نتن یاہو ابوظہبی دورہ: محمد بن زاید سے خفیہ ملاقات

نیتن یاہو اچانک خفیہ دورے پر ابوظہبی پہنچ گئے، اماراتی صدر سے اہم ملاقات

اسرائیلی وزیراعظم بنیامین نتن یاہو نے اتوار کو متحدہ عرب امارات کے دارالحکومت ابوظہبی کا غیر اعلانیہ دورہ کیا، جہاں انہوں نے اماراتی صدر شیخ محمد بن زاید آل نہیان سے ملاقات کی۔

ملاقات کی تصدیق کس نے کی؟

رائٹرز کے مطابق ایک سینئر اسرائیلی عہدیدار نے ملاقات کی تصدیق کی ہے۔ تاہم اسرائیلی وزیراعظم کے دفتر اور اماراتی وزارتِ خارجہ کی جانب سے فوری طور پر کوئی باضابطہ بیان جاری نہیں کیا گیا۔

دورے کی تفصیلات

رپورٹس کے مطابق یہ دورہ پہلے سے عوامی طور پر اعلان نہیں کیا گیا تھا۔ اسرائیلی میڈیا کے مطابق نتن یاہو نے نجی طیارے کے ذریعے ابوظہبی کا سفر کیا اور چند گھنٹے قیام کے بعد واپس اسرائیل روانہ ہوگئے۔ اسرائیلی چینل 12 کی رپورٹ کے مطابق قیام تقریباً چار گھنٹے رہا۔ ملاقات کے ایجنڈے یا دونوں رہنماؤں کے درمیان ہونے والی گفتگو کی تفصیلات فوری طور پر سامنے نہیں آئیں۔

ابراہام معاہدوں کا پس منظر

یہ ملاقات ایسے وقت میں ہوئی ہے جب اسرائیل اور متحدہ عرب امارات کے تعلقات کے ساتھ ساتھ خطے کی سکیورٹی صورتحال بھی عالمی توجہ کا مرکز بنی ہوئی ہے۔ دونوں ممالک نے 2020 میں ابراہام معاہدوں کے تحت سفارتی تعلقات قائم کیے تھے، اور اس کے بعد مختلف شعبوں میں روابط برقرار رہے ہیں۔

ہاریٹز کی رپورٹ اور تنازع

نتن یاہو کا یہ دورہ ایک حالیہ تنازع کے پس منظر میں بھی سامنے آیا ہے۔ اسرائیلی اخبار ہاریٹز نے رواں ماہ رپورٹ کیا تھا کہ شیخ محمد بن زاید نے 7 اکتوبر 2023 کے حماس حملے سے تقریباً ڈیڑھ ہفتہ قبل نتن یاہو کو حماس کی جانب سے بڑے آپریشن کی مبینہ تیاری سے آگاہ کیا تھا۔ ہاریٹز کے مطابق یہ انتباہ اسرائیلی انٹیلی جنس اداروں اور فوج تک نہیں پہنچایا گیا۔

اسرائیلی وزیراعظم نے اس رپورٹ کی تردید کی ہے، جبکہ متحدہ عرب امارات نے اس معاملے پر براہِ راست تبصرہ نہیں کیا۔ رائٹرز کے مطابق نتن یاہو ایک سخت انتخابی مہم کا سامنا کر رہے ہیں، جبکہ اپوزیشن رہنماؤں نے ان پر 7 اکتوبر سے قبل سکیورٹی ناکامیوں کی ذمہ داری کا الزام لگایا ہے۔

اماراتی مؤقف

رائٹرز کے مطابق متحدہ عرب امارات نے کہا ہے کہ دونوں ممالک کے درمیان سفارتی تعلقات کے قیام کے بعد سے "کھلے اور براہ راست رابطے” برقرار ہیں۔ ایک اماراتی ذریعے نے ماضی میں کہا تھا کہ ایسے معاملات متعلقہ اداروں کے ذریعے زیر بحث آتے ہیں، قومی رہنماؤں کی سطح پر نہیں۔

ماضی کا ایک اور مبینہ دورہ

رائٹرز کے مطابق رواں سال مئی میں اسرائیلی وزیراعظم کے دفتر نے کہا تھا کہ نتن یاہو نے متحدہ عرب امارات کا "خفیہ دورہ” کیا، جس کی اماراتی حکام نے تردید کی تھی۔ ایک باخبر ذریعے کے مطابق اس وقت دونوں رہنماؤں کی ملاقات 26 مارچ کو ابوظہبی کی سرحد پر واقع شہر العین میں ہوئی تھی۔