بھارتی وزیراعلیٰ بھگونت مان کو دورہ پاکستان کی دعوت، مریم نواز بھی خیرمقدم کے لیے تیار: سردار رمیش سنگھ اروڑہ

بھارتی وزیراعلیٰ بھگونت مان کو دورہ پاکستان کی دعوت، مریم نواز بھی خیرمقدم کے لیے تیار: سردار رمیش سنگھ اروڑہ

لاہور (رئیس الاخبار): وزیرِ اقلیتی امور پنجاب اور چیئرمین پاکستان سکھ گوردوارہ پر بندھک کمیٹی سردار رمیش سنگھ اروڑہ نے بھارتی پنجاب کے وزیراعلیٰ بھگونت سنگھ مان کو پاکستان آنے کی دعوت دیتے ہوئے کہا ہے کہ وزیراعلیٰ پنجاب مریم نواز بھی ان کا خیرمقدم کرتی ہیں۔

سردار رمیش سنگھ اروڑہ نے پاکستان کو امن، خوبصورتی اور بین المذاہب ہم آہنگی کا گلدستہ قرار دیتے ہوئے کہا کہ پاکستان میں مسلمان، ہندو، سکھ اور مسیحی برابر کے شہری ہیں۔ ان کے مطابق پاکستان کا آئین تمام شہریوں کے مساوی حقوق کی ضمانت دیتا ہے اور ملک امن، رواداری اور مذہبی ہم آہنگی کا پیغام دیتا ہے۔

سردار رمیش سنگھ اروڑہ نے بھارتی پنجاب کے وزیراعلیٰ بھگونت سنگھ مان کے ساتھ بھارتی پنجاب اسمبلی کے ارکان کو بھی پاکستان آنے کی دعوت دی ہے۔

انہوں نے پیشکش کی کہ بھارتی وفد پاکستان کے دورے کے دوران گوردوارہ دربار صاحب کرتارپور سمیت مختلف مذاہب کے مقدس مقامات کی زیارت کر سکتا ہے اور ملک میں مذہبی آزادی اور بین المذاہب ہم آہنگی کا مشاہدہ کر سکتا ہے۔

ان کا کہنا تھا کہ پاکستان مختلف مذاہب اور ثقافتوں سے تعلق رکھنے والے افراد کا مشترکہ وطن ہے، جہاں تمام شہریوں کے حقوق کا تحفظ آئینی اصولوں کے تحت کیا جاتا ہے۔

اس سے قبل ببھارتی وزیراعلیٰ بھگونت مان نے لاہور میں 27 نومبر کو منعقد ہونے والی عالمی پنجابی کانفرنس میں شرکت کی دعوت موصول ہونے کی تصدیق کی تھی۔

بھارتی وزیراعلیٰ بھگونت مان کے مطابق کانفرنس کے منتظمین نے انہیں لاہور آنے کی دعوت دی ہے اور میزبانی کی پیشکش بھی کی ہے۔

انہوں نے پنجاب کے مشترکہ ثقافتی ورثے کا ذکر کرتے ہوئے کہا کہ دونوں جانب کا کلچر ایک ہے اور شاعر سمیت ثقافتی شعبوں سے وابستہ دیگر افراد بھی لاہور جانا چاہتے ہیں۔ ان کا کہنا تھا کہ وہ خود بھی لاہور کا دورہ کرنا چاہتے ہیں۔

بھارتی پنجاب اسمبلی کے اسپیکر نے بھی بھارتی وزیراعلیٰ بھگونت مان سے کہا کہ اگر انہیں پاکستان جانے کی اجازت مل جائے تو وہ انہیں اپنے ساتھ لے جائیں۔

اس پر بھارتی وزیراعلیٰ بھگونت مان نے کہا کہ ان کی خواہش ہے کہ وہ سب مل کر کرتارپور جائیں۔

