پمز ہسپتال آتشزدگی: وزیرِ صحت مصطفیٰ کمال سے استعفے کا مطالبہ

پمز ہسپتال آتشزدگی: 14 نومولود بچوں کی ہلاکت، وزیر صحت مصطفیٰ کمال سے استعفے کا مطالبہ، وزیر صحت نے واقعے کو افسوسناک قرار دیتے ہوئے کہا ہے کہ تحقیقات جاری ہیں

اسلام آباد: پاکستان انسٹیٹیوٹ آف میڈیکل سائنسز (پمز) کے چلڈرنز وارڈ کی نرسری میں خوفناک آتشزدگی کے نتیجے میں 14 نومولود بچوں کے جاں بحق ہونے کے بعد واقعے پر شدید تشویش اور غم و غصے کا اظہار کیا جا رہا ہے۔ سابق وفاقی وزرا فواد چوہدری اور شیریں مزاری نے وفاقی وزیر صحت مصطفیٰ کمال سے استعفے کا مطالبہ کردیا ہے۔

واقعے کے بعد ہسپتال انتظامیہ اور متعلقہ حکام کی جانب سے تحقیقات جاری ہیں، جبکہ آتشزدگی کی وجوہات، ہسپتال کے حفاظتی انتظامات اور امدادی کارروائیوں کا جائزہ لینے کے لیے 8 رکنی انکوائری کمیٹی تشکیل دے دی گئی ہے۔

فواد چوہدری کا وزیر صحت مصطفیٰ کمال سے استعفے کا مطالبہ

سابق وفاقی وزیر فواد چوہدری نے سماجی رابطے کی ویب سائٹ ایکس پر جاری بیان میں کہا کہ بچوں کی وارڈ میں آتشزدگی سے نومولود بچوں کی جانیں جانے کی ذمہ داری قبول کرتے ہوئے وفاقی وزیر صحت مصطفیٰ کمال کو استعفیٰ دینا چاہیے۔

فواد چوہدری کا کہنا تھا کہ اتنے بڑے اور اندوہناک واقعے کے ذمہ دار ہسپتال انتظامیہ کے خلاف سخت کارروائی ہونی چاہیے۔ صرف معطلی یا تبادلہ کافی نہیں بلکہ واقعے کے ذمہ دار افراد کا تعین کرکے ان کے خلاف مؤثر قانونی کارروائی ضروری ہے۔

انہوں نے مزید کہا کہ وفاقی وزیر صحت کو اس واقعے سے بری الذمہ قرار نہیں دیا جا سکتا اور حکومت کو واقعے کی مکمل ذمہ داری کا تعین کرنا چاہیے۔

شیریں مزاری نے بھی مصطفیٰ کمال سے استعفے کے مطالبے کی حمایت کردی

سابق وفاقی وزیر شیریں مزاری نے فواد چوہدری کے بیان کی حمایت کرتے ہوئے کہا کہ پاکستان میں ایسے افسوسناک واقعات پر اعلیٰ حکام کی جانب سے ذمہ داری قبول کرکے استعفیٰ دینے کی روایت بہت کم ہے۔

شیریں مزاری نے ماضی میں پیش آنے والے ٹرین حادثات کا حوالہ دیتے ہوئے کہا کہ پمز کا واقعہ انتہائی ہولناک ہے۔

انہوں نے پمز اور چلڈرنز ہسپتال کی صورتحال پر بھی تشویش کا اظہار کیا اور کہا کہ یہ ادارے غفلت، بدانتظامی اور ابتری کا شکار ہیں۔

ان کے مطابق ماضی میں ’فرینڈز آف چلڈرنز ہسپتال‘ کے نام سے ایک فعال گروپ موجود تھا جو حکومتی فنڈنگ کی کمی سے پیدا ہونے والے خلا کو پورا کرنے میں مدد کرتا تھا، تاہم انہیں معلوم نہیں کہ یہ گروپ اب بھی فعال ہے یا نہیں۔

وزیر صحت مصطفیٰ کمال کا مؤقف

وفاقی وزیر صحت مصطفیٰ کمال نے پمز نرسری میں آتشزدگی کے واقعے کو افسوسناک قرار دیتے ہوئے کہا ہے کہ تحقیقات جاری ہیں۔

میڈیا سے گفتگو کرتے ہوئے وزیر صحت نے بتایا کہ 14 بچوں کے جاں بحق ہونے کی تصدیق ہوچکی ہے۔ ان کا کہنا تھا کہ تعطیل کے باوجود پمز میں متعلقہ عملہ ڈیوٹی پر موجود تھا۔

