کرسٹیانو رونالڈو نے جارجینا روڈریگز سے شادی کرلی

کرسٹیانو رونالڈو نے جارجینا روڈریگز سے شادی کرلی

پرتگال کے عالمی شہرت یافتہ فٹبالر کرسٹیانو رونالڈو نے اپنی دیرینہ ساتھی اور ماڈل جارجینا روڈریگز سے شادی کرلی، دونوں نے پرتگال میں سول میرج کی تقریب میں ازدواجی زندگی کا آغاز کردیا۔

کرسٹیانو رونالڈو اور جارجینا روڈریگز کی طویل عرصے سے جاری محبت بالآخر شادی کے بندھن میں بدل گئی۔ 41 سالہ پرتگالی فٹبال اسٹار نے اپنی دیرینہ ساتھی سے پرتگال میں ایک نجی سول تقریب کے دوران شادی کی۔

رونالڈو نے اپنی شادی کی خبر سوشل میڈیا پر ایک تصویر کے ذریعے شیئر کی، جس میں دو ہاتھ دکھائی دے رہے ہیں اور دونوں نے شادی کی انگوٹھیاں پہن رکھی ہیں۔ اگرچہ تصویر میں چہروں کو نہیں دکھایا گیا، تاہم اسے رونالڈو اور جارجینا کی شادی کا اعلان قرار دیا جا رہا ہے۔

رونالڈو نے تصویر کے ساتھ شادی کو "سال کی شادی” قرار دیتے ہوئے اپنی خوشی کا اظہار کیا۔ پرتگالی میڈیا کے مطابق دونوں نے 11 اگست کو لزبن کے قریب ساحلی شہر کاشکائش (Cascais) میں شادی کی، جبکہ ان کے پانچوں بچے بھی تقریب میں شریک ہوئے۔

دس سالہ تعلق شادی میں بدل گیا

کرسٹیانو رونالڈو اور جارجینا روڈریگز گزشتہ تقریباً 10 سال سے ایک دوسرے کے ساتھ ہیں۔

دونوں کی ملاقات میڈرڈ میں ایک Gucci اسٹور پر ہوئی تھی، جہاں جارجینا کام کرتی تھیں۔ اس وقت رونالڈو اسپین کے معروف کلب ریال میڈرڈ کی نمائندگی کر رہے تھے۔

گزشتہ سال 11 اگست کو دونوں نے اپنی منگنی کا اعلان کیا تھا۔ جارجینا نے ایک بڑی ہیرے کی انگوٹھی کی تصویر شیئر کرتے ہوئے اپنی مادری زبان ہسپانوی میں محبت بھرے الفاظ لکھے تھے۔

رونالڈو کے پانچ بچے

کرسٹیانو رونالڈو کے مجموعی طور پر پانچ بچے ہیں، جن میں سے دو جارجینا روڈریگز کے ساتھ ہیں۔

جارجینا نے رونالڈو کے دیگر بچوں کی پرورش میں بھی اہم کردار ادا کیا ہے۔ اس وقت یہ خاندان سعودی عرب کے دارالحکومت ریاض میں رہائش پذیر ہے، جہاں رونالڈو سعودی کلب النصر کی نمائندگی کر رہے ہیں۔

جوڑے کی پہلی بیٹی الانا مارٹینا 2017 میں پیدا ہوئی تھی، جبکہ ان کی سب سے چھوٹی بیٹی بیلا اپریل 2022 میں پیدا ہوئی۔ بیلا کے جڑواں بھائی کی پیدائش کے موقع پر ہی موت ہوگئی تھی۔

رونالڈو کا شاندار فٹبال کیریئر

کرسٹیانو رونالڈو کا شمار فٹبال کی تاریخ کے عظیم ترین کھلاڑیوں میں ہوتا ہے۔ انہوں نے اپنے کیریئر میں پرتگال کے اسپورٹنگ لزبن، مانچسٹر یونائیٹڈ، ریال میڈرڈ، یووینٹس، سعودی عرب کے النصر اور پرتگال کی قومی ٹیم کی نمائندگی کی۔

رونالڈو اپنے کیریئر میں تقریباً 1000 گولز کے سنگ میل کے قریب پہنچ چکے ہیں اور پرتگالی قومی ٹیم کے کپتان بھی ہیں۔

وہ پانچ مرتبہ Ballon d’Or ایوارڈ جیت چکے ہیں، جبکہ ارجنٹائن کے لیونل میسی آٹھ بار یہ اعزاز حاصل کرکے فہرست میں ان سے آگے ہیں۔

النصر کے ساتھ 2027 تک معاہدہ

رونالڈو نے 2022 میں سعودی عرب کے کلب النصر میں شمولیت اختیار کی تھی۔ کلب نے گزشتہ سال ان کے ساتھ مزید دو سال کا معاہدہ کیا تھا، جس کے تحت وہ 2027 تک ریاض میں قائم کلب کا حصہ رہیں گے۔

ررونالڈو نے جارجینا روڈریگز سے شادی کی خبر سامنے آنے کے بعد دنیا بھر میں ان کے مداحوں کی جانب سے مبارکبادوں کا سلسلہ جاری ہے، جبکہ سوشل میڈیا پر بھی جوڑے کی شادی عالمی سطح پر توجہ کا مرکز بن گئی ہے۔

Today cristiano ronaldo married his girlfriend Georgina Rodríguez ♥️ pic.twitter.com/tBaD6w1Y6i
— Denver (@denver_clipsz) August 12, 2026