کرتارپور صاحب سکھ مذہب کے پیروکاروں کے لیے ایک اہم مذہبی مقام ہے، جہاں گوردوارہ دربار صاحب واقع ہے۔ یہ مقام سکھ مذہب کے بانی بابا گرو نانک دیو جی سے منسوب ہے اور دنیا بھر سے سکھ یاتریوں کی عقیدت کا مرکز ہے۔

سردار رمیش سنگھ اروڑہ کی دعوت اور بھگونت سنگھ مان کی جانب سے لاہور آنے کی خواہش کا اظہار پاکستان اور بھارتی پنجاب کے درمیان ثقافتی روابط، مذہبی سیاحت اور مشترکہ پنجابی ورثے کے حوالے سے اہم پیش رفت ہے۔

دونوں جانب کے عوام کی زبان، ادب، موسیقی اور ثقافتی روایات میں تاریخی مماثلت پائی جاتی ہے۔ ایسے روابط عوامی سطح پر ایک دوسرے کی ثقافت کو سمجھنے اور مذہبی مقامات کی زیارت کے مواقع پیدا کر سکتے ہیں۔

تاہم بھارتی وزیراعلیٰ بھگونت مان کے پاکستان آنے یا عالمی پنجابی کانفرنس میں شرکت کے حوالے سے حتمی فیصلہ اور ضروری سرکاری اجازتیں الگ معاملات ہیں۔ ان کی شرکت کو اس وقت تک طے شدہ قرار نہیں دیا جا سکتا جب تک باضابطہ تصدیق سامنے نہ آجائے۔

انڈین پنجاب کے وزیراعلیٰ بھگونت مان نے کہا ہے کہ ہیں لاہور کی ورلڈ پنجابی کانفرنس میں شرکت کی دعوت ہے لیکن وہ وہاں نہیں جا سکیں گے۔
بھگونت مان نے انڈین پنجاب کی قانون ساز اسمبلی میں گفتگو کرتے ہوئے کہا کہ ’لاہور میں ورلڈ پنجابی کانفرنس ہو رہی ہے۔ انہوں نے مجھے دعوتی خط بھیجا ہے کہ آپ آئیں، ہم آپ کی میزبانی کریں گے۔‘
’میں نے کہا مجھے تو یہ فرانس وغیرہ، جاپان والی طرف نہیں جانے دیتے، پاکستان کہاں جانے دیں گے؟‘
انہوں نے پنجابی زبان میں اپنی بات جاری رکھتے ہوئے کہا کہ ’ لیکن کلچر ایک جیسا ہے۔ ہمارے بہت سے شاعر یہاں سے جائیں گے۔ اور میں بھی چاہتا ہوں کہ... کیونکہ سانجھیں ایک جیسی ہیں۔ درانتیوں، کیئاں (کدالوں) کے رنگ ایک جیسے ہیں۔ مشکلات ایک جیسی ہیں۔ تو ہونا چاہیے میل ملاپ۔‘
ان کی گفتگو کے دوران سپیکر نے مداخلت کرتے ہوئے کہا کہ ’سی ایم صاحب! اگر آپ کو اجازت مل گئی تو ہمیں بھی ساتھ لے چلیے گا۔‘
اس پر بھگونت مان نے کہا کہ ’نہیں، میں تو چاہتا ہوں کہ کرتارپور صاحب میں آپ کی قیادت میں جائیں... اگر پوری ودھان سبھا (اسمبلی) کے ارکان، چاہے اپوزیشن میں ہوں یا چاہے حکومت میں ... اگر کرتارپور صاحب کی راہداری کھل جائے تو جا کر ماتھا ٹیک کر آئیں۔ نتمستک ہوں (سر جھکائیں)  بابا گُرو  (نانک )کی اس دھرتی پر، جہاں 16 سال گرو صاحب نے ریاضت کی ہے، اپنے ہاتھوں کی سچی کمائی کی ہے۔‘
— Farhan Khan (@TheFarhanAKhan) October 24, 2026