مصطفیٰ کمال کے مطابق نرسری میں آگ لگنے کے بعد بجلی بھی چلی گئی تھی۔ انہوں نے بتایا کہ متعلقہ حکام متاثرہ بچوں کے والدین اور لواحقین سے رابطے میں ہیں جبکہ ڈائریکٹر جنرل ہیلتھ اور سیکریٹری پمز میں موجود ہیں۔

وزیر صحت کا کہنا تھا کہ پمز کے ایگزیکٹو ڈائریکٹر بھی ان سے مسلسل رابطے میں ہیں اور وہ خود بھی کراچی سے اسلام آباد پہنچ رہے ہیں۔

8 رکنی انکوائری کمیٹی تشکیل

حکام نے واقعے کی تحقیقات کے لیے ایڈیشنل ڈپٹی کمشنر جنرل کی سربراہی میں 8 رکنی انکوائری کمیٹی تشکیل دے دی ہے۔

کمیٹی میں ڈی جی کیپٹل ایمرجنسی سروسز، ایس پی سی ٹی اسلام آباد، اسسٹنٹ کمشنر انڈسٹریل ایریا، ڈی جی ایمرجنسی سی ڈی اے، آئیسکو اور پمز کے نمائندے شامل ہیں۔

حکام کے مطابق کمیٹی کے ٹرمز آف ریفرنس (TORs) بھی جاری کردیئے گئے ہیں اور 24 گھنٹے میں رپورٹ طلب کی گئی ہے۔

کمیٹی آتشزدگی کی وجوہات کا تعین کرنے کے ساتھ ساتھ ہسپتال میں موجود فائر سیفٹی انتظامات کا جائزہ لے گی۔ اس کے علاوہ امدادی کارروائیوں، ریسکیو رسپانس ٹائم اور فائر فائٹنگ آپریشن کا بھی جائزہ لیا جائے گا۔

امدادی سرگرمیوں میں فائر فائٹرز اور ایمبولینسز شریک

اسلام آباد انتظامیہ کے مطابق آتشزدگی کے بعد فائر بریگیڈ اور ریسکیو ٹیموں نے فوری کارروائی کرتے ہوئے آگ پر قابو پانے کی کوشش کی۔

انتظامیہ کے مطابق امدادی سرگرمیوں میں فائر فائٹرز اور 6 ایمبولینسز نے حصہ لیا۔

آئی جی اسلام آباد علی ناصر رضوی نے بھی چیف کمشنر سہیل اشرف کو امدادی سرگرمیوں کے حوالے سے بریفنگ دی۔

دوسری جانب ایگزیکٹو ڈائریکٹر پمز عمران سکندر کا کہنا ہے کہ واقعے کی تمام پہلوؤں سے تحقیقات کی جائیں گی اور یہ معلوم کیا جا رہا ہے کہ وارڈ میں آگ لگنے کی اصل وجہ کیا تھی۔

واقعے نے ہسپتالوں کے حفاظتی انتظامات پر سوالات اٹھا دیے

پمز نرسری میں نومولود بچوں کی ہلاکت کے بعد ملک بھر میں سرکاری ہسپتالوں کے فائر سیفٹی اور ایمرجنسی انتظامات پر بھی سوالات اٹھ رہے ہیں۔

متاثرہ خاندانوں کی جانب سے مطالبہ کیا جا رہا ہے کہ واقعے کی شفاف تحقیقات کی جائیں اور اگر کسی انتظامی غفلت یا حفاظتی کوتاہی کا تعین ہوتا ہے تو ذمہ دار افراد کے خلاف قانون کے مطابق کارروائی کی جائے۔

حکام کی جانب سے قائم کردہ انکوائری کمیٹی کی رپورٹ سامنے آنے کے بعد ہی آتشزدگی کی اصل وجہ، ممکنہ غفلت اور ذمہ داری کا حتمی تعین ہوسکے گا۔

واضح رہے کہ وزیر صحت مصطفیٰ کمال سے استعفے کا مطالبہ سابق وفاقی وزرا فواد چوہدری اور شیریں مزاری نے کیا ہے، جبکہ حکومت کی جانب سے تاحال وزیر صحت کے استعفے کا کوئی فیصلہ سامنے نہیں آیا۔

مصطفی کمال کی میڈیا ٹاک کے دوراں سخت سوالات، مصطفی کمال آپے سے باہر
اگر مجھے وزیر بنے دو ڈھائی سال ہو گئے ہیں تو مجھے ابھی Shoot کر دیجیے گا، مصطفیٰ کمال pic.twitter.com/NEjG4qVHJv
— Ali Tanoli (@alitanoli889) August 26, 2026