شیشہ کیفے پابندی: ہائیکورٹ میں انٹرا کورٹ اپیل منظور

شیشہ کیفے پابندی کیس: اسلام آباد ہائیکورٹ نے اپیل سماعت کے لیے منظور کر لی، فریقین کو نوٹس جاری

شیشہ کیفے پابندی کے معاملے پر اسلام آباد ہائیکورٹ میں اہم پیش رفت سامنے آئی ہے، جہاں وفاقی دارالحکومت میں شیشہ کیفوں پر پابندی کے سنگل بنچ کے فیصلے کے خلاف دائر انٹرا کورٹ اپیل سماعت کے لیے منظور کر لی گئی۔ عدالت نے اپیل پر فریقین کو نوٹس جاری کرتے ہوئے جواب طلب کر لیا اور سماعت ملتوی کر دی۔

کیس کی سماعت جسٹس انعام امین منہاس اور جسٹس ایاز شوکت پر مشتمل ڈویژن بنچ نے کی۔ درخواست گزاران کی جانب سے بیرسٹر عادل عزیز قاضی عدالت میں پیش ہوئے اور مؤقف اختیار کیا کہ سنگل بنچ کے فیصلے پر عملدرآمد روکا جائے۔

سماعت کے دوران عدالت کے ریمارکس اور وکیل کے دلائل

سماعت کے دوران درخواست گزار کے وکیل نے استدعا کی کہ انٹرا کورٹ اپیل کے حتمی فیصلے تک شیشہ کیفوں پر پابندی سے متعلق عدالتی فیصلے پر عملدرآمد معطل کیا جائے۔ انہوں نے خاص طور پر سنگل بنچ کے فیصلے کے پیراگراف 30 پر عملدرآمد روکنے کی درخواست کی۔ وکیل کا کہنا تھا کہ این او سی ملنے کے بعد درخواست گزاروں نے کروڑوں روپے کی سرمایہ کاری کی، لہٰذا انہیں نقصان سے بچایا جائے۔ انہوں نے یہ بھی استدعا کی کہ ریستوران اور کیفے کی دیگر قانونی سرگرمیاں جاری رکھنے کی اجازت دی جائے۔

جسٹس انعام امین منہاس نے ریمارکس دیے کہ سنگل بنچ کے فیصلے سے قبل بھی ہائیکورٹ کا ایک فیصلہ آ چکا تھا، جس میں رولز بنانے کا کہا گیا تھا۔ انہوں نے سوال اٹھایا کہ اس فیصلے میں بھی شیشہ کیفوں پر پابندی عائد کی گئی تھی تو پھر این او سی کیسے جاری ہوئے؟ اس پر وکیل نے مؤقف اپنایا کہ این او سی انتظامیہ نے جاری کیے تھے اور درخواست گزار چاہتے ہیں کہ انہی این او سی کی بنیاد پر انہیں اجازت دی جائے۔

جسٹس انعام امین منہاس نے کہا کہ نوٹس جاری کیے جا رہے ہیں اور جواب آنے پر معلوم ہو جائے گا کہ رولز بنائے بغیر این او سی کیسے جاری ہوئے۔ انہوں نے مزید ریمارکس دیے کہ ہائیکورٹ سے دو فیصلے آئے اور دونوں کو چیلنج نہیں کیا گیا، جبکہ اب اپیل دائر کی گئی ہے مگر شیشہ کیفوں کے رولز اب تک نہیں بنے۔ وکیل کی جانب سے فیصلہ فوری معطل کرنے کی استدعا پر جسٹس انعام امین منہاس نے کہا کہ اس حوالے سے آرڈر پاس کیا جائے گا۔ ڈویژن بنچ نے اپیل پر نوٹس جاری کرتے ہوئے سماعت ملتوی کر دی۔