کینیڈا کے وین رائٹ فوجی اڈے پر ہولناک آتشزدگی، 4 اہلکار ہلاک، درجنوں شدید زخمی

کینیڈا کے وین رائٹ فوجی اڈے پر ہولناک آتشزدگی، 4 اہلکار ہلاک، درجنوں شدید زخمی

کینیڈا کے صوبے البرٹا میں فوجی تربیتی اڈے پر بڑے پیمانے پر آتشزدگی کے نتیجے میں چار فوجی اہلکار ہلاک اور درجنوں زخمی ہوگئے۔ کینیڈین وزیراعظم مارک کارنی نے واقعے کو امن کے دور میں مسلح افواج کے لیے بدترین سانحات میں سے ایک قرار دیتے ہوئے متاثرہ خاندانوں سے تعزیت کا اظہار کیا ہے۔

برطانوی میڈیا کے مطابق آگ ہفتے کی سہ پہر تقریباً 4 بجے کینیڈین فورسز بیس وین رائٹ (CFB Wainwright) میں لگی۔ یہ کینیڈا کے مصروف ترین فوجی تربیتی اڈوں میں شمار ہوتا ہے، جہاں گزشتہ ہفتے بھی لائیو فائرنگ کی مشقیں جاری تھیں۔

کینیڈین وزیراعظم مارک کارنی نے اپنے بیان میں کہا کہ وین رائٹ فوجی اڈے پر آتشزدگی کے واقعے میں چار فوجی اہلکار جان سے گئے جبکہ درجنوں دیگر شدید زخمی ہوئے۔ ان کے مطابق صورتِ حال تیزی سے تبدیل ہو رہی ہے اور حکام واقعے سے متعلق تفصیلی بریفنگ دیں گے۔

مارک کارنی نے کہا کہ ہلاک ہونے والے اہلکار کینیڈا کی خدمت کے لیے تربیت حاصل کر رہے تھے اور اب ملک ان کی قربانیوں اور ان کے خاندانوں کے ساتھ کھڑا ہے۔

انہوں نے زخمی اہلکاروں کی جلد صحت یابی کے لیے نیک تمناؤں کا اظہار کرتے ہوئے کہا کہ ان کی بحالی کے ہر مرحلے میں مدد فراہم کی جائے گی۔ وزیراعظم نے یہ بھی اعلان کیا کہ ملک بھر میں وفاقی عمارتوں پر کینیڈا کے پرچم سرنگوں رکھے جائیں گے۔

مقامی حکام کے مطابق تیز ہواؤں کے باعث آگ نے غیر معمولی تیزی سے پھیل کر وین رائٹ فوجی اڈے کی باڑ تک کو اپنی لپیٹ میں لے لیا۔ آگ پر قابو پا لیا گیا ہے، تاہم ممکنہ طور پر دوبارہ بھڑکنے والے شعلوں سے نمٹنے کے لیے فائر فائٹرز اور امدادی ٹیمیں جائے وقوع پر موجود ہیں۔

مقامی میئر بروس پگھ نے میڈیا کو بتایا کہ وین رائٹ فوجی اڈے پر اس نوعیت کا سانحہ غیر معمولی ہے۔ ان کے مطابق اڈے پر توپوں کی فائرنگ کی آوازیں سنائی دینا معمول کی بات ہے، تاہم واقعے کے روز فائرنگ اچانک رک گئی اور اس کے بعد ہنگامی امدادی ٹیموں کو طلب کیا گیا۔

حادثے کے بعد زخمیوں کو قریبی طبی مراکز اور ایڈمنٹن کے اسپتالوں میں منتقل کیا گیا۔ ایڈمنٹن کے رائل الیگزینڈرا اسپتال نے بڑی تعداد میں زخمیوں کی آمد کے پیش نظر ہنگامی پروٹوکول ’’کوڈ اورنج‘‘ نافذ کیا۔

اسپتال کے شعبۂ ایمرجنسی سے وابستہ ڈاکٹر وارن تھرسک کے مطابق زخمیوں کی تعداد نے وین رائٹ کے طبی مراکز پر شدید دباؤ ڈال دیا۔ امدادی کارروائیوں میں ایڈمنٹن، سسکاٹون اور کیلگری سے شاک ٹراما ایئر ریسکیو سروس کی ٹیموں اور طیاروں نے بھی حصہ لیا۔

حکام نے تاحال آگ لگنے کی حتمی وجہ کی تصدیق نہیں کی۔ کینیڈین میڈیا گلوبل نیوز نے نام ظاہر نہ کرنے والے فوجی ذرائع کے حوالے سے رپورٹ کیا کہ لائیو فائرنگ کی مشق کے دوران گیس پائپ لائن یا گیس کے کنویں کو نقصان پہنچنے سے واقعہ پیش آیا ہو سکتا ہے۔ تاہم اس دعوے کی سرکاری طور پر تصدیق نہیں ہوئی۔

کینیڈین مسلح افواج کے مطابق وین رائٹ فوجی اڈے پر آتشزدگی کے واقعے کی تحقیقات جاری ہیں اور فی الحال ایسے کوئی شواہد سامنے نہیں آئے جن سے یہ ظاہر ہو کہ آگ کسی دہشت گردانہ کارروائی کا نتیجہ تھی۔

حکام نے ہلاک اور زخمی ہونے والوں کی شناخت سے متعلق تفصیلات جاری کرنے سے گریز کیا ہے، کیونکہ پہلے متاثرہ اہلکاروں کے اہلِ خانہ کو اطلاع دینے کا عمل مکمل کیا جا رہا ہے۔

ابتدائی میڈیا رپورٹس میں ہلاکتوں کی تعداد سات بھی بتائی گئی تھی، تاہم وزیراعظم مارک کارنی کے بیان میں چار اہلکاروں کی ہلاکت کا ذکر کیا گیا۔ حتمی سرکاری تفصیلات سامنے آنے تک ہلاکتوں کی تعداد اور وین رائٹ فوجی اڈے پر آتشزدگی کے واقعے کی اصل وجہ سے متعلق مزید وضاحت کا انتظار ہے۔

At least seven people have been killed and many others injured in an explosion during a live-fire training exercise at Canadian Forces Base Wainwright, Alberta.

Local accounts suggest an 84 mm Carl-Gustaf round struck a gas well or pipeline, triggering a fire that spread toward munitions storage and caused secondary explosions. These details remain unconfirmed.

Regional hospitals reportedly activated Code Orange mass-casualty protocols, while STARS air ambulances were reportedly dispatched. The full casualty toll remains unverified.
— Babak Taghvaee - The Crisis Watch (@BabakTaghvaee1) October 18, 2026