برلن میں رضا پہلوی پر سرخ مائع پھینک دیا گیا، دورہ جرمنی کے دوران واقعہ، امریکا اور اسرائیل کے مؤقف کی حمایت پر مختلف حلقوں کی جانب سے تنقید بھی سامنے آ رہی ہے
برلن: ایران کے سابق شاہی خاندان سے تعلق رکھنے والے رہنما رضا پہلوی پر جرمنی کے دارالحکومت برلن میں ایک پریس کانفرنس کے مقام سے باہر نکلتے ہی نامعلوم افراد نے سرخ مائع پھینک دیا، جس کے بعد سیکیورٹی صورتحال پر سوالات اٹھ گئے ہیں۔
رپورٹس کے مطابق رضا پہلوی جرمنی میں ایک نجی دورے پر موجود تھے جہاں وہ مختلف سیاسی شخصیات، میڈیا نمائندگان اور جرمنی میں مقیم ایرانیوں سے ملاقاتیں کرنے والے تھے۔ انہوں نے اس سے قبل سوشل میڈیا پلیٹ فارم X (Twitter) پر اپنے پروگرام کی تفصیلات بھی شیئر کی تھیں۔
جرمن حکومت نے واضح کیا ہے کہ رضا پہلوی کا دورہ ’نجی دعوت‘ پر ہے اور ان کے اور حکومتی نمائندوں کے درمیان کسی باضابطہ ملاقات کا کوئی منصوبہ نہیں تھا۔
ذرائع کے مطابق حالیہ ہفتوں میں رضا پہلوی نے متعدد یورپی ممالک کا دورہ کیا، جہاں انہوں نے سیاست دانوں اور میڈیا سے ملاقاتیں کیں اور ایران میں جاری صورتحال پر عالمی دباؤ بڑھانے کی بات کی۔
دوسری جانب رضا پہلوی اور ان کے حامیوں کی ایران کے خلاف امریکا اور اسرائیل کے مؤقف کی حمایت پر مختلف حلقوں کی جانب سے تنقید بھی سامنے آ رہی ہے۔ بعض ناقدین کا کہنا ہے کہ ان کے بیانات نے احتجاج اور مخالفت کو مزید بڑھایا ہے۔
سیاسی مبصرین کے مطابق برلن میں پیش آنے والا رضا پہلوی پر سرخ مائع پھینکنے کا واقعہ اس بڑھتی ہوئی کشیدگی اور اختلافِ رائے کی عکاسی کرتا ہے جو ایرانی اپوزیشن کے مختلف دھڑوں اور عالمی سیاست کے تناظر میں دیکھنے کو مل رہی ہے۔
تاحال رضا پہلوی پر سرخ مائع پھینکنے کے واقعے میں ملوث افراد کے بارے میں کوئی سرکاری تفصیلات سامنے نہیں آئیں، جبکہ حکام واقعے کی تحقیقات کر رہے ہیں۔
Reza Pahlavi wurde vor der Bundespressekonferenz soeben von einem Aktivisten mit Farbe attackiert pic.twitter.com/m9eWmmEqgb
— Tilo Jung (@TiloJung) April 23, 2026
