سری لنکا کے رومیش پاتھیرج نے ایشین گیمز میں جیولین تھرو کا گولڈ میڈل جیت لیا، ارشد ندیم چوتھے نمبر پر

سری لنکا کے رومیش پاتھیرج نے ایشین گیمز میں جیولین تھرو کا گولڈ میڈل جیت لیا، ارشد ندیم چوتھے نمبر پر

ناگویا، جاپان، 28 ستمبر 2026: سری لنکا کے اسٹار جیولین تھروور رومیش تھرنگا پاتھیرج نے ایشین گیمز 2026 میں مردوں کے جیولین تھرو مقابلے میں شاندار کارکردگی کا مظاہرہ کرتے ہوئے گولڈ میڈل جیت لیا، جبکہ بھارت کے یشویر سنگھ نے سلور اور روہت یادیو نے برونز میڈل حاصل کیا۔

رومیش پاتھیرج نے اپنے آخری تھرو میں 88.55 میٹر کی شاندار کوشش کرکے طلائی تمغہ اپنے نام کیا۔ بھارت کے یشویر سنگھ نے 85.72 میٹر کی ذاتی بہترین کارکردگی کے ساتھ دوسری پوزیشن حاصل کی، جبکہ روہت یادیو 84.35 میٹر کے تھرو کے ساتھ تیسرے نمبر پر رہے۔

ارشد ندیم میڈل سے محروم

پاکستان کے اولمپک گولڈ میڈلسٹ ارشد ندیم ایشین گیمز کے جیولین تھرو فائنل میں چوتھے نمبر پر رہے۔ ارشد ندیم کی بہترین کوشش 80.29 میٹر رہی، جو ان کا رواں سیزن کا بہترین تھرو بھی قرار دیا گیا ہے۔

ارشد ندیم نے پہلی کوشش میں 76.69 میٹر کا تھرو کیا، جبکہ دوسری کوشش فاؤل قرار دی گئی۔ تیسری کوشش میں انہوں نے 80.29 میٹر کا تھرو کیا، تاہم یہ فاصلہ انہیں پوڈیم تک پہنچانے کے لیے کافی ثابت نہ ہوسکا۔

پاکستان کے ایک اور ایتھلیٹ محمد یاسر بھی فائنل میں شریک تھے، تاہم وہ 73.50 میٹر کی بہترین کوشش کے ساتھ نویں نمبر پر رہے۔

پاتھیرج کی شاندار سیزن میں ایک اور بڑی کامیابی

رومیش پاتھیرج کے لیے ایشین گیمز کا گولڈ میڈل 2026 کے غیر معمولی سیزن میں ایک اور بڑی کامیابی ہے۔ وہ اس سال عالمی سطح پر جیولین تھرو کے نمایاں ایتھلیٹس میں شامل رہے ہیں اور مختلف بڑے مقابلوں میں بھی طلائی تمغے جیت چکے ہیں۔

پاتھیرج نے مقابلے کے دوران ابتدا میں 73.53 میٹر کا تھرو کیا، تاہم بعد میں اپنی کارکردگی میں نمایاں بہتری لاتے ہوئے چوتھی کوشش میں 88.33 میٹر کا تھرو کیا۔ آخری کوشش میں 88.55 میٹر کی تھرو کے ساتھ انہوں نے گولڈ میڈل یقینی بنایا۔

رواں سال جون میں پاتھیرج نے روم ڈائمنڈ لیگ میں 92.62 میٹر کا قومی ریکارڈ قائم کیا تھا، جو اس سیزن کی عالمی سطح پر بہترین کارکردگی بھی رہی ہے۔

بھارت کے دو ایتھلیٹس ایک ساتھ پوڈیم پر

یشویر سنگھ نے آخری کوشش میں 85.72 میٹر کا تھرو کرکے نہ صرف سلور میڈل حاصل کیا بلکہ اپنی ذاتی بہترین کارکردگی بھی بہتر بنائی۔ روہت یادیو نے 84.35 میٹر کی کوشش کے ساتھ برونز میڈل جیتا۔

یوں ایشین گیمز کے جیولین تھرو مقابلے میں سری لنکا نے گولڈ جبکہ بھارت نے سلور اور برونز میڈلز اپنے نام کیے۔

بھارت کے دفاعی چیمپئن نیرج چوپڑا انجری کے باعث ایشین گیمز میں شرکت نہیں کرسکے۔ وہ 2022 کے ہانگژو ایشین گیمز میں جیولین تھرو کا گولڈ میڈل جیت چکے تھے۔

ایشین گیمز میں پاتھیرج کی کامیابی نے جنوبی ایشیا میں جیولین تھرو کے مقابلوں میں پاکستان، بھارت اور سری لنکا کی موجودگی کو مزید نمایاں کردیا ہے۔

GOLD FOR SRI LANKA 🥇🇱🇰

World No. 1 Rumesh Tharanga wins GOLD in the men’s javelin throw at the Asian Games in Nagoya, Japan, with a stunning throw of 88.55m

Congratulations, Rumesh!
What an achievement 👏 👏🇱🇰 pic.twitter.com/Ocb0d4VLG6
— Sri Lanka Tweet 🇱🇰 (@SriLankaTweet) September 28, 2026