پنجاب میں خصوصی انسداد پولیو مہم 21 ستمبر سے شروع ہوگی

پنجاب کے 13 اضلاع میں خصوصی انسداد پولیو مہم 21 ستمبر سے شروع ہوگی

پنجاب انسداد پولیو مہم 21 ستمبر سے صوبے کے 13 اضلاع میں شروع ہوگی، جس کے لیے محکمہ صحت نے تمام انتظامات مکمل کرنے کی ہدایت کردی ہے۔ خصوصی مہم 21 سے 27 ستمبر تک جاری رہے گی اور اس دوران ایک کروڑ 6 لاکھ 48 ہزار سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔

صوبائی ٹاسک فورس برائے انسداد پولیو کا اجلاس سول سیکرٹریٹ لاہور میں صوبائی وزیر صحت خواجہ سلمان رفیق کی زیر صدارت ہوا۔ اجلاس میں پنجاب میں پولیو کے خاتمے کیلئے جاری اقدامات اور آئندہ مہم کی تیاریوں کا تفصیلی جائزہ لیا گیا۔

اجلاس میں حکام نے صوبے میں پولیو کے خاتمے کیلئے جاری کوششوں پر اطمینان کا اظہار کیا اور خصوصی مہم کو مزید مؤثر بنانے کے عزم کا اظہار کیا۔

اجلاس میں چیف سیکرٹری پنجاب زاہد اختر زمان، وزیراعلیٰ پنجاب کی فوکل پرسن برائے انسداد پولیو عظمیٰ کاردار، سیکرٹری پرائمری ہیلتھ کیئر، محکمہ صحت کے اعلیٰ افسران، پولیو کے خاتمے کیلئے کام کرنے والے بین الاقوامی اداروں کے نمائندگان، ڈویژنل کمشنرز اور ڈپٹی کمشنرز شریک ہوئے۔ ڈویژنل کمشنرز اور ڈپٹی کمشنرز نے ویڈیو لنک کے ذریعے اجلاس میں شرکت کی۔

حکام نے بریفنگ میں بتایا کہ خصوصی مہم پنجاب کے 13 اضلاع میں منعقد کی جائے گی۔ لاہور میں مہم سات روز تک جاری رہے گی جبکہ دیگر ہدف شدہ اضلاع میں ویکسینیشن سرگرمیاں چار روز تک جاری رہیں گی۔

بریفنگ کے مطابق مہم 8 اضلاع میں مکمل طور پر جبکہ 5 اضلاع میں جزوی طور پر منعقد ہوگی۔ لاہور، ملتان، راولپنڈی، ڈیرہ غازی خان، مظفرگڑھ، راجن پور، رحیم یار خان اور شیخوپورہ میں مکمل مہم چلائی جائے گی۔

اٹک، بہاولپور، فیصل آباد، قصور اور میانوالی کے مخصوص علاقوں اور یونین کونسلز کو بھی مہم میں شامل کیا گیا ہے، جہاں مقررہ علاقوں میں پانچ سال تک کی عمر کے بچوں کو پولیو سے بچاؤ کے قطرے پلائے جائیں گے۔

محکمہ صحت کے مطابق مہم کے دوران مجموعی طور پر 1,376 ہدف شدہ یونین کونسلز کا احاطہ کیا جائے گا۔ اس مقصد کیلئے 39,774 ٹیمیں تشکیل دی گئی ہیں جبکہ 77,488 اہلکار مختلف ذمہ داریاں انجام دیں گے۔

مہم میں گھر گھر ویکسینیشن کیلئے 36,420 موبائل ٹیمیں کام کریں گی۔ یہ ٹیمیں 81 لاکھ 67 ہزار سے زائد بچوں تک پہنچ کر انہیں پولیو سے بچاؤ کے قطرے پلائیں گی۔

مقررہ مراکز پر ویکسینیشن کیلئے 2,060 فکسڈ ٹیمیں بھی تعینات کی گئی ہیں۔ اس کے علاوہ ایک شہر یا ضلع سے دوسرے علاقے میں سفر کرنے والے بچوں کو پولیو سے محفوظ رکھنے کیلئے 1,294 ٹرانزٹ ٹیمیں تشکیل دی گئی ہیں۔

صوبائی وزیر صحت خواجہ سلمان رفیق نے اجلاس سے خطاب کرتے ہوئے کہا کہ پولیو کے مکمل خاتمے کیلئے مہم میں موجود خامیوں کو دور کرنا ضروری ہے۔ انہوں نے متعلقہ حکام کو ہدایت کی کہ پانچ سال تک کی عمر کے ہر بچے تک پولیو ویکسین پہنچانے کیلئے تمام دستیاب وسائل بروئے کار لائے جائیں۔

خواجہ سلمان رفیق نے کہا کہ جو بچے گھروں پر موجود نہ ہوں یا کسی وجہ سے مہم کے دوران ویکسین سے رہ جائیں، ان کی دوبارہ کوریج ہر صورت یقینی بنائی جائے۔

انہوں نے زیادہ نقل و حرکت والے اور ہائی رسک علاقوں میں خصوصی توجہ دینے کی ہدایت بھی کی۔ ان کے مطابق بس اڈوں، سفری راستوں اور انٹری و ایگزٹ پوائنٹس پر ٹرانزٹ ٹیموں کو فعال رکھا جائے تاکہ سفر کرنے والے بچوں کی ویکسینیشن بھی یقینی بنائی جاسکے۔

صوبائی وزیر صحت نے یو سی ایم اوز اور ایریا انچارجز کو مہم کی سخت نگرانی اور مؤثر مانیٹرنگ کرنے کی ہدایت کی، جبکہ چیف سیکرٹری پنجاب زاہد اختر زمان نے متعلقہ اضلاع کے ڈپٹی کمشنرز کو مہم کی خود نگرانی کرنے کا کہا۔

چیف سیکرٹری نے مسڈ چلڈرن کی دوبارہ کوریج پر خصوصی توجہ دینے کی ہدایت کی تاکہ کوئی بچہ پولیو ویکسین سے محروم نہ رہ جائے۔

اجلاس کے دوران ویکسینیشن ٹیموں کی تعیناتی، ٹرانزٹ پوائنٹس، ہائی رسک علاقوں، مسڈ چلڈرن کی کوریج اور دیگر انتظامی امور کا بھی جائزہ لیا گیا۔ حکام نے مہم کے دوران مقررہ اہداف حاصل کرنے اور ویکسینیشن کے عمل کو مؤثر بنانے کیلئے اقدامات پر بریفنگ دی۔

محکمہ صحت کی جانب سے تشکیل دی گئی بڑی تعداد میں موبائل، فکسڈ اور ٹرانزٹ ٹیموں کا مقصد بچوں تک ویکسین کی رسائی کو یقینی بنانا ہے۔ خصوصی مہم کے دوران گھر گھر ویکسینیشن کے ساتھ ساتھ ایسے مقامات پر بھی توجہ دی جائے گی جہاں بچوں کی نقل و حرکت زیادہ ہوتی ہے۔