صحافیوں کے وفد کا تھانہ سنگجانی اسلام آباد کا دورہ، ایس ایچ او محمد اسحاق سے ملاقات

روزنامہ رئیس الاخبار کے صحافیوں کے وفد کا تھانہ سنگجانی اسلام آباد کا دورہ، ایس ایچ او محمد اسحاق سے ملاقات

اسلام آباد: روزنامہ رئیس الاخبار کے صحافیوں کے وفد نے تھانہ سنگجانی اسلام آباد کا دورہ کیا، جہاں اسلام آباد کرائم رپورٹر سید فیضان علی شاہ، سپیشل رپورٹر اسامہ بشیر اور جنرل رپورٹر عارف اللہ نے ایس ایچ او تھانہ سنگجانی محمد اسحاق سے ملاقات کی۔

ملاقات کے دوران علاقے میں امن و امان کی صورتحال، عوامی مسائل، جرائم کی روک تھام اور پولیس و عوام کے درمیان روابط کو مزید مؤثر بنانے کے امور پر تبادلۂ خیال کیا گیا۔

اس موقع پر صحافیوں نے قیامِ امن، جرائم کی روک تھام اور شہریوں کے جان و مال کے تحفظ کے لیے پولیس کے ساتھ پیشہ ورانہ تعاون جاری رکھنے کی یقین دہانی کروائی۔

دورے کے دوران ایس ایچ او محمد اسحاق نے صحافیوں کو تھانے کے مختلف شعبہ جات کا دورہ کروایا، جبکہ وفد نے پولیس افسران اور اہلکاروں سے بھی ملاقات کی۔

صحافیوں نے تھانے میں موجود سائلین اور متاثرہ شہریوں سے گفتگو کرکے پولیس کے رویے، تعاون اور کارکردگی کے حوالے سے ان کے تاثرات معلوم کیے۔ فراہم کردہ معلومات کے مطابق بعض شہریوں اور سائلین نے پولیس کے تعاون پر اطمینان کا اظہار کیا۔

صحافیوں کے وفد کے اس دورے کا مقصد پولیس اور میڈیا کے درمیان پیشہ ورانہ روابط کو فروغ دینا، عوامی مسائل کو اجاگر کرنا اور علاقے میں امن و امان کے قیام کے لیے مثبت کردار ادا کرنا تھا۔

اس موقع پر اس امر پر زور دیا گیا کہ پولیس اور صحافت کے درمیان مؤثر رابطہ شہریوں کے مسائل متعلقہ حکام تک پہنچانے اور جرائم کی روک تھام سے متعلق آگاہی بڑھانے میں معاون ثابت ہو سکتا ہے۔

روزنامہ رئیس الاخبار عوامی مسائل کی نشاندہی، شہریوں کی آواز متعلقہ حکام تک پہنچانے اور ذمہ دارانہ صحافت کے ذریعے معاشرتی بہتری کے لیے اپنا کردار ادا کرتا رہے گا۔