کراچی میں اغوا ہونے والے نوجوان کاروباری شخصیت وافلکس کے مالک میر رضا علی کی لاش برآمد، تشدد کے بعد قتل کا شبہ

کراچی میں اغوا ہونے والے نوجوان میر رضا علی کی لاش برآمد، تشدد کے بعد قتل کا شبہ، لاش گلستانِ جوہر بلاک 1 میں شادی قلعہ کے قریب جھاڑیوں سے ملی

کراچی: کراچی کے علاقے پی ای سی ایچ ایس سے مبینہ طور پر اغوا ہونے والے 25 سالہ نوجوان اور معروف ڈیزرٹ برانڈ وافلکس (Wafflix) کے مالک میر رضا علی کی لاش گلستانِ جوہر سے برآمد ہوگئی۔ پولیس کے مطابق ابتدائی شواہد سے شبہ ظاہر کیا جا رہا ہے کہ مقتول کو تشدد کا نشانہ بنانے کے بعد گولی مار کر قتل کیا گیا۔

پولیس کے مطابق میر رضا علی، جو پی ای سی ایچ ایس بلاک 2 کے رہائشی تھے، کی لاش گلستانِ جوہر بلاک 1 میں شادی قلعہ (Shadi Qila) کے قریب جھاڑیوں سے ملی۔ لاش کو ضابطے کی کارروائی کے لیے جناح پوسٹ گریجویٹ میڈیکل سینٹر (JPMC) منتقل کیا گیا جہاں پوسٹ مارٹم کیا گیا۔

تحقیقات کے مطابق نوجوان کاروباری شخصیت وافلکس کے مالک میر رضا علی کی لاش ایک سے دو روز پرانی معلوم ہوتی ہے اور جسم کے مختلف حصوں پر جلنے کے نشانات بھی موجود تھے، جس کے باعث شناخت میں دشواری پیش آئی۔ بعد ازاں مقتول کے والد نے کپڑوں کی مدد سے اپنے بیٹے کی شناخت کی، جبکہ پولیس نے بتایا کہ مقتول کی پشت پر بھی ایک نمایاں نشان موجود تھا۔ تاہم موت کی حتمی وجہ پوسٹ مارٹم رپورٹ آنے کے بعد سامنے آئے گی۔

ایس ایچ او فیروز آباد کامران قریشی کے مطابق ابتدائی شواہد سے معلوم ہوتا ہے کہ مقتول نوجوان میر رضا علی کو پہلے تشدد کا نشانہ بنایا گیا اور بعد ازاں گولی مار کر قتل کیا گیا۔ پولیس نے جائے وقوعہ اور اطراف میں نصب سی سی ٹی وی کیمروں کی فوٹیج حاصل کرنا شروع کر دی ہے تاکہ اغوا اور قتل میں ملوث افراد تک پہنچا جا سکے۔

پولیس کے مطابق مقتول نوجوان کاروباری شخصیت وافلکس کے مالک میر رضا علی کے والد کی مدعیت میں فیروز آباد تھانے میں نامعلوم افراد کے خلاف اغوا کا مقدمہ پہلے ہی درج کیا جا چکا تھا۔

ایف آئی آر کے مطابق 27 اور 28 جولائی کی درمیانی شب وافلکس کے مالک میر رضا علی اپنی دکان سے گھر واپس آئے تھے۔ انہوں نے صبح تقریباً چار بجے اپنی والدہ کو بتایا کہ وہ دس منٹ کے لیے گھر سے باہر جا رہے ہیں، تاہم اس کے بعد واپس نہ آئے۔ اہل خانہ نے متعدد بار ان کے موبائل فون پر رابطہ کرنے کی کوشش کی مگر فون بند ملا۔ بعد ازاں اہل خانہ نے خود تلاش کے ساتھ مددگار 15 سے بھی رابطہ کیا اور پھر پولیس میں اغوا کا مقدمہ درج کروایا۔

واقعے کے بعد سوشل میڈیا پر نوجوان کاروباری شخصیت وافلکس کے مالک کے قتل پر گہرے دکھ اور افسوس کا اظہار کیا جا رہا ہے۔ مختلف سماجی اور کاروباری شخصیات نے واقعے کی شفاف تحقیقات اور ملوث ملزمان کی فوری گرفتاری کا مطالبہ کیا ہے، جبکہ شہریوں نے کراچی میں امن و امان کی صورتحال پر بھی تشویش ظاہر کی ہے۔

پولیس کا کہنا ہے کہ کیس کے مختلف پہلوؤں پر تحقیقات جاری ہیں اور جلد اہم پیش رفت متوقع ہے۔

Mera bhai mera dost, Mir Raza.💔

He built Wafflix into a well-known brand while still studying, a feat most people twice his age struggle to achieve. 

A few days ago, he was kidnapped,Today his body was found.

It's heartbreaking to think that his only "mistake" was believing… pic.twitter.com/yOINtl30eQ
— Saadriaz_Official (@Saadriazkagdi) July 29, 2026