کویت پاکستان کے ساتھ سعودی عرب کی طرز پر دفاعی معاہدہ چاہتا ہے، توانائی اور سرمایہ کاری بھی زیر غور

پاکستان اور کویت کے درمیان دفاعی تعاون میں توسیع پر بات چیت، توانائی اور سرمایہ کاری بھی زیر غور

اسلام آباد: پاکستان اور کویت کے درمیان دفاعی تعاون کو وسعت دینے کے لیے ابتدائی سطح پر مذاکرات جاری ہیں، جن میں توانائی کے شعبے میں شراکت داری اور سرمایہ کاری کو بھی شامل کیا گیا ہے۔

بین الاقوامی خبر رساں ادارے روئٹرز کی رپورٹ کے مطابق کویت پاکستان کے ساتھ اپنے موجودہ دفاعی معاہدے کو مزید وسعت دینا چاہتا ہے، تاکہ دفاعی تعاون سعودی عرب اور پاکستان کے درمیان موجود شراکت داری کی طرز پر استوار کیا جا سکے۔

رپورٹ کے مطابق دونوں ممالک کے درمیان دفاعی تعاون کے بدلے توانائی، سرمایہ کاری اور اقتصادی روابط بڑھانے پر بھی غور کیا جا رہا ہے۔ ذرائع کا کہنا ہے کہ کویت نے پاکستانی فوج، لڑاکا طیاروں، ڈرونز اور فضائی دفاعی نظام میں گہری دلچسپی ظاہر کی ہے، جبکہ پاکستان توانائی کے شعبے میں تعاون اور سرمایہ کاری کو ترجیح دے رہا ہے۔

ذرائع کے مطابق کویت پاکستان میں ڈیزل کے لیے بانڈڈ فیول اسٹوریج منصوبے میں سرمایہ کاری پر بھی غور کر رہا ہے، جو ملک کی توانائی ذخیرہ کرنے کی صلاحیت بڑھانے میں معاون ثابت ہو سکتا ہے۔

رپورٹ میں مزید بتایا گیا ہے کہ بحرین بھی پاکستان کے ساتھ دفاعی تعاون بڑھانے میں دلچسپی رکھتا ہے، جبکہ اردن نے پاکستانی اسلحے کی خریداری اور عسکری تربیت کے شعبوں میں تعاون کی خواہش ظاہر کی ہے۔

تاہم روئٹرز کے مطابق امریکا اور ایران کے درمیان جاری کشیدگی ان مذاکرات کی رفتار کو متاثر کر سکتی ہے۔ تجزیہ کاروں کا کہنا ہے کہ اگر خطے میں کشیدگی کم ہوتی ہے تو پاکستان اور کویت کے درمیان دفاعی معاہدے میں توسیع کے مذاکرات مزید تیز ہو سکتے ہیں۔

واضح رہے کہ پاکستان اور کویت کے درمیان 2023 سے ایک محدود دفاعی معاہدہ موجود ہے، جس کے تحت دونوں ممالک مشترکہ فوجی مشقوں اور عسکری تربیت میں تعاون کر رہے ہیں۔ اب کویت اس تعاون کو مزید وسعت دے کر ایک جامع دفاعی شراکت داری قائم کرنے کا خواہاں ہے۔

EXCLUSIVE: Pakistan and Kuwait discuss expanded defence pact, sources say https://t.co/AIdpGh7xCT https://t.co/AIdpGh7xCT
— Reuters (@Reuters) July 17, 2026