نیو بلیو ایریا میں داخلہ فیس کے خلاف درخواست، اسلام آباد ہائیکورٹ سے رجوع

نیو بلیو ایریا میں داخلہ فیس کے خلاف درخواست، اسلام آباد ہائیکورٹ سے رجوع، سروس روڈ استعمال کرنے پر شہریوں سے 100 روپے فیس وصول

اسلام آباد: وفاقی دارالحکومت کے نیو بلیو ایریا میں داخلے پر فیس وصول کرنے کے اقدام کو اسلام آباد ہائیکورٹ میں چیلنج کر دیا گیا ہے۔

میٹروپولیٹن کارپوریشن اسلام آباد (ایم سی آئی) کے خلاف دائر درخواست میں وکیل محمد طیب ایڈووکیٹ نے عدالت سے استدعا کی ہے کہ نیو بلیو ایریا میں داخلے کے لیے فیس وصول کرنے کے اقدام کو غیر قانونی قرار دیا جائے۔

درخواست گزار نے مؤقف اختیار کیا کہ نیو بلیو ایریا ایک اہم تجارتی مرکز ہے جہاں کمرشل مارکیٹس، کارپوریٹ ہیڈکوارٹرز، دفاتر اور ریسٹورنٹس موجود ہیں۔ ضلعی انتظامیہ علاقے کی سروس روڈ استعمال کرنے پر شہریوں سے 100 روپے فیس وصول کر رہی ہے۔

درخواست میں کہا گیا ہے کہ یہ پارکنگ فیس نہیں بلکہ صرف سروس روڈ استعمال کرنے کی فیس ہے، جبکہ اس کے بدلے شہریوں کو کوئی اضافی سہولت یا سروس فراہم نہیں کی جا رہی۔

درخواست گزار کے مطابق عوامی سڑک یا سروس روڈ کے استعمال پر فیس عائد کرنا قانونی اصولوں اور سابقہ عدالتی فیصلوں کے منافی ہے۔ درخواست میں مؤقف اختیار کیا گیا کہ شہریوں سے داخلے کے نام پر رقم وصول کرنا بنیادی حقوق کی خلاف ورزی کے مترادف ہے۔

درخواست گزار نے عدالت سے استدعا کی کہ نیو بلیو ایریا میں داخلہ فیس کو کالعدم قرار دیا جائے اور متعلقہ حکام کو شہریوں سے اس مد میں رقم وصول کرنے سے روکا جائے۔

اسلام آباد ہائیکورٹ میں درخواست دائر ہونے کے بعدنیو بلیو ایریا میں داخلہ فیس کے معاملے پر قانونی اور انتظامی حلقوں میں بحث شروع ہوگئی ہے، جبکہ شہریوں کی جانب سے بھی اس اقدام پر مختلف آراء سامنے آ رہی ہیں۔

نیو بلیو ایریا میں داخلے کے لئے فیس چارج کرنے کا معاملہ اسلام آباد ہائیکورٹ میں چیلنج کر دیا گیا فیس کو غیر قانونی قرار دیکر ختم کرنے کی استدعا ۔۔۔ !! pic.twitter.com/SwixBAQbsC
— Saqib Bashir (@saqibbashir156) June 3, 2026