نواز شریف نے وزیراعظم آزاد کشمیر کو 100 روزہ اصلاحاتی پروگرام دے دیا

نواز شریف 100 روزہ اصلاحاتی پروگرام کے تحت آزاد کشمیر میں صحت، تعلیم، صفائی، انفراسٹرکچر اور عوامی سہولیات میں بہتری لانے کے لیے اقدامات کرنے کی ہدایت کردی گئی ہے۔

ذرائع کے مطابق مسلم لیگ ن کے صدر نواز شریف سے وزیراعظم آزاد کشمیر افتخار گیلانی اور سپیکر آزاد کشمیر قانون ساز اسمبلی طارق فاروق کی ملاقات ہوئی۔ ملاقات میں وزیراعظم شہباز شریف اور وزیراعلیٰ پنجاب مریم نواز شریف بھی شریک تھے۔

ملاقات کے دوران نواز شریف، وزیراعظم شہباز شریف اور مریم نواز شریف نے آزاد کشمیر کے نومنتخب وزیراعظم افتخار گیلانی اور سپیکر طارق فاروق کو ان کے انتخاب پر مبارکباد دی۔

اس موقع پر نواز شریف نے آزاد کشمیر میں حکومت کے ابتدائی 100 دنوں کے لیے ایک اصلاحاتی منصوبہ وزیراعظم افتخار گیلانی کے ساتھ شیئر کیا۔ انہوں نے ہدایت کی کہ آزاد کشمیر کو جدید ترقی اور بہتر طرز حکمرانی کی جانب لے جانے کے لیے عملی اقدامات تیز کیے جائیں۔

نواز شریف نے وزیراعظم آزاد کشمیر پر زور دیا کہ انتخابی مہم کے دوران عوام سے کیے گئے وعدوں کو ترجیحی بنیادوں پر پورا کیا جائے۔ ان کا کہنا تھا کہ اب ان وعدوں کو عملی شکل دینے کا وقت ہے اور عوام کو حکومتی اقدامات کے نتائج براہ راست نظر آنے چاہئیں۔

انہوں نے کہا کہ آزاد کشمیر کے عوام کو معیاری صحت اور تعلیم کی سہولیات، بہتر سڑکوں اور بنیادی انفراسٹرکچر کی فراہمی ان کا حق ہے۔ ترقی کا دائرہ صرف بڑے شہروں تک محدود رکھنے کے بجائے دور دراز علاقوں تک بھی سہولیات پہنچائی جانی چاہئیں۔

مسلم لیگ ن کے صدر نے نوجوانوں کے لیے تعلیم، فنی تربیت اور روزگار کے مواقع پیدا کرنے پر بھی زور دیا۔ ان کے مطابق 100 روزہ اصلاحاتی پروگرام میں ایسے منصوبوں کو ترجیح دی جائے جن کے ثمرات براہ راست عام شہری تک پہنچ سکیں۔

نواز شریف نے آزاد کشمیر حکومت کو ہدایت کی کہ عوام سے کیے گئے وعدوں کی تکمیل اور اصلاحاتی ایجنڈے پر پیش رفت کی باقاعدہ نگرانی کی جائے تاکہ مقررہ اہداف کے حصول میں تاخیر نہ ہو۔

ملاقات میں وزیراعظم شہباز شریف نے آزاد کشمیر حکومت کو وفاقی حکومت کے مکمل تعاون کی یقین دہانی کرائی۔ انہوں نے کہا کہ آزاد کشمیر کی تعمیر و ترقی وفاقی حکومت کی ترجیحات میں شامل ہے۔

وزیراعظم شہباز شریف کے مطابق آزاد کشمیر کے ترقیاتی منصوبوں اور عوامی فلاح کے اقدامات کے لیے وفاق ہر ممکن وسائل اور تعاون فراہم کرے گا۔ انہوں نے صحت، تعلیم اور بنیادی سہولیات کی بہتری کے لیے وفاقی اور آزاد کشمیر حکومت کے درمیان مؤثر رابطے اور مشترکہ کوششوں کی ضرورت پر زور دیا۔

شہباز شریف نے ترقیاتی منصوبوں کی بروقت تکمیل اور عوامی مسائل کے فوری حل پر بھی خصوصی توجہ دینے کی ہدایت کی۔

انہوں نے آزاد کشمیر کے نوجوانوں کے لیے روزگار، ہنرمندی اور معاشی مواقع بڑھانے کے لیے جامع حکمت عملی تیار کرنے پر زور دیتے ہوئے وزیراعظم افتخار گیلانی کو 100 روزہ اصلاحاتی ایجنڈے پر تیزی سے عملدرآمد یقینی بنانے کی ہدایت کی۔