پاکستان کرغزستان تجارت 2 ارب ڈالر تک بڑھانے کا عزم

پاکستان اور کرغزستان کا دوطرفہ تجارت 2 ارب ڈالر تک بڑھانے پر اتفاق

پاکستان کرغزستان تجارت کو 2 ارب ڈالر تک بڑھانے کے عزم کا اظہار کیا گیا ہے۔ وزیراعظم شہباز شریف نے کہا ہے کہ دونوں ممالک کے درمیان تجارتی حجم میں اضافے کے لیے قوانین اور طریقہ کار کو مزید سہل بنایا جائے گا۔

بشکیک میں وزیراعظم شہباز شریف اور کرغزستان کے صدر صادر ژاپاروف کی موجودگی میں مختلف شعبوں میں تعاون کے معاہدوں اور مفاہمتی یادداشتوں پر دستخط اور دستاویزات کا تبادلہ کیا گیا۔

وزیراعظم شہباز شریف نے کہا کہ پاکستان اور کرغزستان کے درمیان ٹرانزٹ ٹریڈ معاہدہ ایک خوش آئند پیش رفت ہے۔ ان کے مطابق دونوں ممالک کی حکومتیں اور نجی شعبہ تجارتی تعلقات کو وسعت دینے کے لیے مل کر کام کریں گے۔

انہوں نے کہا کہ پاکستان دوطرفہ تجارت کو 2 ارب ڈالر تک بڑھانا چاہتا ہے اور اس مقصد کے لیے کاروباری سرگرمیوں کو آسان بنانے پر توجہ دی جائے گی۔

دونوں ممالک کے درمیان خارجہ امور کی وزارتوں کے درمیان تعاون کے پروگرام سے متعلق دستاویز کا تبادلہ بھی ہوا۔ انسٹیٹیوٹ آف اسٹریٹجک اسٹڈیز اسلام آباد اور کرغز نیشنل انسٹیٹیوٹ فار اسٹریٹجک انیشی ایٹوز کے درمیان بھی مفاہمتی یادداشت کا تبادلہ کیا گیا۔

تعلیم کے شعبے میں تعاون، منشیات اور اسمگلنگ کی روک تھام، طبی تعلیم، سائنسی و تکنیکی تعاون اور ماحولیاتی و موسمیاتی تبدیلی کے شعبوں میں بھی مختلف معاہدے اور مفاہمتی یادداشتیں طے پائیں۔

پاکستان اور کرغزستان نے تجارت کے فروغ کے لیے چیمبرز آف کامرس کے درمیان تعاون بڑھانے پر بھی اتفاق کیا۔ ورچوئل اثاثہ جات، ڈاک کی خدمات اور ای کامرس کے شعبوں میں تعاون کے لیے بھی دستاویزات کا تبادلہ کیا گیا۔

دونوں ممالک کے درمیان ملزمان کی حوالگی سے متعلق معاہدہ بھی ہوا، جبکہ لاہور اور کرغزستان کے شہر اوش کو جڑواں شہر قرار دینے کے معاہدے کی دستاویز بھی مکمل کی گئی۔ اس اقدام سے دونوں شہروں کے درمیان عوامی، ثقافتی اور تجارتی روابط کو مزید فروغ دینے کی توقع ہے۔

وزیراعظم شہباز شریف نے کہا کہ پاکستان اور کرغزستان تعلیم، سائنس و ٹیکنالوجی اور ثقافت سمیت مختلف شعبوں میں تعاون بڑھائیں گے۔ انہوں نے کاسا 1000 توانائی منصوبے کو آگے بڑھانے کے لیے مشترکہ وزارتی گروپ کے قیام کو بھی خوش آئند قرار دیا۔

وزیراعظم کے مطابق پاکستان اور کرغزستان دہشت گردی اور انتہا پسندی کے خلاف مل کر کام کریں گے جبکہ موسمیاتی تبدیلی کے اثرات سے نمٹنے کے لیے بھی دونوں ممالک کے درمیان تعاون بڑھایا جائے گا۔

شہباز شریف نے کہا کہ کرغزستان وسطی ایشیا میں پاکستان کا ایک اہم شراکت دار ہے اور دونوں ممالک کے درمیان مختلف دوطرفہ، علاقائی اور عالمی فورمز پر تعاون کو مزید فروغ دیا جائے گا۔

کرغزستان کے صدر صادر ژاپاروف نے پاکستان کے ساتھ دوطرفہ تعاون مزید بڑھانے کی خواہش کا اظہار کیا۔ انہوں نے کہا کہ دونوں ممالک کے درمیان سرمایہ کاری کے وسیع مواقع موجود ہیں اور اعلیٰ سطح کے روابط کو مزید فروغ دیا جائے گا۔

دونوں رہنماؤں نے پاکستان اور کرغزستان کے تعلقات کو نئی بلندیوں تک لے جانے کے عزم کا اظہار کیا۔ وزیراعظم شہباز شریف نے کرغز صدر کو پاکستان کے دورے کی دعوت بھی دی۔