آزاد کشمیر انتخابات: میرپور ڈویژن کی 13 نشستوں پر کل پولنگ، سخت مقابلوں کی توقع
آزاد کشمیر انتخابات کے سلسلے میں میرپور ڈویژن کے تین اضلاع کی 13 قانون ساز اسمبلی نشستوں پر کل پولنگ ہوگی، جس کے لیے الیکشن کمیشن نے تمام انتظامات مکمل کر لیے ہیں۔
الیکشن کمیشن کے مطابق میرپور کی چار، بھمبر کی تین اور کوٹلی کی چھ نشستوں پر امیدواروں کے درمیان مقابلہ ہوگا۔ پولنگ کے لیے بیلٹ پیپرز اور دیگر انتخابی سامان ڈسٹرکٹ ریٹرننگ آفیسرز (DRO) کے دفاتر سے پریذائیڈنگ افسران کے حوالے کر دیا گیا ہے۔
حکام کے مطابق پریذائیڈنگ افسران نے سخت سکیورٹی میں انتخابی سامان اپنی نگرانی میں متعلقہ پولنگ اسٹیشنز تک پہنچایا، جبکہ پولیس اور دیگر قانون نافذ کرنے والے ادارے پورے عمل کے دوران سکیورٹی کے فرائض انجام دیتے رہے۔
الیکشن حکام کا کہنا ہے کہ تمام پولنگ اسٹیشنز تک سامان کی بروقت ترسیل مکمل کر لی گئی ہے اور پولنگ مقررہ وقت پر شروع ہوگی۔
میرپور ڈویژن کے مختلف حلقوں میں دلچسپ اور کانٹے دار مقابلوں کی توقع کی جا رہی ہے۔ میرپور کے حلقہ ایل اے-1 میں پاکستان پیپلز پارٹی کے افسر شاہد اور مسلم لیگ (ن) کے اظہر صادق آمنے سامنے ہیں، جبکہ ایل اے-2 میں مسلم لیگ (ن)، پاکستان پیپلز پارٹی اور پی ٹی آئی حمایت یافتہ آزاد امیدوار کے درمیان سخت مقابلے کی توقع ہے۔
اسی طرح ایل اے-3 اور ایل اے-4 میں بھی مسلم لیگ (ن) اور پاکستان پیپلز پارٹی کے امیدواروں کے درمیان سخت انتخابی معرکے متوقع ہیں۔
بھمبر کے حلقوں میں بھی سیاسی سرگرمیاں عروج پر رہیں۔ ایل اے-5 میں مسلم لیگ (ن) اور پیپلز پارٹی کے امیدوار مدِمقابل ہیں، جبکہ ایل اے-6 میں استحکام پاکستان پارٹی اور مسلم لیگ (ن) کے درمیان سخت مقابلے کی توقع ہے۔ ایل اے-7 میں سابق وزیراعظم آزاد کشمیر چوہدری انوار الحق بطور آزاد امیدوار میدان میں ہیں، جہاں ان کا مقابلہ مسلم لیگ (ن) کے امیدوار سے ہوگا۔
کوٹلی کے حلقہ ایل اے-12 میں بھی پاکستان پیپلز پارٹی اور مسلم لیگ (ن) کے امیدواروں کے درمیان سخت مقابلہ متوقع ہے۔
واضح رہے کہ آزاد کشمیر میں عام انتخابات کے لیے انتخابی مہم اپنے مقررہ وقت پر ختم ہو چکی ہے، جس کے بعد انتخابی ضابطہ اخلاق کے مطابق امیدوار اور سیاسی جماعتیں کسی بھی قسم کی انتخابی مہم نہیں چلا سکتیں۔
الیکشن کمیشن کا کہنا ہے کہ شفاف، آزاد اور پرامن انتخابات کے انعقاد کے لیے تمام انتظامات مکمل کر لیے گئے ہیں اور پولنگ کے دوران سکیورٹی کے خصوصی اقدامات کیے گئے ہیں۔
READ MORE FAQS
- میرپور ڈویژن میں کتنی نشستوں پر پولنگ ہوگی؟
میرپور ڈویژن کے تین اضلاع کی مجموعی 13 نشستوں پر پولنگ ہوگی۔ - کن اضلاع میں انتخابات ہو رہے ہیں؟
میرپور، بھمبر اور کوٹلی اضلاع میں پولنگ ہوگی۔ - کیا انتخابی سامان پولنگ اسٹیشنز پہنچا دیا گیا ہے؟
جی ہاں، الیکشن کمیشن نے سخت سکیورٹی میں تمام انتخابی سامان پولنگ اسٹیشنز منتقل کر دیا ہے۔ - کن سیاسی جماعتوں کے درمیان سخت مقابلے متوقع ہیں؟
مسلم لیگ (ن)، پاکستان پیپلز پارٹی، پی ٹی آئی حمایت یافتہ امیدواروں، استحکام پاکستان پارٹی اور آزاد امیدواروں کے درمیان سخت مقابلے متوقع ہیں۔
