جنوبی وزیرستان دہشتگرد حملہ ناکام، وزیراعظم کا سکیورٹی فورسز کو خراجِ تحسین

وزیراعظم شہباز شریف کا جنوبی وزیرستان میں دہشتگرد حملہ ناکام بنانے پر فورسز کو خراجِ تحسین

جنوبی وزیرستان دہشتگرد حملہ ناکام بنانے پر وزیراعظم شہباز شریف نے سکیورٹی فورسز کو زبردست خراجِ تحسین پیش کرتے ہوئے کہا ہے کہ بہادر جوانوں نے بروقت کارروائی سے دشمن کے ناپاک عزائم خاک میں ملا دیے۔

وزیراعظم کی جانب سے جاری بیان میں کہا گیا کہ سکیورٹی فورسز نے جنوبی وزیرستان میں اپنی چیک پوسٹ پر بھارتی سرپرستی میں سرگرم فتنہ الخوارج کے دہشتگردوں کے بزدلانہ حملے کو کامیابی سے ناکام بنایا اور مؤثر کارروائی کرتے ہوئے چار دہشتگردوں کو ہلاک کر دیا۔

انہوں نے فورسز کی پیشہ ورانہ مہارت، غیر معمولی جرات اور فوری ردعمل کو سراہتے ہوئے کہا کہ پاکستانی جوان ہر محاذ پر ملک کے دفاع کے لیے مکمل طور پر تیار ہیں۔

شہباز شریف نے کہا کہ ہمارے بہادر سپاہیوں نے ایک مرتبہ پھر ثابت کر دیا ہے کہ پاکستان کی سلامتی پر کوئی سمجھوتہ نہیں کیا جائے گا اور ہر قسم کی دہشتگردی کا بھرپور جواب دیا جائے گا۔

وزیراعظم نے اس عزم کا بھی اعادہ کیا کہ پوری قوم اپنی بہادر افواج اور قانون نافذ کرنے والے اداروں کے ساتھ کھڑی ہے اور دہشتگردی کے خلاف جنگ میں ان کی قربانیوں کو قدر کی نگاہ سے دیکھتی ہے۔

انہوں نے کہا کہ حکومت اور سکیورٹی فورسز آپریشن "عزمِ استحکام” کے تحت ملک بھر سے دہشتگردی کے مکمل خاتمے تک اپنی کارروائیاں پوری قوت اور تسلسل کے ساتھ جاری رکھیں گے۔

وزیراعظم کے مطابق دہشتگرد عناصر اور ان کے سہولت کاروں کے خلاف مؤثر کارروائیاں جاری رہیں گی تاکہ ملک میں امن، استحکام اور عوام کے جان و مال کا تحفظ یقینی بنایا جا سکے۔