ایف بی آر پروفیشنلز آڈٹ کے تحت ڈاکٹرز، بیوٹی پارلرز، کاسمیٹکس ڈیلرز اور پینٹ سیکٹر کی بڑے پیمانے پر چھان بین شروع ہو گئی ہے۔ پہلے مرحلے میں کراچی، لاہور اور اسلام آباد کے 250 مہنگے ڈاکٹرز کا آڈٹ ہوگا۔ ایف بی آر نے ٹیکس نیٹ بڑھانے کے لیے 2 ہزار نجی آڈیٹرز ہائر کرنے کا فیصلہ کیا ہے۔
راولپنڈی میں آرمی چیف فیلڈ مارشل سید عاصم منیر اور ایرانی نیشنل سیکیورٹی کونسل کے سیکریٹری علی لاریجانی کی اہم ملاقات ہوئی، جس میں خطے کی سیکیورٹی، دوطرفہ تعاون، مشترکہ چیلنجز اور طویل المدتی استحکام پر بات چیت کی گئی۔ علی لاریجانی نے آیت اللہ خامنہ ای کا سلام بھی پہنچایا، جبکہ دونوں ممالک نے سیکیورٹی تعاون مزید بڑھانے پر اتفاق کیا۔
خیبرپختونخوا کے ضلع چارسدہ میں شدید دھند کے باعث اسکول وین اور ٹرک میں خوفناک تصادم ہوا، جس کے نتیجے میں 2 بچے جاں بحق جبکہ 21 زخمی ہوگئے۔ حادثہ ترنگزئی بائی پاس روڈ پر پیش آیا جہاں ریسکیو اہلکاروں نے موقع پر پہنچ کر زخمیوں کو اسپتال منتقل کیا۔ ریسکیو کے مطابق 3 بچوں کی حالت تشویشناک ہے۔ ڈپٹی کمشنر نے دھند کے باعث نجی اسکولوں کے اوقات کار تبدیل کرنے کی تجویز بھی دے دی ہے۔
سونے کی مارکیٹ پاکستان میں شدید غیر دستاویزی، غیر شفاف اور غیر ریگولیٹڈ ہے، کمپٹیشن کمیشن کی اسیسمنٹ اسٹڈی کے مطابق سالانہ 60 سے 90 ٹن سونے کی کھپت کے باوجود 90 فیصد تجارت غیر رسمی چینلز سے ہوتی ہے۔ رپورٹ میں گولڈ مارکیٹ کو منظم کرنے کے لیے جامع اصلاحات تجویز کی گئی ہیں۔
وزیراعظم شہباز شریف اعلیٰ سطحی وفد کے ہمراہ دو روزہ سرکاری دورے پر بحرین روانہ ہوگئے ہیں، جہاں وہ بحرین کے بادشاہ حمد بن عیسیٰ الخلیفہ، ولی عہد و وزیراعظم شہزادہ سلمان بن حمد الخلیفہ اور نائب وزیراعظم شیخ خالد بن عبداللہ الخلیفہ سے اہم ملاقاتیں کریں گے۔ دفتر خارجہ کے مطابق یہ دورہ پاکستان اور بحرین کے دیرینہ تعلقات کی مضبوطی، نئی شراکت داری کی راہیں متعین کرنے اور دونوں ممالک کے درمیان نتائج پر مبنی تعاون کو فروغ دینے کے لیے انتہائی اہمیت رکھتا ہے۔
آرمی چیف فیلڈ مارشل عاصم منیر نے 27ویں نیشنل سیکیورٹی ورکشاپ میں خطاب کرتے ہوئے کہا کہ معرکۂ حق میں افواج پاکستان کے عزم نے ملک کا عالمی وقار بلند کیا، جب کہ قومی وحدت ہماری سب سے بڑی طاقت ہے۔ انہوں نے واضح کیا کہ پاکستان اس وقت سرحد پار دہشت گردی، ہائبرڈ جنگ اور بیرونی حمایت یافتہ شدت پسندی جیسے پیچیدہ چیلنجز کا سامنا کر رہا ہے، مگر مسلح افواج، انٹیلی جنس ادارے اور قانون نافذ کرنے والے ادارے پوری پیشہ ورانہ مہارت کے ساتھ قومی سلامتی کو یقینی بنا رہے ہیں
جمعیت علمائے اسلام (ف) کے سربراہ مولانا فضل الرحمٰن نے 27ویں آئینی ترمیم کو یکسر مسترد کرتے ہوئے کہا ہے کہ پارلیمنٹ میں جے یو آئی کے ارکان نے اس کی مخالفت کی۔ اسلام آباد میں پریس کانفرنس کرتے ہوئے انہوں نے بتایا کہ مرکزی مجلس شوریٰ کے اجلاس میں ترمیم اور متعلقہ قوانین پر تفصیلی غور کیا گیا۔ ان کا کہنا تھا کہ 26ویں ترمیم حکومت کے ساتھ باہمی مشاورت سے منظور ہوئی تھی، مگر 27ویں ترمیم میں جے یو آئی کو مکمل طور پر نظرانداز کیا گیا۔
پاک بحریہ نے مقامی طور پر تیار کردہ بحری جہاز سے داغے جانے والے اینٹی شپ بیلسٹک میزائل کا کامیاب تجربہ کیا، جو سمندر اور خشکی دونوں پر اہداف کو انتہائی درستگی سے نشانہ بنانے کی صلاحیت رکھتا ہے۔ آئی ایس پی آر کے مطابق یہ جدید ہتھیار جدید رہنمائی اور مانورنگ سسٹمز سے لیس ہے۔ تجربے میں صدر، وزیراعظم، آرمی چیف اور دیگر عسکری قیادت نے سائنسدانوں اور انجینئرز کو مبارکباد پیش کی۔
جنرل ہیڈکوارٹرز راولپنڈی میں آرمی چیف فیلڈ مارشل عاصم منیر سے سبکدوش ہونے والے چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے الوداعی ملاقات کی۔ آرمی چیف نے ان کی مثالی قیادت، اسٹریٹجک بصیرت اور تینوں افواج کے درمیان رابطے کو مضبوط بنانے میں ان کے کردار کو سراہا۔ جنرل مرزا نے یادگارِ شہداء پر حاضری بھی دی۔
ڈی جی آئی ایس پی آر لیفٹننٹ جنرل احمد شریف چوہدری نے غیر رسمی گفتگو میں کہا کہ سابق ڈی جی آئی ایس آئی لیفٹننٹ جنرل (ر) فیض حمید کے خلاف کورٹ مارشل کی کارروائی جاری ہے، اور یہ مکمل طور پر قانونی و عدالتی عمل ہے، اس لیے اس معاملے پر قیاس آرائیوں سے گریز کیا جائے۔ انہوں نے واضح کیا کہ پاکستان نے گزشتہ شب افغانستان میں کوئی کارروائی نہیں کی، اور پاکستان جب بھی کوئی آپریشن کرتا ہے تو باقاعدہ اعلان کرکے کرتا ہے۔ ترجمان نے کہا کہ پاکستان کبھی سویلین آبادی کو نشانہ نہیں بناتا، مسئلہ افغان عوام سے نہیں بلکہ افغان عبوری حکومت کی جانب سے دہشت گردوں کے خلاف غیر مؤثر کارروائی سے ہے۔
