پاکستان کے محمد زبیر نے پیرس میں Tekken 8 ورلڈ چیمپئن شپ جیت لی

پاکستان کے محمد زبیر نے پیرس میں Tekken 8 ورلڈ چیمپئن شپ جیت لی، جنوبی کوریا کے LowHigh سے مسلسل پانچ گیمز جیت کر 5-0 سے کامیابی حاصل کرلی

پیرس: پاکستان کے نوجوان اسپورٹس کھلاڑی محمد زبیر نے پیرس میں ہونے والے Esports World Cup 2026 میں Tekken 8 کی عالمی چیمپئن شپ اپنے نام کرکے ملک کا نام روشن کردیا۔

محمد زبیر نے ہفتے کے روز کھیلے گئے گرینڈ فائنل میں جنوبی کوریا کے معروف کھلاڑی LowHigh کو یکطرفہ مقابلے میں 5-0 سے شکست دے کر عالمی ٹائٹل اپنے نام کیا۔ ٹورنامنٹ 5 سے 8 اگست تک پیرس میں جاری رہا۔

محمد زبیر کی شاندار واپسی

محمد زبیر نے ابتدائی مراحل میں مشکل مقابلوں کے بعد ٹورنامنٹ میں اپنی پوزیشن مضبوط کی اور فیصلہ کن مرحلے تک پہنچنے میں کامیاب رہے۔ عالمی کپ کے دوسرے گروپ مرحلے میں انہوں نے پاکستان کے معروف Tekken کھلاڑی ارسلان ’ایش‘ صدیقی کو شکست دی۔

اس کے بعد سیمی فائنل میں دونوں پاکستانی کھلاڑی ایک مرتبہ پھر آمنے سامنے آئے۔ سنسنی خیز مقابلے میں محمد زبیر نے ارسلان ایش کو 5-4 سے شکست دے کر فائنل میں جگہ بنالی۔

گرینڈ فائنل میں ان کا مقابلہ جنوبی کوریا کے LowHigh سے ہوا، تاہم زبیر نے ابتدا ہی سے برتری قائم رکھی اور مسلسل پانچ گیمز جیت کر 5-0 سے کامیابی حاصل کرلی۔

2 لاکھ 50 ہزار ڈالر کی انعامی رقم

عالمی چیمپئن بننے پر محمد زبیر کو 2 لاکھ 50 ہزار امریکی ڈالر کی انعامی رقم بھی دی گئی۔

Esports World Cup نے محمد زبیر کی کامیابی پر سوشل میڈیا پر انہیں سراہتے ہوئے کہا کہ وہ غیر متوقع طور پر سامنے آئے اور عالمی تاج اپنے نام کرلیا۔

ارسلان ایش چوتھی پوزیشن پر

پاکستان کے ایک اور معروف Tekken اسٹار ارسلان ’ایش‘ صدیقی ایونٹ میں چوتھی پوزیشن حاصل کرسکے۔

ارسلان ایش نے اس سے قبل جون 2026 میں لاس ویگاس میں ہونے والی Evo 2026 چیمپئن شپ جیتی تھی۔ وہ اس مقابلے میں مسلسل چوتھی مرتبہ ٹائٹل جیتنے میں کامیاب ہوئے تھے۔

محمد زبیر کے ہاتھوں سیمی فائنل میں شکست کے بعد ارسلان ایش کا مقابلہ تیسری پوزیشن کے لیے آسٹریلیا کے Yagami سے ہوا، جہاں انہیں شکست کا سامنا کرنا پڑا۔

پاکستان کے لیے اہم کامیابی

محمد زبیر کی یہ کامیابی عالمی اسپورٹس منظرنامے میں پاکستان کے بڑھتے ہوئے اثر و رسوخ کی ایک اور مثال ہے۔ پاکستان پہلے ہی ارسلان ایش جیسے عالمی سطح کے کھلاڑیوں کے ذریعے Tekken اور فائٹنگ گیمز کی دنیا میں اپنی شناخت بنا چکا ہے۔

Esports World Cup میں Tekken 8 کے علاوہ Call of Duty: Black Ops 7، Counter-Strike 2، Dota 2، League of Legends، Street Fighter اور Valorant سمیت متعدد مقبول گیمز کے مقابلے بھی منعقد کیے گئے۔

محمد زبیر کی عالمی چیمپئن شپ نے پاکستانی گیمنگ کمیونٹی کے لیے ایک بڑی کامیابی رقم کی ہے، جبکہ ان کی 2 لاکھ 50 ہزار ڈالر کی انعامی رقم بھی اس کامیابی کی اہمیت کو مزید نمایاں کرتی ہے

🟠 | M. ZUBAIR CHAMPION DE L'EWC SUR TEKKEN 8

Le joueur pakistanais @AGGlobalEsports @ZubairAbdu31256 remporte l'@EWC_EN sur #TEKKEN 8 avec son Dragunov en battant en GF le Bryan du Coréen LowHigh 5-0. Qualifié par le LCQ, il bat notamment sur sa route Arslan Ash et Raef. 🇵🇰 🏆… pic.twitter.com/ELlOHymwS7
— Parlons Esport FGC (@ParlonsFGC) August 8, 2026