تیل و گیس تلاش کے لیے پاکستان اور ترکیہ کے درمیان 5 اہم توانائی معاہدوں پر دستخط

ترک وزیرِ توانائی و قدرتی وسائل الپ ارسلان بائرقدار اور ان کے اعلیٰ سطحی وفد کے دورۂ پاکستان کے دوران تیل و گیس تلاش کے لیے پاکستان اور ترکیہ کے درمیان 5 اہم توانائی معاہدوں پر دستخط ،

پاکستان اور ترکیہ نے توانائی اور معدنیات کے شعبوں میں تعاون کو تاریخی سطح تک لے جاتے ہوئے تیل و گیس کی تلاش کے لیے 5 اہم مفاہمتی یادداشتوں اور تفویضِ حقوق کی دستاویزات پر دستخط کر دیے۔ یہ پیش رفت ترک وزیرِ توانائی و قدرتی وسائل الپ ارسلان بائرقدار اور ان کے اعلیٰ سطحی وفد کے دورۂ پاکستان کے دوران ہوئی۔

وزیراعظم شہباز شریف، آرمی چیف فیلڈ مارشل عاصم منیر، وزیر پیٹرولیم علی پرویز ملک اور وزیر توانائی اویس لغاری سے ترک وفد کی اہم ملاقاتیں ہوئیں، جن میں دوطرفہ توانائی تعاون، سرمایہ کاری اور معدنی منصوبوں پر تفصیلی تبادلہ خیال کیا گیا۔

وزیراعظم شہباز شریف نے پاکستان اور ترکیہ کے درمیان 5 اہم توانائی معاہدوں پر دستخط کی تقریب میں شرکت کرتے ہوئے پاکستان اور ترکیہ کے تاریخی برادرانہ تعلقات کا ذکر کیا اور کہا کہ تیل و گیس کی تلاش کے شعبے میں ترک کمپنیوں کی شمولیت دوطرفہ تعاون میں ایک سنگِ میل ہے۔ انہوں نے بتایا کہ ایسٹرن آف شور انڈس-سی، زیارت نارتھ بلاک، سکھپور-ٹو بلاک، ڈیپ سی بلاک اور آف شور ڈیپ ایف بلاک سے متعلق پیٹرولیم کنسیشن معاہدے طے پا گئے ہیں۔

سرکاری اعلامیے کے مطابق دونوں ممالک نے توانائی، پیٹرولیم اور معدنیات کے شعبوں میں تعاون بڑھانے پر اتفاق کیا۔ وزیراعظم نے ترک کمپنیوں کو پاکستان میں سرمایہ کاری میں اضافے کی دعوت دیتے ہوئے کہا کہ بدلتے ہوئے علاقائی حالات میں پاکستان اور ترکیہ کے درمیان قریبی تعاون وقت کی اہم ضرورت ہے۔

ترک وزیر توانائی الپ ارسلان بائرقدار نے پاکستان کی معدنی اور توانائی صلاحیتوں کو سراہتے ہوئے کہا کہ ترکیہ تیل و گیس کی تلاش، انفراسٹرکچر اور معدنیات کے شعبے میں مزید منصوبوں کا خواہاں ہے۔ انہوں نے کہا کہ جاری اورپاکستان اور ترکیہ کے درمیان 5 اہم توانائی معاہدوں پر دستخط دونوں ممالک کے درمیان 5 ارب ڈالر کی باہمی تجارت کے ہدف کے حصول میں اہم کردار ادا کریں گے۔

ترک وزیر نے یہ بھی بتایا کہ ترک پیٹرولیم کا دفتر اسلام آباد میں اسی ماہ کھولا جا رہا ہے، جہاں 10 ترک ماہرین اور مقامی عملہ توانائی منصوبوں پر مشترکہ طور پر کام کرے گا۔ دونوں ممالک نے تیل و گیس کی خریداری کے لیے ایک مشترکہ تجارتی کمپنی قائم کرنے کے تصور کو بھی آگے بڑھانے پر اتفاق کیا ہے۔

ماڑی انرجیز، او جی ڈی سی ایل اور پی پی ایل کے سربراہان نے ترک وفد کو بریفنگ دیتے ہوئے شیل گیس، ٹائٹ گیس، معدنیات اور کان کنی میں مشترکہ منصوبوں اور ٹیکنالوجی پارٹنرشپ کے وسیع امکانات پر روشنی ڈالی۔

وزیرِ توانائی اویس لغاری نے ترک نجی شعبے کے سرمایہ کاروں کو بجلی کی تقسیم کار کمپنیوں (ڈسکوز) کی نجکاری کے پہلے مرحلے میں شامل ہونے کی دعوت بھی دی۔ انہوں نے بتایا کہ ڈسکوز کی نجکاری سے پاکستان کے توانائی نظام میں بہتری اور بیرونی سرمایہ کاری میں اضافہ ہوگا۔

اعلامیے کے مطابق پاکستان اور ترکیہ نے سرمایہ کاری میں سہولت کاری بڑھانے، مشترکہ منصوبے شروع کرنے اور توانائی تعاون کی مکمل صلاحیت کو اجاگر کرنے پر اتفاق کیا ہے۔ پاکستان اور ترکیہ کے درمیان 5 اہم توانائی معاہدوں پر دستخط دونوں ممالک کے درمیان معاشی اور توانائی شراکت داری کے ایک نئے دور کا آغاز ہیں۔

وزیر اعظم محمد شہباز شریف سے جمہوریہ ترکیہ کے توانائی اور قدرتی وسائل کے وزیر الپرسلان بیریکتر کی ملاقات

وزیراعظم نے دوطرفہ تعلقات کی مثبت رفتار پر اطمینان کا اظہار کیا اور ترکیہ کے ساتھ بالخصوص توانائی کے شعبے میں تعاون کو مزید وسعت دینے کے لیے پاکستان کے پختہ عزم کا اعادہ کیا۔… pic.twitter.com/CHkYQ0lwu4
— Government of Pakistan (@GovtofPakistan) December 2, 2025