ایرانی پاسدارانِ انقلاب کا امریکی فضائی اڈے پر جوابی حملے کا دعویٰ
تہران: ایران اور امریکا کے درمیان بڑھتی ہوئی کشیدگی کے دوران ایرانی پاسدارانِ انقلاب نے ایک امریکی فضائی اڈے پر کامیاب جوابی حملہ کرنے کا دعویٰ کیا ہے۔
ایرانی خبر رساں ایجنسی مہر نیوز کے مطابق ایرانی پاسدارانِ انقلاب نے کہا ہے کہ ان کی ایرو اسپیس فورس نے ایک ایسے امریکی فضائی اڈے کو نشانہ بنایا جہاں سے ایران کے صوبہ ہرمزگان میں واقع جزیرہ سِرک کے ٹیلی کمیونیکیشن ٹاور پر حملہ کیا گیا تھا۔
پاسدارانِ انقلاب کے بیان میں کہا گیا ہے کہ امریکی کارروائی کے جواب میں پہلے سے طے شدہ اہداف کو نشانہ بنایا گیا اور متعلقہ فضائی اڈے کو تباہ کر دیا گیا۔ ایرانی حکام کے مطابق یہ کارروائی امریکی حملے کی اطلاع ملنے کے چند گھنٹوں کے اندر انجام دی گئی۔
بیان میں مزید کہا گیا کہ ایران اپنی قومی سلامتی اور خودمختاری کے خلاف کسی بھی اقدام کا بھرپور جواب دینے کی صلاحیت رکھتا ہے اور مستقبل میں بھی ایسے اقدامات کے خلاف سخت ردعمل دیا جائے گا۔
دوسری جانب امریکی سینٹرل کمانڈ (سینٹکام) نے سوشل میڈیا پلیٹ فارم ایکس پر جاری بیان میں دعویٰ کیا ہے کہ امریکی فوج نے آبنائے ہرمز کے قریب واقع ایرانی علاقوں گوروک اور قشم جزیرہ میں مخصوص اہداف کو نشانہ بنایا ہے۔
سینٹکام کے مطابق یہ حملے ایران کی جانب سے ایک امریکی ڈرون مار گرائے جانے کے ردعمل میں کیے گئے۔ امریکی حکام کا کہنا ہے کہ ان کارروائیوں کا مقصد خطے میں امریکی مفادات اور افواج کے تحفظ کو یقینی بنانا ہے۔
تجزیہ کاروں کے مطابق ایران اور امریکا کے درمیان حالیہ فوجی کارروائیوں نے خطے میں کشیدگی کو مزید بڑھا دیا ہے، جبکہ عالمی برادری دونوں ممالک پر تحمل اور سفارتی ذرائع سے مسائل کے حل پر زور دے رہی ہے۔
مشرق وسطیٰ میں جاری اس کشیدہ صورتحال پر عالمی منڈیاں بھی گہری نظر رکھے ہوئے ہیں، خصوصاً آبنائے ہرمز کے حوالے سے کسی بھی پیش رفت کو عالمی توانائی کی سپلائی اور تیل کی قیمتوں کے لیے اہم قرار دیا جا رہا ہے۔
'Until the last American leaves!' and bruised Trump — message on Iranian missile
The IRGC just released footage of the recent missile launches
Iran said the missile targeted a 'US base used in the attack on a telecom tower on Sirik Island,' without naming the location hit pic.twitter.com/Zy7SKn10H1
— RT (@RT_com) June 1, 2026
