے 21 اگست تک بارشیں، اربن فلڈنگ کا الرٹ

پنجاب میں 21 اگست تک بارشوں کی پیشگوئی

پنجاب میں بارشیں آج رات سے شروع ہونے کا امکان ہے، جس کے باعث صوبے کے بیشتر اضلاع میں 21 اگست تک مون سون بارشوں کی پیشگوئی کی گئی ہے۔ پی ڈی ایم اے پنجاب نے مون سون کے چھٹے اسپیل کا الرٹ جاری کرتے ہوئے ضلعی انتظامیہ اور متعلقہ محکموں کو پیشگی اقدامات کی ہدایت کردی ہے۔

پی ڈی ایم اے کے ترجمان کے مطابق 16 اگست کی رات سے 21 اگست تک پنجاب کے مختلف علاقوں میں بارشوں کا سلسلہ متوقع ہے۔

کن علاقوں میں بارش ہوگی؟

محکمہ موسمیاتی صورتحال کے الرٹ کے مطابق راولپنڈی، مری، گلیات، جہلم، چکوال، تلہ گنگ، اٹک، سیالکوٹ، نارووال، منڈی بہاؤالدین، گجرات، گوجرانوالہ، حافظ آباد اور وزیرآباد میں بارشوں کی پیشگوئی کی گئی ہے۔

لاہور، قصور، اوکاڑہ، شیخوپورہ، ننکانہ صاحب، سرگودھا، خوشاب، میانوالی اور نورپور تھل میں بھی بارش متوقع ہے۔

اسی طرح فیصل آباد، جھنگ، ٹوبہ ٹیک سنگھ، لیہ، بھکر، ساہیوال، پاکپتن، بہاولنگر، بہاولپور اور ڈیرہ غازی خان میں 20 اور 21 اگست کو بارش ہوسکتی ہے۔

بڑے شہروں میں اربن فلڈنگ کا خطرہ

پی ڈی ایم اے کے مطابق 17 سے 20 اگست کے دوران راولپنڈی، گوجرانوالہ، گجرات، سیالکوٹ اور لاہور کے نشیبی علاقوں میں شدید بارشوں کے باعث اربن فلڈنگ کا خدشہ ہے۔

مسلسل یا شدید بارش کی صورت میں شہری علاقوں میں پانی جمع ہونے اور سڑکوں و نشیبی علاقوں میں آمدورفت متاثر ہونے کا امکان ظاہر کیا گیا ہے۔

محکمہ نے شہری انتظامیہ کو پیشگی اقدامات کرنے اور حساس علاقوں میں صورتحال کی مسلسل نگرانی کی ہدایت کی ہے۔

برساتی نالوں میں فلیش فلڈنگ کا خدشہ

ڈی جی پی ڈی ایم اے سیف انور جپہ نے صوبے بھر کے کمشنرز اور ڈپٹی کمشنرز کو الرٹ رہنے کی ہدایت کی ہے۔

ان کے مطابق برساتی نالوں میں فلیش فلڈنگ کا خطرہ موجود ہے، اس لیے ضلعی انتظامیہ کو ہنگامی صورتحال سے نمٹنے کے لیے تیار رہنے کی ہدایت کی گئی ہے۔

مری، گلیات اور دیگر پہاڑی علاقوں میں شدید بارشوں کے باعث لینڈ سلائیڈنگ کا خدشہ بھی ظاہر کیا گیا ہے۔

پی ڈی ایم اے کے مطابق محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی الرٹ جاری کردیا گیا ہے۔

ضلعی انتظامیہ کو مون سون بارشوں کے دوران شہریوں کی مشکلات کم کرنے، نکاسی آب کے انتظامات بہتر بنانے اور ہنگامی صورتحال میں فوری کارروائی کے لیے تیار رہنے کی ہدایت کی گئی ہے۔

شہریوں کے لیے اہم احتیاطی ہدایات

پی ڈی ایم اے نے شہریوں سے خراب موسم کے دوران احتیاطی تدابیر اختیار کرنے کی اپیل کی ہے۔

عوام کو ہدایت کی گئی ہے کہ بوسیدہ اور کچے مکانات میں رہائش اختیار کرنے سے گریز کریں، کیونکہ مون سون کے دوران ایسے مکانات گرنے کے واقعات میں جانی نقصان کا خطرہ بڑھ جاتا ہے۔

آندھی اور طوفان کی صورت میں شہری محفوظ مقامات پر رہیں اور غیر ضروری سفر سے گریز کریں۔ آسمانی بجلی کے دوران بھی کھلے مقامات پر جانے سے اجتناب کرنے کی ہدایت کی گئی ہے۔