پاکستان اور عمان تجارت و سرمایہ کاری بڑھانے پر متفق

اسحاق ڈار اور عمانی وزیر خارجہ کی ملاقات، تجارت، سرمایہ کاری اور دوطرفہ تعلقات مضبوط بنانے پر اتفاق

پاکستان اور عمان تجارت و سرمایہ کاری کے شعبوں میں تعاون کو مزید فروغ دینے پر متفق ہوگئے ہیں۔ دونوں ممالک نے اعلیٰ سطح کے روابط، کاروباری تعاون اور عوامی تعلقات کو مضبوط بنانے کے عزم کا اعادہ کیا۔

دفتر خارجہ کے مطابق نائب وزیراعظم و وزیر خارجہ سینیٹر محمد اسحاق ڈار نے فلپائن کے دارالحکومت منیلا میں آسیان ریجنل فورم (ARF 2026) کے موقع پر سلطنت عمان کے وزیر خارجہ سید بدر بن حمد البوسعیدی سے ملاقات کی۔

ملاقات میں پاکستان اور عمان کے درمیان دوطرفہ تعلقات، اقتصادی تعاون، علاقائی صورتحال اور باہمی دلچسپی کے مختلف امور پر تفصیلی تبادلہ خیال کیا گیا۔

دونوں رہنماؤں نے حالیہ برسوں میں پاکستان اور عمان کے درمیان تعاون میں ہونے والی پیش رفت پر اطمینان کا اظہار کرتے ہوئے اس تعاون کو مزید وسعت دینے کے عزم کا اظہار کیا۔

اس موقع پر اعلیٰ سطح کے تبادلوں، تجارت اور سرمایہ کاری میں اضافے، عوامی روابط کو فروغ دینے، کاروباری برادریوں کے درمیان تعلقات مضبوط بنانے اور مختلف کثیرالجہتی فورمز پر باہمی رابطہ و تعاون بڑھانے پر اتفاق کیا گیا۔

اسحاق ڈار اور سید بدر البوسعیدی نے خطے اور دنیا کی موجودہ صورتحال پر بھی تبادلہ خیال کیا۔ عمانی وزیر خارجہ نے خطے میں مکالمے، کشیدگی میں کمی اور امن و سلامتی کے فروغ کے لیے پاکستان کے تعمیری کردار کو سراہا۔

دونوں رہنماؤں نے حالیہ علاقائی پیش رفت پر تشویش کا اظہار کرتے ہوئے جنگ بندی برقرار رکھنے، بین الاقوامی قانون کے احترام اور خطے میں دیرپا امن و استحکام کے لیے مشترکہ کوششوں کی اہمیت پر زور دیا۔

ملاقات کے اختتام پر پاکستان اور عمان نے باہمی دلچسپی کے تمام اہم امور پر قریبی رابطے برقرار رکھنے اور دوطرفہ تعاون کو مزید وسعت دینے کے عزم کا اعادہ کیا۔