بارشوں کی پیشگوئی 30 مارچ تک، محکمہ موسمیات کا ملک بھر کیلئے الرٹ
محکمہ موسمیات نے ملک بھر میں موسمی صورتحال کے حوالے سے اہم الرٹ جاری کرتے ہوئے پیشگوئی کی ہے کہ 24 مارچ سے شروع ہونے والا بارشوں کا سلسلہ 30 مارچ تک جاری رہے گا، جس کے دوران مختلف علاقوں میں تیز ہواؤں، گرج چمک اور کہیں کہیں موسلادھار بارش کا امکان ہے۔ اس نئے موسمی نظام کے باعث درجہ حرارت میں کمی اور موسم خوشگوار ہونے کی توقع بھی ظاہر کی جا رہی ہے، تاہم بعض علاقوں میں اربن فلڈنگ اور لینڈ سلائیڈنگ جیسے خدشات بھی موجود ہیں۔
محکمہ موسمیات کے مطابق یہ بارشیں مغربی ہواؤں کے ایک طاقتور سلسلے کے باعث ہوں گی، جو 24 مارچ کو بلوچستان کے مغربی علاقوں میں داخل ہوگا اور بتدریج ملک کے دیگر حصوں کو اپنی لپیٹ میں لے لے گا۔ ماہرین کے مطابق یہ سسٹم 27 مارچ کی رات کو مزید شدت اختیار کر سکتا ہے، جس کے نتیجے میں بارشوں کی شدت اور پھیلاؤ میں اضافہ ہوگا۔
بلوچستان کے مختلف علاقوں میں اس سسٹم کے اثرات سب سے پہلے ظاہر ہونے کا امکان ہے۔ پنجگور، تربت، کیچ، آواران، گوادر، پسنی اور اورمارہ میں بارش متوقع ہے، جبکہ لسبیلہ، خاران، خضدار، چاغی، دالبندین، قلات، سبی اور کوہلو میں بھی بادل برسنے کی پیشگوئی کی گئی ہے۔ اس کے علاوہ کوئٹہ، بارکھان، نصیر آباد، لورالائی، زیارت، چمن اور پشین میں بھی بارش ہوسکتی ہے۔ قلعہ عبداللہ، قلعہ سیف اللہ، نوشکی، ہرنائی، ژوب، قلات اور مستونگ بھی اس بارشی نظام سے متاثر ہوں گے۔
خیبرپختونخوا کے بالائی اور میدانی علاقوں میں بھی بارشوں کا سلسلہ جاری رہنے کی توقع ہے۔ چترال، دیر، سوات، کالام اور شانگلہ میں بارش کے ساتھ ٹھنڈک میں اضافہ ہوگا، جبکہ 24 سے 29 مارچ کے دوران کوہستان، مالاکنڈ، بونیر، بٹگرام، مانسہرہ، ایبٹ آباد اور بالاکوٹ میں بھی وقفے وقفے سے بارش متوقع ہے۔ اسی طرح ہری پور، مردان، نوشہرہ، کرم، صوابی، چارسدہ، کوہاٹ اور ہنگو میں بھی بارش کا امکان ظاہر کیا گیا ہے۔ جنوبی اضلاع جیسے کرک، بنوں، لکی مروت، ٹانک، باجوڑ، مہمند، خیبر، اورکزئی اور ڈیرہ اسماعیل خان بھی اس سسٹم سے متاثر ہوں گے۔
وفاقی دارالحکومت اسلام آباد اور جڑواں شہر راولپنڈی سمیت مری اور جہلم میں بھی بارش اور گرج چمک کی پیشگوئی کی گئی ہے، جس سے موسم خوشگوار ہونے کے ساتھ ساتھ سردی کی شدت میں بھی عارضی اضافہ ہوسکتا ہے۔
پنجاب کے مختلف علاقوں میں بھی بارشوں کا امکان ہے۔ اٹک، چکوال، سرگودھا، میانوالی، فیصل آباد اور جھنگ میں بارش متوقع ہے، جبکہ ٹوبہ ٹیک سنگھ، خوشاب، نورپور تھل، گجرات اور گوجرانوالہ میں بھی بادل برسنے کا امکان ہے۔ لاہور، حافظ آباد، منڈی بہاؤالدین، سیالکوٹ، نارووال اور پاکپتن بھی اس بارشی سلسلے سے متاثر ہوں گے۔
جنوبی پنجاب کے علاقوں ڈیرہ غازی خان، بھکر، ملتان، کوٹ ادو اور بہاولپور میں بھی بارش کی پیشگوئی کی گئی ہے، جبکہ ساہیوال، بہاولنگر اور رحیم یار خان میں 25 سے 30 مارچ کے دوران بارش کا امکان ہے۔
سندھ میں بھی اس موسمی نظام کے اثرات دیکھنے میں آئیں گے۔ کراچی اور حیدرآباد میں 25، 26، 28 اور 29 مارچ کو بارش کا امکان ظاہر کیا گیا ہے، جبکہ سکھر، دادو، کشمور، جیکب آباد اور لاڑکانہ میں بھی بارش متوقع ہے۔
اس کے علاوہ گلگت بلتستان اور آزاد کشمیر کے علاقوں میں بھی بارش اور بعض مقامات پر برفباری کا امکان ظاہر کیا گیا ہے، جس سے پہاڑی علاقوں میں سردی کی شدت بڑھ سکتی ہے۔
محکمہ موسمیات نے شہریوں کو احتیاطی تدابیر اختیار کرنے کی ہدایت کرتے ہوئے کہا ہے کہ تیز ہواؤں اور گرج چمک کے دوران غیر ضروری سفر سے گریز کیا جائے، کمزور تعمیرات، بجلی کے کھمبوں اور درختوں سے دور رہا جائے، جبکہ پہاڑی علاقوں میں لینڈ سلائیڈنگ کے خدشے کے پیش نظر سیاح محتاط رہیں۔
مجموعی طور پر یہ بارشی سلسلہ خشک سالی کے شکار علاقوں کے لیے خوش آئند ثابت ہوسکتا ہے، تاہم بعض شہری علاقوں میں نکاسی آب کے مسائل کے باعث مشکلات بھی پیدا ہو سکتی ہیں۔ آنے والے دنوں میں اس سسٹم کی شدت اور دورانیے پر مسلسل نظر رکھی جا رہی ہے، اور متعلقہ اداروں کو الرٹ رہنے کی ہدایت جاری کر دی گئی ہے۔
