چیئرمین سی ڈی اے کا فیصل مسجد کا دورہ، تزئین و آرائش اور سہولیات بہتر بنانے کی ہدایت
اسلام آباد (27 اکتوبر 2026ء): چیئرمین کیپیٹل ڈویلپمنٹ اتھارٹی (سی ڈی اے) سہیل اشرف نے فیصل مسجد اسلام آباد کا دورہ کیا اور وہاں جاری تزئین و آرائش، بحالی اور اپ گریڈیشن کے کاموں کا جائزہ لیا۔ انہوں نے متعلقہ افسران کو ہدایت کی کہ تعمیر و مرمت کے کام اعلیٰ معیار کے مطابق مقررہ مدت میں مکمل کیے جائیں اور نمازیوں، سیاحوں اور دیگر زائرین کو بہتر سہولیات فراہم کی جائیں۔
دورے کے موقع پر ممبر بلڈنگ، ڈی جی سروسز، ڈی جی ای اینڈ ایم، سی ای او ایم سی آئی سمیت سی ڈی اے، نیسپاک اور ای ایس سی پی کے دیگر سینئر افسران بھی موجود تھے۔
چیئرمین سی ڈی اے سہیل اشرف نے جاری منصوبوں کی پیش رفت کا جائزہ لیتے ہوئے ہدایت کی کہ فیصل مسجد کے موجودہ انفراسٹرکچر اور سہولیات کو جامع انداز میں بہتر بنایا جائے۔ انہوں نے زور دیا کہ تمام کاموں میں معیار، پائیداری اور بروقت تکمیل کو یقینی بنایا جائے۔ ان کا کہنا تھا کہ تزئین و آرائش کا مقصد صرف مسجد کی خوبصورتی میں اضافہ کرنا نہیں بلکہ نمازیوں اور ملکی و غیر ملکی سیاحوں کے لیے سہولت اور آرام کو بھی بہتر بنانا ہے۔
چیئرمین سی ڈی اے نے متعلقہ شعبوں کو ہدایت کی کہ ضروری مرمت کے کام ترجیحی بنیادوں پر مکمل کیے جائیں اور مسجد میں موجود سہولیات کی دیکھ بھال بہتر بنائی جائے۔
انہوں نے بالخصوص صفائی ستھرائی، حفظانِ صحت، راستوں اور اطراف کے علاقوں کی دیکھ بھال پر توجہ دینے کی ہدایت کی۔ اس کے علاوہ کینٹین سمیت دیگر ضروری سہولیات کو فعال اور مؤثر بنانے پر بھی زور دیا۔
چیئرمین سی ڈی اے کے مطابق فیصل مسجد آنے والے نمازیوں اور سیاحوں کو صاف ستھرا، آرام دہ اور منظم ماحول فراہم کیا جانا چاہیے تاکہ انہیں عبادت اور سیاحت کے دوران بہتر سہولیات میسر آ سکیں۔ سہیل اشرف نے فیصل مسجد کے اطراف لینڈ اسکیپنگ، شجرکاری اور سبزہ زاروں کی بہتری پر بھی خصوصی توجہ دینے کی ہدایت کی۔ انہوں نے کہا کہ مسجد کے گردونواح میں صفائی اور مناسب دیکھ بھال کے ذریعے ماحول کو مزید خوشگوار اور منظم بنایا جائے۔ انہوں نے زور دیا کہ خوبصورتی کے تمام اقدامات فیصل مسجد کے منفرد طرزِ تعمیر، مذہبی اہمیت اور تاریخی شناخت سے ہم آہنگ ہونے چاہئیں۔
چیئرمین سی ڈی اے نے کہا کہ فیصل مسجد پاکستان کے اہم مذہبی، ثقافتی اور تعمیراتی ورثے کی علامت ہے، اس لیے اس کی دیکھ بھال اور بہتری کے اقدامات اس کے تقدس، وقار اور عظمت کے مطابق ہونے چاہئیں۔
انہوں نے ہدایت کی کہ تزئین و آرائش اور مرمت کے دوران مسجد کے منفرد طرزِ تعمیر اور تاریخی شناخت کو محفوظ رکھا جائے، جبکہ موجودہ سہولیات کو زائرین کی ضروریات کے مطابق بہتر بنایا جائے۔
سہیل اشرف نے سی ڈی اے کے متعلقہ شعبوں، نیسپاک اور ای ایس سی پی کے درمیان مؤثر رابطہ کاری کی ضرورت پر بھی زور دیا۔ انہوں نے کہا کہ منصوبوں کی پیش رفت کی باقاعدگی سے نگرانی کی جائے اور اس بات کو یقینی بنایا جائے کہ مکمل ہونے والی سہولیات فعال، قابلِ رسائی اور مناسب حالت میں برقرار رہیں۔
چیئرمین سی ڈی اے نے واضح کیا کہ فیصل مسجد کی تزئین و آرائش، اپ گریڈیشن، صفائی اور خوبصورتی کے اقدامات کا مقصد نمازیوں اور سیاحوں کو پُرسکون، باوقار اور آرام دہ ماحول فراہم کرنا ہے۔
انہوں نے متعلقہ افسران کو ہدایت کی کہ تمام کام ذمہ داری اور احتیاط سے مکمل کیے جائیں تاکہ فیصل مسجد کی مذہبی اہمیت، تعمیراتی حسن اور قومی شناخت کو برقرار رکھتے ہوئے عوامی سہولیات میں بہتری لائی جا سکے۔
Chairman CDA Sohail Ashraf visited Faisal Mosque to review ongoing renovation, upgradation and improvements to public and tourist facilities. He directed the concerned departments to preserve the mosque’s architectural heritage, historic identity and spiritual significance while improving cleanliness, canteen services, plantation, landscaping and other essential facilities.
He emphasized completing all works within the stipulated timeframe while maintaining high-quality standards and ensuring effective coordination among the relevant departments, providing worshippers and local and international tourists with a clean, peaceful and comfortable environment.
#CDA #FaisalMosque #Islamabad #Beautification #Tourism #CapitalDevelopmentAuthority
— Capital Development Authority - CDA, Islamabad (@CDAthecapital) October 27, 2026
