‫5 جولائی 1977 پاکستان کی جمہوری تاریخ کا سیاہ ترین دن، بلاول بھٹو زرداری‬

بلاول بھٹو زرداری کا 5 جولائی 1977 پر بیان، آئین اور جمہوریت کے دفاع کے عزم کا اعادہ

5 جولائی 1977 کے حوالے سے چیئرمین پاکستان پیپلز پارٹی بلاول بھٹو زرداری نے اپنے خصوصی بیان میں کہا ہے کہ یہ پاکستان کی جمہوری تاریخ کا سیاہ ترین دن تھا، جب عوام کے مینڈیٹ، آئین اور پارلیمانی جمہوریت پر شب خون مارا گیا۔

اپنے پیغام میں بلاول بھٹو زرداری نے کہا کہ آمریت نے یہ تصور کیا تھا کہ وہ عوام کی آواز اور جمہوری اقدار کو دبا دے گی، مگر تاریخ نے ثابت کیا کہ حق، آئین اور عوامی حاکمیت کو طاقت کے ذریعے ہمیشہ کے لیے ختم نہیں کیا جا سکتا۔

انہوں نے کہا کہ ذوالفقار علی بھٹو، شہید محترمہ بے نظیر بھٹو اور بے شمار جمہوریت پسند کارکنوں نے آئین، جمہوریت اور عوامی حقوق کے لیے لازوال قربانیاں دیں۔ انہی قربانیوں کی بدولت پاکستان میں جمہوری جدوجہد کا سفر جاری رہا اور عوام کے ووٹ کی طاقت کو نئی تقویت ملی۔

بلاول بھٹو زرداری نے کہا کہ 49 برس گزرنے کے باوجود پاکستان پیپلز پارٹی آج بھی آئین کی بالادستی، پارلیمانی جمہوریت، ووٹ کے تقدس اور عوام کے حقِ حکمرانی کے تحفظ کے اپنے عزم پر قائم ہے۔

انہوں نے اس بات پر زور دیا کہ شہداء کی قربانیوں کا حقیقی احترام اسی میں ہے کہ ملک میں نفرت، آمریت اور غیر جمہوری رویوں کو مسترد کرتے ہوئے ایک متحد، جمہوری، آئینی اور ترقی پسند پاکستان کی تعمیر کے لیے مشترکہ کوششیں جاری رکھی جائیں۔

چیئرمین پیپلز پارٹی نے کہا کہ جمہوری نظام ہی ملک کے استحکام، عوامی نمائندگی اور قومی ترقی کی ضمانت ہے، اس لیے آئین اور پارلیمانی نظام کا تحفظ ہر محب وطن پاکستانی کی مشترکہ ذمہ داری ہے۔